اقتوبە. 27 ءساۋىر. اقتوبەدەگى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ اتىنداعى ورتالىق ساياباقتا جەڭىمپازدار فورۋمى اسقان ۇيىمشىلدىقپەن ءوتتى. بۇل تۋرالى egemen.kz حابارلادى.
جۇزدەرىنەن قۋانىش لەبى ەسكەن اقتوبەلىكتەر تۇسكە تامان ساياباقتى لىق تولتىردى دەسە دە بولادى. مىڭداعان قالا تۇرعىندارى, «نۇر وتان» پارتياسىنىڭ بەلسەندىلەرى, جاستار مەن ستۋدەنتتەر قاتىسقان بۇل شارا اقتوبەلىكتەرگە قوتەرىڭكى كوڭىل-كۇي سىيلادى.
جەڭىمپازدار فورۋمىندا وبلىستىق ءماسليحاتتىڭ حاتشىسى ءسانيا قالدىعۇلوۆا پرەزيدەنتتىك سايلاۋدىڭ وڭىردە دەموكراتيالىق تالاپتارعا ساي ۇيىمشىلدىقپەن جانە سايلاۋشىلاردىڭ جوعارى بەلسەندىگىمەن وتكەنىن اتاپ ءوتتى. «نۇر وتان» پارتياسىنىڭ كانديداتى ءىس باسىنداعى پرەزيدەنت نۇرسۇلتان نازارباەۆتىڭ ايقىن باسىمدىقپەن جەڭىسكە جەتكەنىن, قازاقستاندىقتاردىڭ دۇرىس تاڭداۋ جاساعانىن جەتكىزدى.
ونىڭ ايتۋىنشا, وبلىس سايلاۋشىلارىنىڭ 96,7 پايىزى سايلاۋعا قاتىسقان. ودان كەيىن «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى ءمادي ەلەۋسىزوۆ, قازاقستان رەسپۋبليكاسىنىڭ مادەنيەت قايراتكەرى ەركىن قۇرمانبەك, سونداي-اق, بەيبىتشىلىك جانە كەلىسىم كەڭەسى وبلىستىق بولىمشەسىنىڭ توراعاسى كەلدىباي ەسپاعامبەتوۆ قۇتتىقتاۋ سوزدەرىن ارنادى.
«ءبىزدىڭ كاسىپورىندا كوپتەگەن جۇمىسشىلار اۋلەتى ەڭبەك ەتەدى. ءبىزدىڭ اۋلەتتىڭ وسى زاۋىتتاعى جالپى جۇمىس وتىلىنە 50 جىل بولادى. ءبىز اۋلەتىمىزبەن نۇرسۇلتان ءابىش ۇلىن قولداپ داۋىس بەردىك. پرەزيدەنت قازاقستاندى دامۋدىڭ داڭعىل جولىمەن الىپ كەلەدى», – دەيدى اقتوبە فەرروقورىتپا زاۋىتىنىڭ بالقىتۋشىسى ەرجان اتىراۋباەۆ.
شارادا ءسوز العان قالالىق ءماسليحاتتىڭ دەپۋتاتى, سەرىكتەستىك باسشىسى ءانۋار تاسىموۆ, جۇبانوۆ اتىنداعى مەملەكەتتىك وڭىرلىك ۋنيۆەرسيتەتىنىڭ ستۋدەنتى ازامات ابىلقايىر قازاقستاندىق جاستارعا بارلىق جاعداي تۋعىزىلعانىن ەلباسىنىڭ سارابدال ساياساتىمەن ساباقتاستىردى.
جەڭىمپازدار فورۋمىنىڭ سوڭى جەرگىلىكتى ونەرپازداردىڭ ءان-جىرىنا ۇلاستى.
ساتىبالدى ءساۋىرباي.
دەرەك, سۋرەت: egemen.kz.
