فوتو: parlam.kz, akzhol.kz
دەپۋتات ازات پەرۋاشەۆ دميتري ۆاسيلەۆتىڭ قاماۋعا الىنعانى تۋرالى اقپارات كەشە عانا راستالعانىن مالىمدەدى.
«بۇل اقپارات وتاندىق باق-تا جاريالاندى, بىراق رەسمي مالىمدەمە بولعان جوق. جۇما كۇنى ۇقك-عا ساۋال جىبەردىك. ال كەشە «دميتري ۆاسيلەۆ ۇستالدى» دەگەن رەسمي جاۋاپ الدىق. بىزگە ونىڭ ادۆوكاتتارىن كورسەتتى, ولارعا حابارلاسۋعا تىرىستىق. بىراق ناتيجە بولمادى. ەندى بۇگىن-ەرتەڭ ولاردى تابامىز دەپ ۇمىتتەنەمىن. ادۆوكاتتار بەرەتىن اقپاراتقا سۇيەنە وتىرىپ, نە بولىپ جاتقانىن تۇسىنەمىز», دەدى دەپۋتات.
ازات پەرۋاشەۆ ءىستىڭ ءمان-جايى انىقتالىپ جاتقانىن, سونداي-اق پارا بەرۋگە ءماجبۇر بولعان ادامنىڭ قىلمىسكەر بولىپ سانالمايتىنىن العا تارتقان.
«قانداي باپ ەكەنى ناقتىلانبادى. بىزگە بەلگىسىز قىزمەتتىك حاتتار تاراعان سياقتى. دالىرەك ايتساق, وعان ەمەس, ۇلتتىق ۇلاننىڭ لاۋازىمدى تۇلعاسىنا «پارا الدى» دەپ ايىپ تاعىلعان بولۋى مۇمكىن. مۇندا ءىستىڭ ءمان-جايىن ءتۇسىنۋ كەرەك. قىلمىستىق كودەكستىڭ 367-بابىنا سايكەس, پارا بەرۋگە ءماجبۇر بولعان ادام قىلمىسكەر دەپ سانالمايدى. پارانىڭ باستاماشىسى كىم بولعانىن انىقتاۋ كەرەك. نە ۆاسيلەۆ, نە ول بوپسالاۋدىڭ قۇربانى بولدى», دەدى پەرۋاشەۆ.
ەسكە سالا كەتەيىك, ىشكى ىستەر مينيسترلىگى ۇلتتىق ۇلان باس قولباسشىسى ورىنباسارىنىڭ ۇستالعانى تۋرالى اقپاراتتى راستادى. حابارلامادا گەنەرال-مايور كونستانتين ۆورونكيننىڭ, سونداي-اق «اق جول» پارتياسى توراعاسىنىڭ ورىنباسارى دميتري ۆاسيلەۆتىڭ ەسىمى اتالعان.
