سۋرەتتە: مەرگەن جانىبەك قۇلمىرزاەۆ
بۇل سايىستار «پۋتا», «Qalqan» جانە قازاق تانىمىنداعى «Zhamby» ستيلدەرى بويىنشا ءوتىپ جاتىر. جارىستىڭ العاشقى كۇنى مەرگەندەر «پۋتا» ستيلىنەن سىنعا ءتۇستى. بۇل ءتۇردىڭ ەرەكشەلىگى – «پۋتا» اتتى قۇمىرا پىشىندەس (ەرلەر – 70 مەتر, ايەلدەر – 60 مەتر) نىساناعا ءبىر دۇركىن كەزەك-كەزەك 9 وق جۇمسايدى. وق قۇمىرا مۇسىنگە دارىعان سايىن ءبىر-ءبىر ۇپايدان بەرىلەدى. جارىس ەرەجەسى بويىنشا ەكى ساداقشى قاتار سىنعا ءتۇسىپ, جەڭىلگەنى جارىستان شىعىپ وتىرادى.
اتالعان جارىس بارىسىندا سوڭعى تۋردا ماجار سپورتشىسىمەن مەرگەندىك سىناسقان ەلىمىزدىڭ ەرلەر قۇراماسىنىڭ مۇشەسى جانىبەك قۇلمىرزاەۆ قارسىلاسىن 13:10 ەسەبىمەن جەڭىپ, التىن مەدال يەسى اتاندى. ماراپاتتاۋ ءراسىمى كەزىندە ءباسپاسوز وكىلدەرىنە سۇحبات بەرگەن جانىبەك ءابدىۋالي ۇلى: «ۇلتتىق قۇرامادا مەنەن باسقا 6 ازامات بار. بۇلاردىڭ بارلىعى دەرلىك التىن الۋعا لايىقتى. بىراق بۇل مارتەبە ماعان بۇيىرعانىنا قۋانىشتىمىن», دەدى.
وسى سايىس ءتۇرى بويىنشا ونەر كورسەتكەن ۇلتتىق قۇراما مۇشەسى, ءداستۇرلى ساداق اتۋمەن اينالىسقانىنا ەكى-اق جىل بولعان قارىنداسىمىز, قازاقستان كۋبوگى جانە ەل بىرىنشىلىگىنىڭ جەڭىمپازى ايكوركەم باتيحان مەن قاسىمحان قانات قولا جۇلدەگە يە بولدى.
ۇلتتىق قۇرامانىڭ باس باپكەرى دياس احمەتوۆتىڭ ايتۋىنا قاراعاندا, مەرگەندەر ءدۇبىرلى دوداعا جاقسى دايىندىقپەن كەلىپتى. جارىسقا دايىندىق بارىسىندا قۇراما مالايزيا ەلىنە بارىپ وقۋ-جاتتىعۋ جيىنىن وتكىزىپ كەلگەن. «ويتكەنى مالاي جۇرتىنىڭ ساداقشىلارى الەمدىك دەڭگەيدە بيىك مارتەبەگە يە. ولاردان كوپ نارسە ۇيرەندىك. سونىڭ ناتيجەسى وسى», دەيدى باس باپكەر.
