سۋرەتتەردە: ازيا ءستيلى بويىنشا توپجارعان مەرگەندەر (سولدان وڭعا قاراي): باتىر بەكساۋىت, ايتبەك سارىباي, ەرالحان ايكوز.
ءدۇبىرلى دودانىڭ العاشقى كۇنى الەمنىڭ تاڭداۋلى مەرگەندەرى ماجار ءستيلى بويىنشا سايىستى. بۇل ءستيلدىڭ ەرەكشەلىگى – ءبىر-بىرىنە ىرگەسى جاپسارلاس ديامەترى 90 سم بولاتىن ءۇش نىسانا قاتار قويىلادى. بۇلاردى اتپەن شاۋىپ كەلە جاتىپ اتاسىز. قانشا وق جۇمسايسىز وعان شەكتەۋ جوق. تەك وق جىبەرۋگە ارنالعان 100 مەترلىك ولشەمىنەن شىقپاساڭىز بولعانى. ەڭ باستىسى, اتتىڭ شابىسى مە مەرگەننىڭ ەپتىلىگى ۇيلەسىم تاپقانى ءلازىم.
وسىلاي تاڭنان باستاپ, كۇن ۇياسىنا قونعانعا دەيىن جالعاسقان بۇل سايىستىڭ باس مەرگەنى رەتىندە فرانتسۋز سپورتشىسى رافاەل مالەت تانىلىپ, سايىستىڭ العاشقى التىن مەدال يەگەرى اتانسا, ەكىنشى ورىنعا موڭعوليالىق تانىمال جامبى اتۋشى التىنحۋياگ نەرگۇي تۇراقتاپ, كۇمىس مەدالعا قول جەتكىزدى. ال ءۇشىنشى ورىن, قولا جۇلدە تاعى ءبىر فرانتسيا ەلىنەن كەلگەن ساداقشى گاەتان بلوگە بۇيىردى.
موڭعوليالىق مەرگەن, ءاتۇستى ساداق اتۋدان الەم چەمپيونى التىنحۋياگ نەرگۇي.
كەلەسى كۇنى مەرگەندەر ازيا ستيلىنەن سىنعا ءتۇستى. مۇنى حالىقارالىق جارىستاردا «كورەي ءستيلى» دەپ تە ايتادى. بۇل كۇردەلى سايىس تۇرىنە جاتادى. اراقاشىقتىعى 30 مەتر بولاتىن شارشى ءپىشىندى ءتورت بۇرىش ءۇش نىسانا قويىلادى. ونىڭ ءبىرىنشىسىنىڭ بەتىن باتىسقا بۇرىپ ورنالاستىرسا, ورتاڭعى نىسانا تۋرا قاراپ تۇرادى. ءۇشىنشى نىسانا ادەتتەگىدەي ءبىرىنشى نىساناعا قارسى, بەتىن شىعىسقا بۇرىپ تۇرادى. ءاربىر نىسانادا وقتىڭ دارىعانىنا قاتىستى ۇپاي بەرىلەتىن ارنايى ولشەمدەر بار.
بۇل ءستيلدىڭ باس مەرگەنى رەتىندە وتاندىق جامبىشى باتىر بەكساۋىت تانىلىپ, التىن مەدالعا قول جەتكىزسە, ەكىنشى-ءۇشىنشى ورىن, ياعني كۇمىس-قولا جۇلدەگە تاعى دا ءوزىمىزدىڭ كانىگى مەرگەندەر ايتبەك سارىباي مەن ەرالحان ايكوز يە بولدى.
جارىستى ۇيىمداستىرۋشى جامبى اتۋ فەدەراتسياسىنىڭ اتقارۋشى ديرەكتورى ەلنۇر يساقۇلوۆ مىرزامەن حابارلاسقانىمىزدا: «بۇل جولعى كوشپەلىلەر ويىنىنا الەمنىڭ تۇكپىر-تۇكپىرىنەن كەلىپ قاتىسىپ جاتقان جامبى اتۋشى مەرگەندەردىڭ دايىندىعى جاقسى. بىراق كوپشىلىك كورەرمەنگە ايتا كەتەتىن دۇنيە – جامبى اتۋ ونەرىندە مەرگەننىڭ مىنگەن اتى ايرىقشا ءرول اتقارادى, ياعني ات ءجۇرىسىنىڭ جايلىلىعى مەن تۋرا باعىتتا جىلدام قوزعالۋىنىڭ مەرگەننىڭ ناتيجەلى ونەر كورسەتۋىنە ىقپالى زور», دەدى.
وسى ورايدا فەدەراتسيا وكىلدەرى جارىس ءادىل ءوتۋ ءۇشىن سىرتتان كەلەتىن مەرگەندەرگە ارناپ 100-گە جۋىق جامبى اتىن دايىنداعان ەكەن. بۇل اتتاردى مەرگەندەر لوتەرەيالىق ءتاسىل ارقىلى تاڭداپ مىنگەن. ياعني «اناعان جاقسى ات بۇيىردى, ماعان وسال ات كەز بولدى» دەيتىندەي وكپەگە ورىن جوق.
ءسوزىمىزدى تۇيىندەپ ايتار بولساق, جامبى اتۋشىلار 10-11 قىركۇيەك كۇندەرى تۇركى جانە قازاقتىڭ جامبى اتۋ ءستيلى بويىنشا ءوزارا مىقتىلاردى انىقتايتىن بولادى. جارىستىڭ سوڭىندا جوعارىداعى ءتورت ستيل بويىنشا مەدال يەگەرى اتانعان 12 مەرگەن اسا قوماقتى جۇلدە تاعايىندالعان «تايتۇياق» جامبىنى اتۋ تۇسىرۋدەن سايىسقا قاتىسادى دەپ كۇتىلىپ وتىر.
