تالدىقورعان. 27 ءساۋىر. تالدىقورعاندا «ەلباسىمەن بىرگە – جاڭا جەڭىستەرگە» اتتى جەڭىمپازدار فورۋمى بولىپ ءوتتى. بۇل تۋرالى egemen.kz ءتىلشىسى حابارلادى.
ونى الماتى وبلىسىنىڭ اكىمى اماندىق باتالوۆ اشىپ: «مەملەكەت باسشىسىنىڭ سارابدال ساياساتىمەن جۇرگەن ەلىمىز بارلىق قيىندىقتى جەڭىپ, جاڭا جەتىستىكتەرگە جەتىپ, كۇننەن-كۇنگە تۇرمىسى جاقسارىپ, بەيبىت ءومىر سۇرۋدە. پرەزيدەنتتىك سايلاۋ – حالقىمىزدىڭ بىرلىگىن نىعايتىپ, ەلىمىزدەگى ساياسي تۇراقتىلىقتى بەكىتە ءتۇستى. ەلباسى سايلاۋ الدىندا كىندىك قانى تامعان جەتىسۋعا كەلىپ, جەرگىلىكتى حالىقتىڭ ىستىق ىقىلاسىنا بولەنگەن ەدى. حالىق ءوز تاڭداۋىن جاسادى», – دەدى.
سونىمەن قاتار, ءوڭىر باسشىسى: «الماتى وبلىسىنىڭ سايلاۋشىلارى تۇڭعىش پرەزيدەنتىمىز نۇرسۇلتان ءابىش ۇلىن ءبىراۋىزدان قولداپ, ۇلكەن بەلسەندىلىكپەن داۋىس بەردى. بارشا قازاقستاندىقتار سەكىلدى جەتىسۋلىقتار دا دۇرىس تاڭداۋ جاسادى. جەرلەستەرى ەلباسىن ناقتى ءىس جۇزىندە قولداپ, رەسپۋبليكامىزدا ءبىرىنشى ورىنعا يە بولدى. بۇل – ءوز ۇلىنا دەگەن تۋعان جەردىڭ سىيى, تىلەۋى ەكەنى انىق! ءبىزدىڭ الدىمىزدا زور مىندەتتەر تۇر. ونىڭ ەڭ باستىسى – قازاقستاندى الەمنىڭ دامىعان 30 ەلىنىڭ قاتارىنا قوسۋ. بۇل اسۋدى ءبىز پرەزيدەنتىمىزبەن بىرگە الاتىنىمىزعا سەنىمدىمىن», – دەدى.
كەلەسى كەزەكتە, اشىق اسپان استىنا قۇرىلعان ساحنا تورىنە ەڭبەك ارداگەرلەرى, دەموكراتيالىق پارتيا مەن قازاقستان حالقى اسسامبلەياسىنىڭ وكىلدەرى, ستۋدەنت جاستار جانە سپورتشىلار شىعىپ جۇرەكجاردى تىلەكتەرىن ءبىلدىردى. مەرەكەلىك شارا كونتسەرتتىك باعدارلامامەن جالعاستى.
نۇربول الدىباەۆ.
دەرەك, سۋرەت: egemen.kz.
