ەلباسىن سايلاۋداعى جەڭىسىمەن شەت ەلدەردىڭ باسشىلارى قۇتتىقتاۋدا

استانا. 27 ءساۋىر. پرەزيدەنتتىك سايلاۋدا ايقىن جەڭىسكە جەتكەن نۇرسۇلتان نازارباەۆتى بىرقاتار شەت مەملەكەتتەردىڭ كوشباسشىلارى تەلەفون ارقىلى قۇتتىقتادى. بۇل تۋرالى akorda.kz حابارلادى. ناقتى ايتار بولساق, مەملەكەت باسشىسى رەسەي فەدەراتسياسىنىڭ پرەزيدەنتى ۆلاديمير پۋتينمەن تەلەفون ارقىلى سويلەستى. اڭگىمە بارىسىندا ۆلاديمير پۋتين نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن قۇتتىقتادى. مەملەكەتتەر باسشىلارى ەكىجاقتى ىنتىماقتاستىقتىڭ كەڭ اۋقىمدى ماسەلەلەرى مەن ۇلى وتان سوعىسىنداعى جەڭىستىڭ 70 جىلدىعىن مەرەكەلەۋ قارساڭىندا ماسكەۋدە بولاتىن كەزدەسۋ جونىندە پىكىر الماستى. تەلەفون ارقىلى سويلەسۋگە رەسەي جاعى باستاماشىلىق ەتتى. سونىمەن قاتار, ەلباسى بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن تەلەفون ارقىلى سويلەستى. بەلارۋس باسشىسى دا نۇرسۇلتان نازارباەۆتى پرەزيدەنتتىك سايلاۋداعى جەڭىسىمەن قۇتتىقتادى. مەملەكەتتەر باسشىلارى ەكىجاقتى ىنتىماقتاستىقتىڭ كەڭ اۋقىمدى ماسەلەلەرى مەن ۇلى وتان سوعىسىنداعى جەڭىستىڭ 70 جىلدىعىن مەرەكەلەۋ قارساڭىندا ماسكەۋدە بولاتىن كەزدەسۋ جونىندە پىكىر الماستى. تەلەفون ارقىلى سويلەسۋگە بەلارۋس جاعى باستاماشىلىق ەتتى. ودان بولەك, مەملەكەت باسشىسى ءابۋ-ءدابيدىڭ مۇراگەر حانزاداسى, بىرىككەن اراب امىرلىكتەرى قارۋلى كۇشتەرىنىڭ جوعارعى باس قولباسشىسىنىڭ ورىنباسارى شەيح مۇحاممەد بەن زايد ءال ناحايانمەن تەلەفون ارقىلى سويلەستى ءابۋ-ءدابيدىڭ مۇراگەر حانزاداسى ەلباسىن پرەزيدەنتتىك سايلاۋداعى جەڭىسىمەن قۇتتىقتادى جانە قازاقستاندى ىلگەرىلەتۋ مەن وركەندەتۋگە باعىتتالعان اۋقىمدى رەفورمالاردىڭ تابىستى جۇزەگە اسىرىلاتىنىنا سەنىم ءبىلدىردى. اڭگىمە بارىسىندا تاراپتار ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتى ودان ءارى نىعايتۋ شارالارىن تالقىلادى. سونىمەن قاتار, نۇرسۇلتان نازارباەۆ پەن مۇحاممەد بەن زايد ءال ناحايان وڭىرلىك جانە حالىقارالىق كۇن تارتىبىندەگى نەگىزگى جايتتار جونىندە پىكىر الماستى. سونداي-اق, سەربيا پرەزيدەنتى توميسلاۆ نيكوليچ تە ەلباسىن تەلەفون ارقىلى سايلاۋداعى جەڭىسىمەن قۇتتىقتادى. قازاقستان پرەزيدەنتى سەربيانىڭ ەقىۇ-داعى توراعالىعى ۋكرايناداعى داعدارىستى رەتتەۋگە جانە ۇيىمعا مۇشە ەلدەردىڭ سىندارلى ديالوگىن دامىتۋعا قىزمەت ەتەدى دەپ ۇمىتتەنەتىنىن جەتكىزدى. مەملەكەتتەر باسشىلارى قازاقستان مەن سەربيانىڭ دوستىق قارىم-قاتىناستارىن ودان ءارى نىعايتۋ باعىتىنداعى بىرلەسكەن جۇمىسقا دايىن ەكەندىكتەرىن ايتتى. تەلەفون ارقىلى سويلەسۋگە سەربيا جاعى باستاماشى بولدى. مەملەكەت باسشىسى ازەربايجان رەسپۋبليكاسىنىڭ پرەزيدەنتى يلحام اليەۆپەن دە تەلەفون ارقىلى سويلەستى. يلحام اليەۆ نۇرسۇلتان نازارباەۆتى 26 ساۋىردە وتكەن قازاقستان رەسپۋبليكاسى پرەزيدەنتىنىڭ سايلاۋىنداعى جەڭىسىمەن قۇتتىقتادى. سونداي-اق, مەملەكەتتەر باسشىلارى ەكىجاقتى ىنتىماقتاستىقتىڭ وزەكتى ماسەلەلەرى مەن استراحان قالاسىندا 2014 جىلعى 29 قىركۇيەكتە وتكەن كاسپي ماڭى مەملەكەتتەرىنىڭ ءتورتىنشى سامميتىندەگى كەزدەسۋدە جاسالعان ۋاعدالاستىقتاردىڭ جۇزەگە اسىرىلۋ بارىسىن تالقىلادى. تەلەفون ارقىلى سويلەسۋگە ازەربايجان جاعى باستاماشىلىق ەتتى. ودان كەيىن مەملەكەت باسشىسى ۆەنگريا پرەمەر-ءمينيسترى ۆيكتور وربانمەن تەلەفون ارقىلى سويلەستى. ۆيكتور وربان نۇرسۇلتان نازارباەۆتى پرەزيدەنتتىك سايلاۋداعى ايقىن جەڭىسىمەن قۇتتىقتادى جانە قازاقستان حالقىنىڭ الدىندا تۇرعان اۋقىمدى رەفورمالاردى تابىستى جۇزەگە اسىرۋعا تىلەستىك ءبىلدىردى. سونداي-اق, ۆەنگريا پرەمەر-ءمينيسترىنىڭ قازاقستانعا ساۋىردە جاساعان ساپارىنىڭ قورىتىندىلارىن ەسكەرە وتىرىپ, ەكىجاقتى قارىم-قاتىناستاردىڭ كەلەشەگى تالقىلاندى. تەلەفون ارقىلى سويلەسۋگە ۆەنگريا جاعى باستاماشىلىق ەتتى. ەلامان قوڭىر. دەرەك, سۋرەت: akorda.kz.