فوتو: poltava.to
اتاپ ايتقاندا, ويىندارعا جانە ءباس تىگۋگە تىيىم سالىنعان ادامداردىڭ ءتىزىمى كەڭەيتىلدى. بورىشكەرلەردىڭ بىرىڭعاي تىزىلىمىندە تۇراتىندارعا ءباس تىگۋگە جانە قۇمار ويىن ويناۋعا تىيىم سالىندى.
سونداي-اق جاۋاپتى مەملەكەتتىك لاۋازىمدى اتقاراتىن, مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن جانە ولارعا تەڭەستىرىلگەن ادامدارعا دا بىرقاتار شەكتەۋلەر قويىلعان.
ەندى مەملەكەتتىك قىزمەتكەرلەر, اسكەري قىزمەتكەرلەر, ارنايى جانە قۇقىق قورعاۋ ورگاندارىنىڭ قىزمەتكەرلەرى, بيۋدجەتتىك ۇيىمداردىڭ باسشىلارى قۇمار ويىندار مەن ءباس تىگۋگە قاتىسا المايدى. اتالعان شەكتەۋلەردى ساقتاماعان مەملەكەتتىك قىزمەتكەر جۇمىستان شىعارىلادى.
ەستەرىڭىزگە سالا كەتەيىك, 2024 جىلدىڭ 8 شىلدەسىندە مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى, لوتەرەيا قىزمەتى, دەنساۋلىق ساقتاۋ, مەملەكەتتىك ەڭبەك ينسپەكتسياسى, مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولدىرماۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
