پەتروپاۆل. 27 ءساۋىر. ارداگەرلەر, جاستار وكىلدەرى, ۇكىمەتتىك ەمەس ۇيىمدار, ەتنو-مادەني بىرلەستىك جەتەكشىلەرى, حالىق قالاۋلىلارى, سايلاۋ بەلسەندىلەرى اتىنانا ورتالىق الاڭعا جينالعان 10 مىڭعا جۋىق ادام «پرەزيدەنتتىڭ جەڭىسى–مەملەكەت تۇراقتىلىعىنىڭ كەپىلى!» اتتى جەڭىمپازدار فورۋمىنا قاتىسىپ, سالتاناتتى جاعدايدا اتالىپ ءوتتى. بۇل تۋرالى egemen.kz ءتىلشىسى حابارلادى.
ورتالىق الاڭ مەرەكەدەگىدەي بەزەندىرىلىپ, پرەزيدەنتتىك سايلاۋدا ايقىن باسىمدىلىقپەن جەڭىسكە جەتكەن ن. نازارباەۆتى قولداعان پلاكاتتار مەن ۇراندار ءىلىندى.
جيىندى ايماق باسشىسى ەرىك سۇلتانوۆ اشىپ, وبلىس تۇرعىندارىن ساسي شارانىڭ اشىق, ەركىن جانە دەموكراتيا تالاپتارىنا ساي وتۋىمەن قۇتتىقتاپ, ەل دامۋىنىڭ ماڭىزدى كەزەڭىنە جول اشىلعانىن جەتكىزدى. «كونستيتۋتسيالىق قۇقىقتارىن كەڭىنەن پايدالانعان سولتۇستىكقازاقستاندىقتار سايلاۋ ۋچاسكەلەرىنە ءبىر كىسىدەي كەلىپ, توپتاسقاندىقتىڭ, ۇيىمشىلدىقتىڭ جوعارى ۇلگىسىن تانىتتى. تىزىمدەگى سايلاۋشىلاردى 97,71 پايىزى ءوز تاڭداۋلارىن جاساپ, جەرلەستەرىمىزدىڭ 98,33 پايىزى قازىرگى پرەزيدەنتىمىزگە زور سەنىم ارتتى. بەيبىتشىلىك پەن تاتۋلىق ءۇشىن ءوز تاڭداۋلارىن ءبىلدىردى», - دەدى ءوز سوزىندە ەرىك حامزا ۇلى.
جەڭىمپازدار فورۋمىندا سولتۇستىك قازاقستان وبلىسىنىڭ قۇرمەتتى ازاماتى, تىل ارداگەرى قۇدايبەرگەن قاليەۆ, «تايىنشا-استىق» جشس-ءنىڭ ديرەكتورى اناتولي رافالسكي, پەتروپاۆل اۋىر ماشينا جاساۋ زاۋىتىنىڭ باس ديرەكتورى قۋانىش ءبيشىموۆ, قازاقستان حالقى اسسامبلەياسى وبلىستىق بولىمشە حاتشىلىعىنىڭ مەڭگەرۋشىسى نايل ساليموۆ, جاس جۋرناليست نۇرگۇل وقاشەۆا, تاعى باسقالارى سويلەپ, سايلاۋ قىزىلجار ءوڭىرى تۇرعىندارىنىڭ بەلسەندى ازاماتتىق ۇستانىمى مەن ساياسي كوزقاراسىن ايعاقتاپ بەرگەنىن, حالىقارالىق زاڭ نورمالارىندا ساي وتكەن ماڭىزدى ناۋقانعا قاتىستى ەشقانداي بۇرمالاۋشىلىقتاردىڭ بولماعانى شەتەلدىك باقىلاۋ ميسسيا وكىلدەرى تاراپىنان دا قۋاتتالعانىن مالىمدەدى. سايلاۋدا جاستار دا ازاماتتىق ۇستانىمەن ەرەكشەلەنىپ, وتان الدىنداعى جاۋاپكەرشىلىكتەرىن ءىس جۇزىندە كورسەتە بىلدى.
فورۋم «قىزىلجار» «FRT دۋمان KZ», «سامعاۋ», «زابياكي» سەكىلدى تانىمال ونەر توپتارى مەن ءانشى-جىرشىلاردىڭ كونتسەرتتىك باعدارلاماسىنا ۇلاستى. اسەم اۋەن كوپكە دەيىن قىزىلجار اسپانىندا قالىقتاپ تۇردى.
ءومىر ەسقالي.
دەرەك, سۋرەت: egemen.kz
