كوللاج: اقوردا ءباسپاسوز قىزمەتى
قازاقستان پرەزيدەنتى ستراتەگيالىق سەرىكتەستىك رۋحىندا دامىپ كەلە جاتقان ەكىجاقتى ساۋدا-ەكونوميكالىق جانە مادەني-گۋمانيتارلىق ىنتىماقتاستىقتىڭ قارقىنىن جوعارى باعالادى. وسى ورايدا قىركۇيەك ايىنىڭ سوڭىندا وتەتىن ازەربايجاننىڭ قازاقستانداعى مادەنيەت كۇندەرى حالىقتار اراسىنداعى بىرلىكتى بەكەمدەۋدە ماڭىزدى ءرول اتقاراتىنىنا توقتالدى.
بۇدان بولەك, قاسىم-جومارت توقاەۆ يلحام اليەۆتى ازەربايجانداعى پارلامەنت سايلاۋىنىڭ تابىستى وتۋىمەن قۇتتىقتاپ, ساياسي ناۋقاندى قازاقستاننىڭ وكىلدەرى دە باقىلاعانىن اتاپ ءوتتى.
مەملەكەت باسشىسى ازەربايجان مەن ارمەنيانىڭ بەيبىت كەلىسىمگە كەلۋى ءۇشىن قازاقستان تاراپىنىڭ الداعى ۋاقىتتا دا الماتى الاڭىن كەلىسسوزدەرگە ۇسىنۋعا دايىن ەكەنىن راستادى.
ءوز كەزەگىندە يلحام اليەۆ باكۋدىڭ استانامەن ەكىجاقتى قارىم-قاتىناستىڭ بارلىق باعىتى بويىنشا ىنتىماقتاستىقتى ودان ءارى نىعايتۋ ءۇشىن كۇش-جىگەر جۇمساۋعا نيەتتى ەكەنىن جەتكىزدى.
اڭگىمەلەسۋ دوستىق راۋىشتە ءوتتى.
