نەپالدا بولعان ءزىلزالا قۇرباندارىنىڭ سانى 3 326 ادامعا جەتتى

استانا. 27 ءساۋىر. نەپالداعى جويقىن جەر سىلكىنىسى سالدارىنان قازا بولعانداردىڭ سانى كۇن ساناپ ارتۋدا. قازىرگى ۋاقىتتا ءزىلزالا قۇرباندارى 3326 ادامعا جەتتى. بۇل تۋرالى dni.ru حابارلادى. نەپال مەملەكەتىنىڭ توتەنشە جاعدايلار جونىندەگى ءمينيسترى رامشەۆار دانگال جەر سىلكىنىسىنەن كەم دەگەندە 6 600 ادام زارداپ شەككەنىن ايتتى. ەستەرىڭىزگە سالا كەتەيىك, 25 ءساۋىر كۇنى نەپالدا ماگنيتۋداسى 7,9 باللدى قۇراعان جەر سىلكىنىسى بولعان ەدى. مۇنداي جويقىن ءزىلزالا اتالعان ەلدە سوڭعى رەت 80 جىل بۇرىن تىركەلگەن. ءالى كۇنگە جەر استى دۇمپۋلەرى توقتاماي تۇر. ماماندار ءبىر تاۋلىك ىشىندە 3,5 مەن 6,9 بالل ارالىعىنداعى جەر سىلكىنىستەرىنىڭ 48 رەت قايتالانعانىن ايتتى. اتالعان تابيعات اپاتىنان نەپال استاناسى – كاتماندۋ قالاسى ەڭ كوپ زارداپ شەكتى. مۇندا مىڭداعان ادام قازا تاۋىپ, جۇزدەگەن ءۇي قيراپ قالدى. ماماندار قۇربان بولعانداردىڭ سانى ءالى ارتاتىنىن ايتۋدا. ءتىپتى ولار بۇل كورسەتكىشتىڭ كەم دەگەندە 8 000-عا دەيىن جەتۋى مۇمكىن ەكەنىن نازارعا الدى. قازىر الەمنىڭ بىرقاتار ەلىنەن نەپالعا گۋمانيتارلىق كومەكتەر جىبەرىلۋدە. تالعات رايىمبەك. دەرەك, سۋرەت: dni.ru.