مەملەكەت باسشىسى جەڭىمپازدار فورۋمىنا قاتىستى

استانا. 27 ءساۋىر. نۇرسۇلتان نازارباەۆ «سارىارقا» رەسپۋبليكالىق ۆەلوترەگىندە وتكەن جەڭىمپازدار فورۋمىنا قاتىستى. بۇل تۋرالى akorda.kz حابارلادى. مەملەكەت باسشىسى قازاقستاندىقتار سايلاۋدا تۇتاستىعى مەن بىرلىگىن تاعى دا پاش ەتكەنىن اتاپ ءوتتى. «بۇكىل قازاقستان كەشە ءبىر كىسىدەي داۋىس بەرۋگە كەلدى. مەن ازاماتتاردىڭ وتباسىلارىمەن, بالالارىمەن, نەمەرەلەرىمەن سايلاۋ ۋچاسكەلەرىنە كەلگەنىن كوردىم. بۇل ۇلكەن جاۋاپكەرشىلىك جۇكتەيدى, حالقىمىز ءوزىنىڭ تۇرمىسىن, ءال-اۋقاتىن جاقسارتىپ, بالالارىن تاربيەلەۋى جانە بولاشاققا سەنىممەن قاراۋى ءۇشىن نە ىستەۋ كەرەكتىگى تۋرالى كۇنى-ءتۇنى ويلانۋعا ماجبۇرلەيدى. – دەدى قازاقستان پرەزيدەنتى. نۇرسۇلتان نازارباەۆ ەل حالقى سايلاۋعا قاتىسۋ ارقىلى ساياسي مادەنيەتىنىڭ بيىك ەكەنىن كورسەتىپ, پرەزيدەنتكە عانا ەمەس, ءوز بولاشاعىنا دا داۋىس بەرگەنىن ايتتى. سونىمەن قاتار, ەلباسى پرەزيدەنتتىك سايلاۋدى ۇيىمداستىرۋعا جانە وتكىزۋگە بەلسەنە قاتىسقان بارشاعا راقمەت ايتتى. سونداي-اق, مەملەكەت باسشىسى سايلاۋدان كەيىن اۋقىمدى جۇمىس كۇتىپ تۇرعانىنا توقتالدى. «ءبىز قازاقستاندى يندۋستريالاندىرۋدى اياعىنا جەتكىزۋگە, بالاما ەكونوميكا قالىپتاستىرۋعا, ساپالى تابىس جانە كاسىبي بىلىكتىلىكپەن بايلانىستى جاڭا جۇمىس ورىندارىن اشۋعا ءتيىسپىز. «نۇرلى جول» باعدارلاماسىن جۇزەگە اسىرىپ, ەكونوميكالىق بايلانىستارىمىزدى بەلسەندىرۋ جانە ءترانزيتتى مەملەكەتكە اينالۋ ءۇشىن بۇكىل قازاقستاندى جولدارمەن قامتۋعا ءتيىسپىز. وسىنىڭ ءبارى – جاڭا كەزەڭ, ءسىز بەن ءبىز اتقارۋعا ءتيىستى اۋىر جۇمىس. مەن ەل الدىندا تۇرعان جاڭا مىندەتتەردى جۇزەگە اسىرۋدا بارىمىزگە تابىس تىلەيمىن», – دەدى قازاقستان پرەزيدەنتى. نۇرسۇلتان نازارباەۆ ىشكى جانە سىرتقى ساياساتتاعى نەگىزگى باسىمدىقتاردىڭ ساقتالاتىنىن ايتتى. «ءبىز ىشكى تاتۋلىقتى ساقتايمىز, سونداي-اق, وداقتاستارىمىز بەن سەرىكتەستەرىمىزدىڭ الدىنداعى مىندەتتەمەلەرىمىزگە ادال بولامىز. ءوز ىشىمىزدەگى كەلىسىمدى نىعايتىپ, ءبىزدىڭ وڭىردەگى جانە بۇكىل پلانەتاداعى بەيبىتشىلىككە اتسالىسامىز. بىزگە سەنەدى, سوندىقتان ءبىز قاقتىعىس بولعان جەردىڭ بارىندە قانتوگىستى توقتاتۋعا ۇندەيمىز. ءبىز كوپكونفەسسيالى جانە كوپەتنوستى ەلدىڭ تاتۋ ءومىر سۇرە الاتىنىن كورسەتىپ وتىرعان قازاقستاننىڭ تاجىريبەسىنە قاراۋعا شاقىرامىز», – دەدى مەملەكەت باسشىسى. سوڭىندا قازاقستان پرەزيدەنتى كورسەتىلگەن سەنىم ءۇشىن تاعى دا العىس ايتا وتىرىپ, قازاقستاندىقتارعا اماندىق, ەلىمىزگە تاتۋلىق پەن تىنىشتىق تىلەدى. ەلامان قوڭىر. دەرەك: akorda.kz. سۋرەت: ازامات اليەۆ.