فوتو: استانا اكىمدىگى
كەش شىمىلدىعى «التىن دومبىرا» ونەر مەكتەبىنىڭ كۇيشىلەرىنىڭ ورىنداۋىنداعى «ناۋاي» جانە «باشموتوي» كۇيىمەن اشىلدى.
ارى قاراي احمەت بايتۇرسىن ۇلىنىڭ اندەرى شىرقالىپ, كۇيلەرى ورىندالدى. سونداي-اق, كەشكە قاتىسىپ, ونەر كورسەتكەن قازاقستان رەسپۋبليكاسىنىڭ «دارىن» مەملەكەتتىك سىيلىعىنىڭ يەگەرى يبراگيم ەسكەندىر سياقتى انشىلەر كەش مەرەيىن اسىرسا, «جاستار تەاترى» ۇجىمى احمەتتىڭ ومىرىنەن ءبىر قيىق كورىنىس قويىپ جۇرتتى ءتانتى ەتتى.
ال كەشكە كەلگەن كورەرمەندەر ۇلت ۇستازىنىڭ ءالى دە اشىلماي جاتقان قىرلارىنىڭ كوپ ەكەنىن ايتادى.
«XX عاسىردىڭ باسىندا «قازاققا قىزمەت ەتپەي قويمايمىن» دەگەن ءاليحان باستاعان مەملەكەتشىل كوسەمدەر الاش بالاسىن بوستاندىققا جەتەلەدى. مىنە وسى جولدا ايانباي ەڭبەك ەتكەن تۇلعالاردىڭ ءبىرى جانە بىرەگەيى ول – احمەت بايتۇرسىن ۇلى. ول قازاقتىڭ ءالىپبيىن جاساپ بەردى. سونىمەن قاتار, ول ءان دە, كۇي دە شىعارعان تۇلعا. دەمەك ۇلت ۇستازى دەگەن اتقا ناعىز لايىقتى ادام بولىپ ءومىر ءسۇردى. ونىڭ قازاققا سىڭىرگەن ەڭبەگىنىڭ ۇشان تەڭىز ەكەنىن بولاشاق ءالى تالاي تالقىعا سالاتىن بولادى. ءبىر سوزبەن ايتقاندا احمەتتىڭ تۋعان كۇنى, ول قازاق ءتىلىنىڭ مەرەيتويى, ول الاش جۇرتىنىڭ كەۋدەسىن ماقتانىش كەرنەپ, رۋحىنىڭ كوتەرىلەتىن كۇنى», دەيدى تاريح عىلىمدارىنىڭ دوكتورى, پروفەسسور, قر كوركەم اكادەمياسىنىڭ اكادەميگى مارات ابسەمەت.
