ويمەن باسقارىلاتىن قۇرىلعى

«Synchron» – سال اۋرۋىنا شالدىققان ناۋقاس­تارعا سمارتفون مەن كومپيۋتەردى اقىلمەن باس­قارۋعا كومەكتەسەدى. دالىرەك ايتقاندا, مي-كومپيۋتەر ينتەرفەيسىن جاساۋمەن اينالىساتىن كومپانيا. ۇجىم ءوزىنىڭ نەيرو-كومپيۋتەرلىك ينتەرفەيسىن اقش-تاعى التى جانە اۋسترالياداعى ءتورت پاتسيەنتكە يمپلانتاتسيالاعان. بۇعان دەيىن «ستەنترود» (Stentrode) اتاۋىمەن تانىمال بولعان تەحنولوگيا «Open AI-ءدىڭ» سوڭعى شىققان «GPT-4o» مودەلىمەن بىرىكتىرىلگەن. ياعني تانىمال چاتتىڭ كومەگىمەن ادامدار ويىن بۇرىنعىسىنان جاقسىراق جەتكىزە الادى. تەحنولوگيا ناۋقاسقا اينالاداعى وقيعالاردى سيپاتتاۋعا, اڭگىمەگە ارالاسۋعا جاردەم بەرەدى.

ءبىر اي بۇرىن كومپانيا الەۋمەتتىك جەلىدە «Apple» كومپانياسىنىڭ «Vision Pro» گارنيتۋراسىمەن بىرىگىپ جۇمىس ىستەيتىنىن مالىمدەگەن. ءتىپتى ناۋقاسقا تاجىريبە دە جاسالعان. الەمدىك ءباسپاسوز بەتتەرىنە سۇيەنسەك, اميوتروفيالىق بۇيىرلىك سكلەروزبەن (ALS) اۋىراتىن امەريكالىق مارك ەسىمدى ازامات – بۇل قۇرىلعىنى پايدالانعان الەمدەگى العاشقى پاتسيەنت. دياگنوز قويىلعاننان بەرى دەنەسىنىڭ جانسىزدانۋىنا بايلانىستى ەركىن ءجۇرىپ-تۇرا المايتىن ول جاڭا تەحنولوگيانىڭ كومەگىنە جۇگىنگەن. ناتيجەسىندە, سمارتفونداعى فۋنكتسيالاردى ويىمەن ەركىن باسقارادى. كەرەك دەسەڭىز, فيلم تاماشالاپ, ويىن دا ويناي الادى. امەريكالىق CNBC تەلەار­ناسىنا بەرگەن سۇقباتىندا مارك كومپيۋتەرلىك ستارتاپ تۋرالى: «مەن ءۇشىن قۇرىلعىنى پايدالانۋ – تا­ۋەلسىزدىكتى سەزىنۋدىڭ تاعى ءبىر جولى», دەپ ايتقان ەكەن.

كومپانيانىڭ باس ديرەكتورى توماس وكسليدىڭ پىكىرىنشە, «Apple» كومپانياسىنىڭ «iOS» قول­جەتىمدى پلاتفورماسى ءوز توبىنداعى ەڭ جاقسى پلاتفورما. سوندىقتان كومپانيا بار نازارىن پاتسيەنتتەرگە «Apple» ەكوجۇيەسىندەگى قۇرىلعىلاردى باسقارۋ ءۇشىن كومەك­تەسۋگە اۋداردى.

نيۋ-يوركتەگى «Synchron» ۇجى­مىنىڭ جۇمىسى الەمدەگى مي-كوم­پيۋ­تەر ينتەرفەيسىن جاسايتىن جالعىز ستارتاپ ەمەس. بۇعان دەيىن يلون ماسكتىڭ «Neuralink» ءچيپى دە قوعامعا تانىستىرىلعان ەدى. دەسەك تە باسەكەلەستەردىڭ جوباسىندا ءوزارا ايىر­ماشىلىق بار. ماسەلەن, «Neuralink» ءچيپىن ورناتۋ ءۇشىن ناۋقاسقا ارنايى ءتىپتى, كۇردەلى وتا جاساۋ قاجەت بولادى. ال «Vision Pro» گارنيتۋراسىمەن جۇمىس ىستەۋ جەڭىلىرەك. مۇندا يمپلانت پاتسيەنتتىڭ مويىن قان تامىرى ارقىلى ەنگىزىلەدى. بۇل ميعا اشىق وپەراتسيا جاساۋ قاجەتتىلىگىن بولدىرمايدى. قۇرىلعى ميدىڭ قوزعالتقىش قىرتىسىنىڭ بەتىندەگى قان تامىرىنا جەتكىزىلەدى. ستەنت ءتارىزدى يمپلانت كەۋدە ايماعىنداعى تەرى استىندا ورنالاسقان انتەنناعا قوسىلادى. ال انتەننا نەيروندىق سيگنالداردىڭ باستاپقى دەرەكتەرىن جيناپ, ولاردى سىرت­قى قۇرىلعىلارعا جىبەرەدى.

سونىمەن سينحرون كومپانياسىنىڭ جاڭا ءونىمى پاتسيەنتتەرگە ەلەكتروندىق حاتتاردى جازۋ نەمەسە ماتىندىك حابارلامالارعا جاۋاپ بەرۋ سياقتى تاپسىرمالاردى ورىنداۋعا كومەكتەسەدى. ءبىر سوزبەن ايتقاندا, سويلەۋ مەن قوزعالۋ مۇمكىندىگى شەكتەۋلى ادامدارعا اينالاسىنداعى الەممەن بايلانىس ورنا­تۋعا مۇمكىندىك بەرەدى.

الايدا تەحنولوگيا قالىڭ بۇقاراعا قولجەتىمدى بولۋى ءۇشىن كومپانيا اقش-تىڭ ازىق-ت ۇلىك جانە ءدارى-دارمەك باسقارماسىنان (FDA) ماقۇلداۋ الۋى ءتيىس.

بي-فاتيما ەرالحانقىزى,

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى