كوللاجدى جاساعان قونىسباي شەجىمباي, «EQ»
ءبىلىم بەرۋ سالاسىنىڭ بارلىق دەڭگەيىنە زاماناۋي تەحنولوگيالاردى ەنگىزۋ ءبىلىم الۋشىلاردىڭ قاجەتتىلىكتەرى مەن مۇددەلەرىنە باعىتتالۋى قاجەت. بۇگىنگى وقۋشىلاردىڭ تۇرعىلىقتى جەرى مەن الەۋمەتتىك ورتاسىنا قاراماستان ساپالى ءبىلىم الۋىنا قولايلى جاعداي جاساۋدىڭ وڭتايلى قۇرالىنىڭ ءبىرى – ءبىلىم ۇدەرىسىن تسيفرلاندىرۋ.
ەلىمىزدەگى مەكتەپتەردىڭ 74%-ى اۋىلدىق جەردە ورنالاسقانىن ەسكەرسەك, ءبىلىم بەرۋ ۇردىسىندە تسيفرلاندىرۋ يگىلىگىن پايداعا جاراتۋ اۋىل جانە قالا مەكتەپتەرىنىڭ ايىرماشىلىعىن ەداۋىر قىسقارتادى.
ى.التىنسارين اتىنداعى ۇلتتىق ءبىلىم اكادەمياسى اۋىلدىق شاعىن جيناقتى مەكتەپتەردىڭ وقۋ ۇدەرىسىنە تسيفرلىق تەحنولوگيالاردى ەنگىزۋ بويىنشا رەسپۋبليكالىق جوبالاردى ىسكە اسىرۋعا بەلسەندى اتسالىستى. ناقتى ايتقاندا, 2023-2024 وقۋ جىلىندا ى.التىنسارين اكادەمياسى وقۋ-اعارتۋ مينيسترلىگى جانە «قازاقستان حالقىنا» قايىرىمدىلىق قورىنىڭ قولداۋىمەن «تسيفرلىق تەحنولوگيالاردى پايدالانىپ اقتوبە وبلىسىنىڭ شاعىن جيناقتى اۋىل مەكتەپتەرىنىڭ الەۋەتىن دامىتۋ» قاناتقاقتى جوباسىن جۇزەگە اسىرۋعا قاتىستى. اكادەميانىڭ ادىسكەر عالىمدارى اقتوبە وڭىرىندەگى قاناتقاقتى جوباعا وقۋ-ادىستەمەلىك كومەك پەن عىلىمي-ادىستەمەلىك قولداۋ كورسەتتى. اقتوبەلىك ۇستازدارعا وقىتۋ سەمينارلارى, فاسيليتاتسيالىق سەسسيالار وتكىزىپ, ولاردىڭ ساباقتارىنا قاتىسىپ, كەرى بايلانىس بەردى. سونىمەن قاتار قاشىقتان وقىتۋ جانە بىرىكتىرىلگەن سىنىپتارى بار مەكتەپتەردىڭ وقۋ ۇدەرىسىن ۇيىمداستىرۋ بويىنشا ادىستەمەلىك ۇسىنىمدار ازىرلەدى. اتالعان جۇمىستار ناتيجەسىندە شاعىن جيناقتى اۋىل مەكتەپتەرىنىڭ پەداگوگتەرى ساباق ۇستىندە ءبىلىم بەرۋ رەسۋرستارىن ءتيىمدى پايدالانۋ, وقۋ ماتەريالدارىن ازىرلەۋدە ءارتۇرلى تسيفرلى قوسىمشانى وڭتايلى قولدانۋ داعدىلارىن شىڭداپ, قاشىقتان وقىتۋ فورماتىندا ءبىلىم الۋشىلارمەن بەلسەندى قارىم-قاتىناس ورناتۋ ءادىس-تاسىلدەرى مەن باعالاۋ جۇرگىزۋدە تسيفرلى شەشىمدەردى پايدالانۋ تاجىريبەسىن مەڭگەردى. اقتوبە وبلىسىنىڭ تىرەك جانە شاعىن جيناقتى مەكتەپتەر پەداگوگتەرىنىڭ اراسىندا ءتيىمدى كوللابوراتسيا ورناپ, اۋىل مەكتەپتەرى پەداگوگتەرىنىڭ ورتاق پاندىك ادىستەمەلىك توپتارى قۇرىلىپ, ءتيىمدى وقىتۋ ادىستەرىن ەنگىزۋگە باعىتتالعان بىرلەسكەن جۇمىستارى ىسكە اسىرىلدى.
سونىمەن قاتار ى.التىنسارين اكادەمياسىنىڭ جەتەكشىلىك ەتۋىمەن سولتۇستىك قازاقستان وبلىسىندا وقىتۋ ۇدەرىسىن تسيفرلاندىرۋ جوباسى ءجۇردى. اتالعان جوبا اياسىندا شاعىن جيناقتى اۋىل مەكتەپتەرىنىڭ ءبىلىم الۋشىلارى تسيفرلىق ءبىلىم بەرۋ رەسۋرستارىنا قول جەتكىزدى, وبلىستىڭ تاجىريبەلى پەداگوگتەرىنەن ءبىلىم الدى, تسيفرلىق كەڭىستىكتە جۇمىس ىستەۋ داعدىلارىن قالىپتاستىردى, وقۋعا دەگەن ىنتالارى ارتتى. ال ءوڭىردىڭ ۇستازدار قاۋىمى قاشىقتىقتان ءبىلىم بەرۋ فورماتىندا وقىتۋ داعدىلارىن جەتىلدىرىپ, وزىق ءارى ۇزدىك تاجىريبەلەرىمەن الماسىپ, وقىتۋ ۇدەرىسىنە وزدەرىنىڭ يننوۆاتسيالىق تاسىلدەرىن ەنگىزۋ قۇزىرەتىن ۇشتادى.
اتالعان جوبالاردى ىسكە اسىرۋدىڭ ناتيجەسىندە ءبىز شاعىن جيناقتى اۋىل مەكتەپتەرى جانە مەكتەپ جۇرەگى – پەداگوگتەر قاۋىمىنىڭ ءبىلىم بەرۋ ساپاسىن جاقسارتۋدا تسيفرلىق تەحنولوگيالار يگىلىگىن ءتيىمدى پايدالانۋ وزگەرىستەرىنە دايىن ەكەنىنە كوزىمىز جەتتى.
ءبىزدىڭ اكادەميا عالىمدارى مەن قىزمەتكەرلەرى ورتا ءبىلىم بەرۋ سالاسىنا تسيفرلىق شەشىمدەردى ەنگىزۋ, ولاردىڭ ءبىلىم الۋشىلاردىڭ وقۋ جەتىستىكتەرىنە اسەرى, ءبىلىم بەرۋ ۇدەرىسىندە ۆيرتۋالدى جانە تولىقتىرىلعان شىندىقتى پايدالانۋدىڭ ادىسنامالىق, پسيحولوگيالىق-پەداگوگيكالىق جانە تەحنولوگيالىق اسپەكتىلەرى بويىنشا زەرتتەۋلەر جۇرگىزىپ جاتىر. سونىمەن قاتار پەداگوگيكالىق پراكتيكادا تسيفرلىق ءبىلىم بەرۋ رەسۋرستارى مەن جاساندى ينتەللەكت قۇرالدارىن پايدالانۋ بويىنشا ادىستەمەلىك ۇسىنىمدار ازىرلەپ جاتىر.
اسىلى, قازىرگى وتاندىق ورتا ءبىلىم بەرۋ جۇيەسىنىڭ وزەكتى ماقساتى – تسيفرلىق ءداۋىردىڭ تاۋەكەلدەرىنە توتەپ بەرەتىن جانە باسەكەگە قابىلەتتى تۇلەكتەردى دايارلاۋ. وسى ماقساتقا جەتۋ جولىندا ى.التىنسارين اكادەمياسى ورتا ءبىلىم بەرۋ سالاسىن تسيفرلاندىرۋ ترانسفورماتسياسىن عىلىمي-ادىستەمەلىك قولداۋ جۇمىسىن جالعاستىرا بەرەدى.
ءمادينا تىنىباەۆا,
وقۋ-اعارتۋ مينيسترلىگى ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى
