قىزىلوردا. 27 ءساۋىر. قازاق حاندىعىنىڭ 550 جىلدىعىنا ارنالعان قازاق كۇرەسىنەن قىزىلوردا وبلىستىق «التىن بەلبەۋ» ءتۋرنيرى مارەسىنە جەتتى. بۇل تۋرالى egemen.kz ءتىلشىسى حابارلادى.
«التىن بەلبەۋ» جارىسى ايدان استام ۋاقىتقا سوزىلدى. بوز كىلەمدەگى بالۋاندار ءۇش كەزەڭ بويىنشا ءتورت جاس دەڭگەيىندە سىنعا ءتۇستى. ەلدى مەكەندەردەن باستالعان بيىلعى جارىستىڭ اۋداندىق, قالالىق, وبلىستىق ىرىكتەۋ تۋرلارىنا بارلىعى 7 152 سپورتشى قاتىستى. جارىستىڭ ءۇشىنشى كەزەڭى – شەشۋشى سىنعا بايقوڭىر جانە قىزىلوردا قالالارى مەن اۋدانداردان 256 پالۋان قاتىستى.
ەڭ كىشى جاس ەرەكشەلىگى بويىنشا قىزىلوردا قالاسىنىڭ سپورتشىلارى جاقسى قىرىنان كورىندى. ال جاسوسپىرىمدەر اراسىندا قارماقشى, شيەلى, جاڭاقورعان اۋداندارى, جاستاردان قىزىلوردا قالاسىنىڭ سپورتشىلارى وزدەرىنىڭ مىقتىلىقتارىن بايقاتتى. ەرەسەكتەر اراسىندا قارماقشى اۋدانىنان كەلگەن پالۋاندار دا بىرنەشە جۇلدەگە قول جەتكىزدى.
تۇيە پالۋان سايىسىنا 22 سپورتشى قاتىستى. ولاردىڭ اراسىندا ارالدىڭ پالۋانى نۇرىم سالىمگەرەەۆ «سىر بارىسى» اتاندى. وعان «التىن بەلبەۋ» بەلدىگى مەن 1 ملن. 200 مىڭ تەڭگەنىڭ سەرتيفيكاتى تابىستالدى. «سىر ارلانى» اتاعىن يەمدەنگەن رۋسلان ابدىرازاقوۆقا (جالاعاش اۋد.) 700 مىڭ تەڭگەنىڭ سەرتيفيكاتى بەرىلسە, «سىر سۇڭقارى» – ايبەك سەرىكباەۆقا 300 مىڭ تەڭگە كولەمىندە سىياقى تابىستالدى.
سونداي-اق, ءار جاس ەرەكشەلىكتەرى بويىنشا 1, 2 جانە 3-ورىنداردى يەلەنگەن سپورتشىلار العىس حاتتارمەن ماراپاتتالىپ, ولارعا دا قارجىلاي سىيلىقتار بەرىلدى.
وسى سايىس قورىتىندىسى بويىنشا 5 شىلدە كۇنى استانا قالاسىندا قازاقستان پرەزيدەنتىنىڭ جۇلدەسى ءۇشىن وتەتىن «قازاقستان بارىسى» رەسپۋبليكالىق تۋرنيرىنە قىزىلوردا وبلىسىنان نۇرىم سالىمگەرەەۆ پەن رۋسلان ابدىرازاقوۆ قاتىساتىن بولدى.
ەرجان بايتىلەس.
دەرەك, سۋرەت: egemen.kz.
