سۋرەت: اشىق دەرەككوزدەن
بيىلعى جولداۋدىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى تاقىرىپپەن ۇسىنىلۋىنىڭ ءوزى ەل ەرتەڭىنە دەگەن سەنىمدى نىعايتىپ, مەملەكەت بولاشاعىنا دەگەن وپتيميستىك ۇمىتكە وت بەرىپ وتىر.
ساياسي قۇجاتتا وتىز جىلدان استام قولدانىستا بولعان بانك جۇيەسىن جەتىلدىرۋگە ارنالعان جاڭا زاڭ قابىلداۋ ماسەلەسى ورىندى كوتەرىلدى. سونىمەن قاتار ەلىمىزدىڭ ەكونوميكالىق الەۋەتىنىڭ بەرىك ىرگەتاسىن قالىپتاستىرۋ ماقساتىندا جاڭا سالىق كودەكسى اياسىندا مەملەكەتتىك بيۋدجەتتىڭ كىرىس بولىگىن ارتتىرا ءتۇسۋ جولدارىن دا قاراستىرۋ تۋرالى وتە ماڭىزدى تاپسىرمالار بەرىلدى.
پرەزيدەنت جولداۋدا بارلىق سالادا ينۆەستيتسيالىق احۋالدى جانە بيزنەس جۇرگىزۋگە قاجەتتى جاعدايدى جاقسارتۋ جولىندا ۇزدىكسىز جۇمىس جۇرگىزۋدى تاعى دا باسا ايتتى. ونىڭ ىشىندە اگروونەركاسىپ كەشەنىنە ينۆەستيتسيا تارتۋ وتە ماڭىزدى مىندەت ەكەنىنە ايىرىقشا توقتالدى.
پرەزيدەنت: ء«بىر سوزبەن ايتساق, ادىلەتتى قازاقستان قۇرىلىپ جاتىر. مۇنىڭ ءبارى, ەڭ الدىمەن, حالىقتىڭ قالاۋىمەن جاسالۋدا. سوندىقتان ءبىز العان بەتىمىزدەن قايتپايمىز, باعىتىمىزدان تايمايمىز», دەپ مەملەكەتتىك دامۋ ساياساتىنىڭ ناقتى جولدارىن ايقىنداپ بەردى. سونىمەن قاتار وتكەن جىلى باستالعان «اۋىل اماناتى» جوباسىنىڭ تابىستى ناتيجەلەرىنە كەڭىنەن توقتالىپ, ەندىگى جەردە وسى جوبا اياسىندا تاعى ءبىر جاڭا ءتاسىلدى, ياعني «تاۋار نەسيەسىن» بەرۋ ماسەلەسىن قاراستىرۋ قاجەتتىگىن كورسەتە كەلە, «Amanat» پارتياسىنىڭ باستاماسىمەن جامبىل وبلىسى مەركى اۋدانىندا جۇزەگە اسىرىلىپ جاتقان وسى وڭ تاجىريبەنى باسقا دا ايماقتارعا تاراتۋدى ويلاستىرۋى كەرەكتىگىن ۇكىمەت پەن اكىمدەرگە مىندەتتەدى.
سونداي-اق مەملەكەت باسشىسىنىڭ 2025 جىلدى جۇمىسشى ماماندىقتارى جىلى دەپ جاريالاۋى قوعام ىشىندە ۇلكەن سەرپىلىس تۋعىزارى اقيقات. ويتكەنى ەلىمىزدىڭ بارلىق سالاسى قازىرگى تاڭدا ورتا كاسىبي ماماندار جەتىسپەۋشىلىگىن سەزىنىپ وتىر. ال بۇل ماسەلەنىڭ تەحنيكالىق جانە كاسىبي ءبىلىم جۇيەسىن تابىستى رەفورمالاۋ ارقىلى وڭ شەشىمىن تابارىنا كۇمان كەلتىرۋگە بولمايدى. جالپى, «ادال ازامات – ادال ەڭبەك – ادال تابىس» قاعيداتى ارقىلى ەڭبەك ادامىنا قاشاندا قۇرمەت, سىي كورسەتىپ, بيىككە كوتەرۋ بۇگىنگى ادىلەتتى قازاقستاننىڭ جارقىن كورىنىسى بولۋعا اپارار جاسامپاز جول ەكەنى داۋسىز.
بۇلاردان باسقا دا اسا ۇلكەن كەلەلى دە وزەكتى ماسەلەلەردى كوتەرگەن جاڭا جولداۋدىڭ تۇپكى ماقساتى ەل يگىلىگىن ارتتىرۋعا, قوعام تىنىشتىعى مەن ىنتىماقتى ساقتاۋعا نەگىزدەلگەن.
ەندىگى الدا تۇرعان اسا جاۋاپتى جۇمىس – جولداۋدا ايقىندالعان مەجەلى مىندەتتەردىڭ تابىستى ورىندالۋىنا بارىنشا ىقپال ەتۋ. جولداۋ سوڭىندا مەملەكەت باسشىسىنىڭ ء«ار ادامعا جانە بارشاعا بىردەي مۇمكىندىك بەرەتىن مەملەكەتتى, ياعني ادىلەتتى قازاقستاندى بولاشاق ۇرپاققا امانات ەتۋ – بارشامىزعا ورتاق مىندەت» ەكەنىن جاريا ەتۋى قۇجاتتا ناقتىلانعان ءاربىر مىندەتتىڭ بارشا وتانداسىمىزعا ورتاق ەكەنىن ايقىن بىلدىرەدى.
ساكەن ارۋباەۆ,
سەنات دەپۋتاتى
