كەزدەسۋدە مەملەكەت باسشىسىنىڭ وتباسى ساياساتى سالاسىنداعى جولداۋىن جۇزەگە اسىرۋ شارالارى, سونداي-اق ۇلتتىق قۇرىلتاي وتىرىسىندا قاسىم-جومارت توقاەۆتىڭ قوعامدا وتباسى قۇندىلىقتارىن ناسيحاتتاۋعا ارنالعان تاپسىرمالارىنىڭ ورىندالۋى تالقىلاندى.
وتباسى كۇنىن اتاپ ءوتۋدىڭ جاڭا تۇجىرىمداماسى وسى مىندەتتەردى شەشۋگە باعىتتالعان. 2-8 قىركۇيەك ارالىعىندا وتباسى كۇنىنە ارنالعان اپتالىق وتەدى. ءار كۇن ارنايى تاقىرىپقا ارنالادى. ونىڭ ىشىندە وتباسىلىق داستۇرلەر, نەكە جوسپارلاۋ, رەپرودۋكتيۆتى دەنساۋلىق, سانالى اتا-انا بولۋ, وتباسىلىق دەمالىس جانە باسقا دا تاقىرىپتار بار. مادەنيەت جانە اقپارات ۆيتسە-ءمينيسترى ەۆگەني كوچەتوۆ مۇنداي فورماتتىڭ مەرەكەنى كەڭ اۋقىمدا وتكىزۋگە جانە ونىڭ تيىمدىلىگىن ارتتىرۋعا مۇمكىندىك بەرەتىنىن اتاپ ءوتتى.
«بۇگىنگى تاڭدا وتباسى مەن نەكەنىڭ جاعىمدى ءيميدجىن قالىپتاستىرۋ, وتباسى قۇندىلىقتارىن ناسيحاتتاۋ, اتا-انالاردىڭ بالالاردى تاربيەلەۋدەگى جاۋاپكەرشىلىگىن ارتتىرۋ, بالالارىنىڭ قارت اتا-انالارىنا قامقورلىق جاساۋى – ۇلتتىق ماڭىزى بار مىندەتتەر», دەدى ەۆگەني كوچەتوۆ.
بريفينگتە وتباسى ساياساتىنىڭ نەگىزگى باعىتتارى, مەملەكەتتىك قولداۋ شارالارى, سونداي-اق «قازاقستاندىق وتباسىلار» ۇلتتىق بايانداماسىندا ۇسىنىلعان الەۋمەتتىك زەرتتەۋلەردىڭ قورىتىندىلارى تۋرالى دا ايتىلدى.
ساۋالناما ناتيجەلەرى بويىنشا رەسپوندەنتتەردىڭ 62,7%-ى وتباسىندا قامقورلىق, ءوزارا قۇرمەت كورسەتۋ جانە قولداۋ ماڭىزدى دەپ سانايدى. ودان كەيىنگى ورىندا – ماحاببات (43,2%), بالالار (38,7%) ماسەلەسى. سونداي-اق زەرتتەۋ بارىسىندا ەڭبەكقورلىق, ادالدىق جانە ۇلكەندەرگە قۇرمەت كورسەتۋ ەلىمىزدەگى وسكەلەڭ ۇرپاققا ۇيرەتىلەتىن باستى قۇندىلىقتار ەكەنى انىقتالدى.
