تۇڭعىش رەت تۋعان ەلىندە

اقتاۋ قالاسىندا سايلاۋدىڭ ساعاتى سوعىپ, حالىق ءبىرى كەلىپ, ءبىرى كەتىپ جاتقان شاقتا ۇلتتىق ناقىشتاعى  بەشپەت كيگەن جىلى ءجۇزدى اپاعا كوزىم ءتۇستى. جانىنا جاقىن بارىپ, سوزگە تارتۋدىڭ ءساتى ءتۇستى. اق جاۋلىقتى انا – وتكەن جىلى عانا شەت مەملەكەتتەن ورالعان قانداسىمىز, بىرنەشە پەرزەنت تاربيەلەپ-وسىرگەن اقبالا قياقباەۆا ەكەن. – اپا, داۋىس بەرۋگە ەرتەلەتىپ كەلىپسىز عوي... – ءيا, «ەرتە تۇرعان جىگىتتىڭ ىرىسى, ەرتە تۇرعان ايەلدىڭ ءبىر ءىسى ارتىق» دەمەكشى, ءاردايىم ەرتە تۇرىپ, شارۋامدى شارۋالاعان­دى دۇرىس كورەمىن. ال بۇگىنگى­دەي ەلىمىزدىڭ پرەزيدەنتىن سايلاۋ ساتىندە كۇن ۇزاق قوي دەپ ارقانى كەڭگە سالىپ جاتىپ الماي, ەرتەلەتىپ كەلگەن بەتىم ەدى. سويتسەم, ءوزىم داۋىس بەرەتىن 28-ءشى سايلاۋ ۋچاسكەسىنە ەڭ ءبىرىنشى كەلىپپىن. ءانۇران شىرقالىپ, سايلاۋدىڭ سالتاناتتى اشىلۋىنا كۋا بولدىم. – جاسىڭىز نەشەدە؟ ءوزىڭىز تۋرالى ايتىپ وتسەڭىز؟ – جاسىم 75-كە تاياپ قالدى. ومىرگە سەگىز بالا اكەلىپ, ولار­دىڭ بارلىعىن دا اياعىنان تۇر­عىزدىق. قۇدايعا شۇكىر, قازىر ارقايسىسى ءبىر ءۇي, نەمەرەلەر ءوسىپ كەلەدى. بۇعان دەيىن وتباسىمىز قا­راقالپاقستاندا تۇرىپ كەلگەن بولاتىن. ەرجەتكەن بالالاردىڭ الدى بىرىنەن سوڭ ءبىرى قازاقستانعا قونىس اۋدارىپ, اتا جۇرتتا شاڭىراق كوتەرە بەردى. ەڭ سوڭىندا وتكەن جىلى ءوزىمىز دە كەلدىك. قازاقستاننىڭ ازاماتى, اقتاۋ قالاسىنىڭ تۇرعىنى رەتىندە بيىل اتامەكەنىمىز – قازاقستاننىڭ سايلاۋىنا العاش رەت قاتىسىپ, داۋىس بەرۋ قۋانىشىنا يە بولىپ تۇرمىن. – دەمەك, ءوز تاڭداۋىڭىزدى جاسادىڭىز عوي؟ – «سىرت كوز – سىنشى» دەيدى عوي اتام قازاق, ءىشى-باۋىرىمىز تۋعان ەلىم دەپ ەلجىرەپ, قازاقستان تۋرالى سىرتتاي وقىپ-ءبىلىپ, ەستىپ جۇرەمىز عوي. تىنىشتىق, حالىق باقۋاتتى, بالالار ءوسىپ كەلەدى. ءزاۋلىم ۇيلەر بوي كوتەرىپ, جولدار سالىنۋدا. بارىنە شۇكىر دەۋىمىز كەرەك جانە بۇگىنگى تىرلىگىمىزگە قاناعاتپەن, بارعا دا, جوققا دا سابىرمەن قاراعانىمىز ءجون. قازاقستاننىڭ بولاشاعى بۇدان دا جاقسى بولاتىنىنا سەنەمىن. بىزدەن بۇرىن قازاقستانعا كەتكەن بالالارىمنىڭ ءبارى دە ءۇيلى-كۇيلى, جاعدايلى. بۇگىنگى كۇنىمىز­گە ريزامىز. تىنىشتىق ءۇشىن, بالا­لارىمنىڭ اماندىعى مەن بەرەكەسى ءۇشىن ءوز تاڭداۋىمدى جاسادىم. گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى. سۋرەتتى تۇسىرگەن سەرىك مايەمەروۆ.