ءسىبىر جاراسى: ۇيعىر اۋدانى قاتاڭ باقىلاۋعا الىندى

ۇيعىر اۋدانىندا 2024 جىلدىڭ 1 قىركۇيەك كۇنى ءسىبىر جاراسى اۋرۋىنىڭ بەلگىلەرى انىقتالدى دەگەن كۇدىكپەن 2 تۇرعىن اۋرۋحاناعا جاتقىزىلدى. ەكى ناۋقاسقا دا ءسىبىر جاراسى اۋرۋ مالدى سويعان كەزدە جۇققاندىعى انىقتالدى.

اۋدانداعى ەپيدەميولوگيالىق جاعدايعا بايلانىستى سول كۇنى جەدەل شتاب قۇرىلىپ, ناقتى شارالار اتقارۋ بويىنشا جەدەل وتىرىس ءوتتى. شتاب وتىرىسىنىڭ حاتتامالىق شەشىمىنە سايكەس ەڭ اۋەلى اۋرۋ وشاعى رەتىندە ۇلكەن اقسۋ اۋىلدىق وكرۋگى بەلگىلەنىپ, وكرۋگ اۋماعى جانە كورشىلەس ەلدى مەكەندەردەگى بارلىق ۇيلەردى دەنساۋلىق ساقتاۋ سالاسىنىڭ قىزمەتكەرلەرى مەن ۆەتەريناريا سالاسىنىڭ ماماندارى ارالاپ, تۇرعىندارعا الدىن الۋ شارالارى مەن دەنساۋلىقتارىنا قانداي دا ءبىر شاعىمدار بولسا دارىگەردىڭ كومەگىنە جۇگىنۋ قاجەتتىگى ەسكەرتىلىپ, ءتۇسىندىرۋ جۇمىستارى جۇرگىزىلدى. ال ۆەتەرينار ماماندار ءار ءۇيدىڭ قوراسىنداعى مالداردى تەكسەردى. سونىمەن قاتار قاڭعىباس يت, مىسىقتاردى اۋلادى.

العاشقى انىقتالعان تۇرعىننىڭ ۇيىندەگى, ياعني اۋرۋ وشاعىندا سويىلعان سيىردىڭ قالعان قالدىق تەرىلەرى جانە سويعان كەزدە قولدانعان قۇرال-سايماندار (بالتا, پىشاق, ەت شاپقان اعاش) بارلىعى اۋداندىق ۆەتەرينارلىق ستانتسياسىنىڭ جىلجىمالى ينسەنيراتورىندا كۇيدىرۋ ادىسىمەن جويىلدى. اۋرۋ وشاعىندا سانيتارلىق اعارتۋ شاراسى جاسالىپ, قازىرگى تاڭدا قوسىمشا قاداعالاۋ, باقىلاۋ جۇمىستارى كۇشەيتىلدى. ءسىبىر جاراسىنا قاتىستى جاعدايدى زەرتتەۋ ماقساتىندا ۆەتەرينارلىق قىزمەت جانە سانيتارلىق ەپيدەميولوگيالىق باقىلاۋ باسقارماسى سىرتقى قورشاعان ورتادان سىنامالار, توڭازىتقىشتاعى سويىپ العان مالدىڭ ەتى مەن باۋىرىنان, تەرىسىنەن سىنامالار الىپ, وبلىستىق زەرتحانالارعا جىبەرىلدى. اۋرۋ وشاعىنا, مال قوراسىنا, ءۇيدىڭ اۋلاسىنا تولىق زالالسىزداندىرۋ جۇمىستارى «دەزسترويلايت» پرەپاراتىنىڭ 1 پايىزدى ەرىتىندىسىمەن جۇرگىزىلدى.

بيىلعى جىلدىڭ 2 قىركۇيەك كۇنى اۋلالاردى ارالاۋ بارىسىندا ناۋقاستارمەن بايلانىستا بولعان 2 تۇرعىننان اۋرۋدىڭ بەلگىلەرى انىقتالىپ, اۋداندىق ورتالىق اۋرۋحانانىڭ جۇقپالى اۋرۋلار بولىمىنە وقشاۋلاندى. ولاردان ءتيىستى سىنامالار الىنىپ, زەرتحاناعا جولداندى.

قاۋىپتى ىندەتتىڭ الدىن الۋ شارالارىنا سايكەس جەرگىلىكتى اتقارۋشى ورگان شتاب جۇمىسىن جەدەل ۇيىمداستىرىپ, باقىلاۋ, قاداعالاۋ جۇمىستارىن كۇشەيتتى. اۋدان اۋماعىنان سىرتقا ەت جانە مالدى تاسىمالداۋ نەمەسە سىرتتان اۋدانعا تاسىمالداۋ ارەكەتتەرىنە اۋداندىق پوليتسيا قىزمەتكەرلەرىمەن شەكتەۋ قويىلدى.

اۋدان تۇرعىندارىنا ەت, ءسۇت ونىمدەرىن ساتىپ الۋ بارىسىندا تەكسەرىلگەن جانە رۇقسات قۇجاتتارى بار ارنايى بەلگىلەنگەن ورىنداردان الۋ قاجەتتىگى, دەنساۋلىقتارىنا شاعىم بولسا دارىگەردىڭ كومەگىنە جۇگىنۋ, مال ۇستايتىن تۇرعىندار مالدا اۋرۋ بەلگىلەرى نەمەسە باسقا دا اۋىتقۋلار پايدا بولسا بىردەن ۆەتەرينار ماماندارعا حابار بەرۋ قاجەتتىگى ەسكەرتىلگەن حابارلاندىرۋلار تاراتىلدى. سونداي-اق جالعان اقپاراتتار مەن الىپقاشپا پىكىرلەرگە قۇلاق اسپاي, رەسمي باق بەتتەرى مەن جەرگىلىكتى اتقارۋشى ورگاننىڭ رەسمي حابارلامالارى مەن الەۋمەتتىك جەلى پاراقشالارىندا بەرىلەتىن رەسمي اقپاراتتاردان مالىمەت الۋ قاجەتتىگى دە ەسكەرتىلدى.

جاعداي تولىقتاي اۋداندىق اكىمدىكتىڭ جانە باسقا دا قۇزىرلى مەكەمەلەر مەن قۇقىق قورعاۋ ورگاندارىنىڭ باقىلاۋىندا.

«ۇلكەن اقسۋ اۋىلدىق وكرۋگىنىڭ تۇرعىنىنان ءسىبىر جاراسىنىڭ بەلگىلەرى انىقتالۋىنا بايلانىستى ۇيعىر اۋدانى ۆەتەريناريالىق ءبولىمىنىڭ 14 اۋىلدىق وكرۋگ ۆەتەريناريالىق پۋنكتتەرىنىڭ 90 ۆەتەرينار مامانى كۇشەيتىلگەن رەجيمدە ۇلكەن اقسۋ اۋىلدىق وكرۋگىندەگى 139 جەكە اۋلالارعا اقپارتتىق ءتۇسىندىرۋ, اۋرۋعا كۇدىكتى مالداردىڭ بار-جوعىن انىقتاۋ جانە ءسىبىر جاراسىنا قارسى ەگۋ جۇمىستارىن جۇرگىزىپ جاتىر. ۇلكەن اقسۋ اۋىلىندا اۋرۋ جۇقتىرۋ ىقتيمالدىعى بار دەگەن كۇدىكپەن 47 يت پەن 4 مىسىق اۋلاندى.

اۋرۋ شىققان ءۇي وشاعىنا, مال قوراسىنا, اۋلاسىنا جالپى كولەمى 324 شارشى مەتر اۋماققا, ال جىرىق تۋما ۋچاسكەسىندە 141 باس ءىرى قارا مالعا ءسىبىر جاراسىنا قارسى ەكپە سالىنىپ, اتالعان ۋچاسكەدەگى 1800 شارشى مەتر قوراجايعا زالالسىزداندىرۋ جۇمىستارى «دەزسترويلايت» پرەپاراتىنىڭ 1 پايىز ەرىتىندىسىمەن جۇرگىزىلدى», – دەيدى اۋداندىق ۆەتەريناريالىق ءبولىمى باسشىسىنىڭ ورىنباسارى ەلنۇر دوسىمبەكوۆ.
اۋرۋدىڭ شىققان وشاعىن انىقتاۋ, تابۋ ءۇشىن, ۇلكەن اقسۋ اۋىلدىق وكرۋگى اۋماعىنداعى ەگىستىك القاپتان, جايىلىمنان جانە ال جىرىق تۋما ۋچاسكەسىندەگى قوراجاي ماڭىنان توپىراق, قي سىنامالارى الىنىپ زەرتتەۋگە جىبەرىلگەن.

بۇگىنگى كۇنگە اۋىلشارۋاشىلىق مالدارى اراسىندا كۇدىكتى اۋرۋ بەلگىلەرى تىركەلمەگەن, ەپيزووتولوگيالىق احۋال بىرقالىپتى, اتالعان جاعداي اۋداندىق ۆەتەريناريا ماماندارىنىڭ قاتاڭ باقىلاۋىنا الىنعان.

ۇيعىر اۋدانىندا ءسىبىر جاراسىنا كۇدىكتى جاعدايلاردىڭ انىقتالۋىنا بايلانىستى, ۆەتەرينارلىق-سانيتارلىق ۋاقىتشا شەكتەۋ شارالارى ەنگىزىلگەنمەن, كارانتين جاريالانباعانى تۋرالى الماتى وبلىسىنىڭ اكىمدىگى حاباردار ەتتى.

«ينفەكتسيانىڭ تارالۋىن بولدىرماۋ ماقساتىندا مال مەن اۋىلشارۋاشىلىق جانۋارلاردان الىناتىن ونىمدەردى ەكسپورتتاۋعا شەكتەۋ قويىلدى. ءسىبىر جاراسى ادامنان ادامعا جۇۇقپايتىندىقتان, ازاماتتاردىڭ ءجۇرىپ-تۇرۋىنا ەشقانداي شەكتەۋلەر قويىلعان جوق», دەلىنگەن.