فوتو: وكق
اتالعان شەشىم – قازاقى تازى تۇقىمىن حالىقارالىق دەڭگەيدە تولىق تانۋ, ياعني مويىنداۋ الدىنداعى نەگىزگى ءارى سوڭعى كەزەڭ.
«بۇگىن سىزدەردىڭ ەلدەرىڭىز ءۇشىن دە, ءبىز ءۇشىن دە تاريحي كۇن. FCI ستاندارتتاۋ جونىندەگى كوميسسياسى مەن FCI عىلىمي كوميسسياسى ۇزاق راسىمدەردەن كەيىن باس كوميتەتكە وسى تۇقىمدى تىركەۋدى ۇسىندى. قۇتتىقتايمىن! الداعى ۋاقىتتا سىزدەردى 10 جىلعا سوزىلاتىن جۇمىس كۇتىپ تۇر. وسى ۋاقىت ىشىندە يتتەردىڭ دەنساۋلىعىنا كوپتەگەن سىنامالار جاسالىپ, جاڭادان تۋعان تازى كۇشىكتەرىنىڭ ستاتيستيكاسى جۇرگىزىلەدى. بۇل دەرەكتەر FCI عىلىمي كوميسسياسى ءۇشىن قاجەت. يتتەردىڭ دەنساۋلىعى مەن جاي-كۇيى قازىرگى تاڭدا وتە ماڭىزدى ماسەلەلەردىڭ ءبىرى. FCI قازاقستانداعى تازى تۇقىمىنىڭ جۇيەلى دامۋىن باقىلاپ وتىرادى», دەدى FCI پرەزيدەنتى تاماش ياككەل.
ەستەرىڭىزگە سالايىق, قازاقى يت تۇقىمدارىن ساقتاۋ, سونداي-اق ولاردى حالىقارالىق دەڭگەيدە تانىتۋ ماسەلەسى مەملەكەت باسشىسىنىڭ تاپسىرماسى بويىنشا 2022 جىلدان باستاپ پرەزيدەنت ءىس باسقارماسىنىڭ قاراۋىنا الىنعان بولاتىن. وكىلەتتى ورگان رەتىندە ەكولوگيا جانە تابيعي رەسۋرستار مينيسترلىگى بەلگىلەنگەن.
سوڭعى 2 جىل ىشىندە ءتيىستى زاڭدارعا وزگەرىستەر ەنگىزىلىپ, تازى ستاندارتى بەكىتىلدى, عىلىمي زەرتتەۋلەر جاسالىپ, اسىل تۇقىمدى يتتەردىڭ بايقاۋلارى جانە كورمەلەر وتكىزىلدى.
2023 جىلدىڭ تامىزىندا قازاقستان كينولوگتارى وداعى حالىقارالىق كينولوگيالىق فەدەراتسيانىڭ بارلىق تالاپتارىن ورىنداپ, ونىڭ تولىققاندى مۇشەلىگىنە قابىلدانىپ, ۇلتتىق يت تۇقىمدارىن جاريالاۋ قۇقىعىنا يە بولدى.
«قازاقى تازىنىڭ بىرەگەيلىگىن ايقىندايتىن بۇلتارتپاس ايعاقتار ۇسىندىق. تاريحي زەرتتەۋلەردە 4 مىڭ جىلدان استام تاريحى بار يت تۇقىمىنىڭ شىعۋ تەگى مەن دامۋى تولىق قامتىلىپ, «قازاقى تازى» تۇقىمىنىڭ اتاۋى تۇپكىلىكتى بەكىتىلدى. ارنايى مونوتۇقىمدى يتتەر كورمەسىن ۇيىمداستىرىپ, FCI-دىڭ ستاندارتتاۋ جانە عىلىم كوميسسياسىنىڭ مۇشەلەرى تازى تۇقىمىنا جاتاتىن 100 ءيتتى زەرتتەۋىنە مۇمكىندىك تۋعىزدىق. وسى ەڭبەكتىڭ ناتيجەلەرى نەگىزىندە بۇگىن FCI باس كوميتەتىنىڭ ءبىراۋىزدان قابىلداعان شەشىمىمەن قازاق تازىسى رەسمي تۇردە الەمدىك دەڭگەيدە تانىلدى. تازى – ءبىزدىڭ مادەنيەتىمىز بەن تاريحىمىزدىڭ اجىراماس بولىگى, سوندىقتان ءبىز ۇلتتىق يت تۇقىمىن ساقتاۋ ءارى ناسيحاتتاۋ ءۇشىن بار كۇشىمىزدى سالۋىمىز كەرەك. بۇل كۇن شەجىرەدە تاريحي كۇن رەتىندە قالاتىنىنا سەنىمدىمىز», دەدى قازاقستان كينولوگتارى وداعىنىڭ پرەزيدەنتى باۋىرجان سەرىكقالي.
