فوتو: قورعانىس مينيسترلىگى
پرەزيدەنتتىڭ قازاقستان حالقىنا جولداۋىندا ەلىمىزدىڭ كادرلىق الەۋەتىن دايەكتى تۇردە ارتتىرۋ جانە بولاشاق ماماندىقتارى بويىنشا ماماندار دايارلاۋ مىندەتى قويىلدى. بۇل «جاساندى ينتەللەكت» تەحنولوگيالارى مەن جۇيەلەرىنىڭ ءار ءتۇرىنىڭ قارقىندى دامۋىمەن سيپاتتالاتىن اسكەري سالاعا دا قاتىستى.
قورعانىس ۆەدومستۆوسىنىڭ باسشىسى قارۋلى قاقتىعىستاردىڭ ەرەكشەلىكتەرىنە توقتالىپ, مۇندا بۇگىندە جاڭا تەحنولوگيالار, ەلەكتروندى كۇرەس جۇيەلەرى, سوققى بەرۋشى جانە كومەكشى قۇرالداردى روبوتتاندىرۋ, سونداي-اق اسكەر بولىمشەلەرىن لوگيستيكالىق قولداۋ شەشۋشى ءرول اتقاراتىنىن ايتتى.
«بۇگىندە قالىپتاسقان, ەسكى ادىسكە سۇيەنىپ, ەلدىڭ قورعانىس قابىلەتىن نىعايتۋدى ءىس جۇزىندە شەشۋ مۇمكىن بولا بەرمەيتىنى بەلگىلى بولىپ وتىر. سوڭعى جىلدارى ءتۇرلى سوعىستار مەن اسكەري قاقتىعىستار بولدى. تەز وزگەرەتىن جاعداي دالەلدەنبەگەن قاعيدالاردان الشاقتاپ, ولاردىڭ نەگىزىندە قارۋلى تەكەتىرەستىڭ نىساندارى مەن ادىستەرىنە جان-جاقتى تالداۋ جۇرگىزۋدى, تۋىندايتىن قاۋىپ-قاتەرلەر مەن سىن-تەگەۋرىندەرگە دەن قويۋدىڭ جاڭا تاسىلدەرى مەن ادىستەرىن ازىرلەۋدى تالاپ ەتەدى», دەدى قورعانىس ءمينيسترى.
ول مەملەكەتتىڭ قاۋىپسىزدىگىن قامتاماسىز ەتۋ ماسەلەلەرىن شەشۋدە كلاسسيكالىق اسكەري عىلىمدا قالىپتاسقان تاسىلدەردى قايتا ويلاستىرۋ قاجەتتىلىگى تۋىنداعانىن اتاپ ءوتتى.
«وسى ۇردىستەردى ەسكەرە وتىرىپ, اسكەري ءبىلىم بەرۋ رەفورماسى جۇرگىزىلۋى, پروفەسسورلىق-وقىتۋشىلار قۇرامىنىڭ كاسىبي دەڭگەيى مەن قۇزىرەتتىلىگى, سونداي-اق اسكەري پەداگوگتاردىڭ مارتەبەسى ارتتىرىلۋى ءتيىس. اسكەري كادرلاردى دايارلاۋ جۇيەسىنىڭ ءوزى يكەمدى جانە ءتيىمدى بولۋى, مەملەكەتتىڭ قازىرگى اسكەري ۇيىمىنىڭ قاجەتتىلىكتەرى مەن مىندەتتەرىنە جاۋاپ بەرۋى كەرەك. ول اسكەري قۇرىلىستىڭ پەرسپەكتيۆالىق مىندەتتەرىمەن, وعان قوسا جاڭا بۋىن سوعىستارىنىڭ سيپاتىن بولجاۋمەن بايلانىستى بولۋى قاجەت», دەدى ۆەدومستۆو باسشىسى.
گەنەرال-پولكوۆنيك رۋسلان جاقسىلىقوۆ اسكەري پەداگوگتار الدىندا سويلەگەن سوزىندە عىلىمي جانە عىلىمي-پەداگوگيكالىق كادرلاردى دايارلاۋ, بەيىندى اسكەرلەرمەن ءوزارا ءىس-ارەكەتكە جوسپارلانعان وقۋ باعدارلامالارىنىڭ مازمۇندىق بولىگىن جاڭعىرتۋ, كاسىبي جانە اكادەميالىق ۇتقىرلىق نىساندارىن ەنگىزۋ, كەيبىر باسشىلىق قۇجاتتاردى قايتا قاراۋ سىندى باسىمدىقتارعا توقتالدى.
قورعانىس ءمينيسترى قازىرگى زامانعى اسكەري عىلىمسىز جانە اسكەري ءبىلىم بەرۋدىڭ ناقتى قۇرىلعان جۇيەسىنسىز, بولجام جوسپارسىز جانە عىلىمي نەگىزدەلگەن شەشىمدەر قابىلداماي, مەملەكەتىمىزدىڭ اسكەري قاۋىپسىزدىگىن قامتاماسىز ەتۋدىڭ قازىرگى زامانعى تالاپتارعا جاۋاپ بەرەتىن جۇيەسىن قۇرا المايتىنىمىزدى اتاپ ءوتتى.
بۇدان وزگە ول قۇقىقتىق ءتارتىپ پەن اسكەري ءتارتىپتى قامتاماسىز ەتۋگە, قاۋىپسىزدىك شارالارىن قاتاڭ ساقتاۋعا, جەكە قۇرامنىڭ ءومىرى مەن دەنساۋلىعىن ساقتاۋعا ەرەكشە نازار اۋداردى.
سوڭىندا قورعانىس ءمينيسترى جوعارى وقۋ ورىندارىنىڭ جەكە قۇرامىنا مەملەكەتتىڭ اسكەري قاۋىپسىزدىگىن نىعايتۋ مۇددەسىندە جوعارى بىلىكتى كادرلاردى دايارلاۋدا تابىس تىلەدى.
