سۋرەتتەردى تۇسىرگەن – اۆتور
600 ورىندىق جاڭا مەكتەپ ەكى اۋىسىمدا 1200 وقۋشىعا ءبىلىم بەرۋگە الەۋەتتى. ءۇش قاباتتى ءبىلىم ورداسىنىڭ لەنتاسى قيىلعان سوڭ وقۋشىلار مەن اتا-انالار, ارنايى شاقىرىلعان قوناقتار سپورت زالعا ءوتىپ, سالتاناتتى جيىنعا قاتىستى. ءانۇران شىرقالدى, باتا بەرىلدى, كوپشىلىكتىڭ اق تىلەگى اقتارىلدى.
– قالامىزدا جاڭا شاعىن اۋداندار سالىنىپ, ينفراقۇرىلىم زامانعا ساي جاسالىپ جاتىر. مىنە, جاڭا مەكتەپ اشىلدى. مەملەكەت تاراپىنان وقۋشىلاردىڭ ءبىلىم الۋىنا جالپى جاعداي جاسالدى. جىل سوڭىنا دەيىن زايسان اۋدانى مەن جاڭا بۇقتىرما كەنتىندە تاعى ەكى مەكتەپ اشىلادى. سونداي-اق جەتى بىردەي «جايلى مەكتەپ» قۇرىلىسى قارقىن الادى. مۇنىڭ ءبارى ەل ەرتەڭى ءۇشىن ىستەلىپ جاتىر, – دەدى وبلىس اكىمىنىڭ ورىنباسارى ەربول نۇرعاليەۆ.
رەسمي جيىننان كەيىن جاڭا مەكتەپكە قۇتتى بولسىن ايتىپ كەلگەن قوناقتار ءبىلىم وشاعىن ارالاپ, زاماناۋي جابدىقتالعان كابينەتتەردى كوردى. ءبىرىنشى قاباتتىڭ وزىندە ينكليۋزيۆتى ءبىلىم بەرۋگە ارنالعان كابينەت, ءۇش شەبەرحانا, راديو ورتالىق, سەنسورلىق بولمە, سپورت زال, سونداي-اق بەس بىردەي وقۋ كابينەتى ورنالاسقان. مەكتەپتىڭ اكىمشىلىك قىزمەتكەرلەرى دە ءبىرىنشى قاباتتا وتىرادى. ال ەكىنشى قاباتتا مۇراعات, كىتاپحانا, روبوتتەحنيكا كابينەتى, زەرتحاناسى جانە 16 وقۋ كابينەتى بار. مۇعالىمدەر بولمەسى مەن اكت زالى دا وسى قاباتتا. زەرتحانالىق جۇمىستارعا ارنالعان ءۇش كابينەت ءۇشىنشى قاباتتان قاراستىرىلعان. بارلىعى 32 وقۋ كابينەتى, 4 زەرتحانا, 3 شەبەرحانا بار. مۇندا 8 – باستاۋىش سىنىپ, 10 – ورتا بۋىن, 4 – جوعارى بۋىن جانە ەكەۋى مەكتەپالدى دايارلىق سىنىبىندا ءبىلىم الادى. ايتا كەتەيىك, بارلىق كابينەت جيھازبەن, 28 پانەلدى تاقتامەن جانە كوپفۋنكتسيونالدى پرينتەرمەن جابدىقتالعان. بالاسى زامان تالابىنا ساي مەكتەپتە ءبىلىم الاتىن قاي اتا-انا بولسىن, شىن قۋانىشتى شىعار.
– شىنىمدى ايتايىن, العاشىندا بۇل مەكتەپ ارالاس بولىپ كەتەر مە ەكەن دەگەن ۇرەي بولدى. قازاق كوپ شوعىرلانعان اۋدانعا ارالاس مەكتەپتىڭ قاجەتى قانشا دەپ ارىز-ارمانىمىزدى جۋرناليستەرگە سان مارتە ايتتىق. ماسەلە كوتەرىلدى. باسشىلىققا جەتتى. ارمانىمىز ورىندالىپ, بالا-شاعامىز جاڭا, جايلى مەكتەپتىڭ تابالدىرىعىن اتتادى. مەملەكەت ولارعا ءبىلىم الۋعا بۇگىن جاعداي جاساسا, ەرتەڭ ولار مەملەكەتتىڭ دامۋىنا جاعداي جاسايدى. ەلىمىز امان بولسىن, – دەيدى ءبىرىنشى سىنىپتىڭ اتا-اناسى ايگۇل امانگەلدىقىزى.
جالپى, 2024-2025 وقۋ جىلىندا 9824 بالا ءبىرىنشى سىنىپقا باردى. الداعى ۋاقىتتا زايسان قالاسىندا 300 ورىندىق, جاڭا بۇقتىرما كەنتىندە 200 ورىندىق ءبىلىم مەكەمەسى اشىلادى. ال «جايلى مەكتەپ» جوباسىمەن جەتى مەكتەپتىڭ قۇرىلىسى ءجۇرىپ جاتىر. اتاپ ايتساق, وسكەمەندە 1500 ورىندىق ءۇش مەكتەپ, ريددەردە 600 ورىندىق ءبىر مەكتەپ, شەمونايحا اۋدانىندا 300 ورىندىق ءبىر جانە گلۋبوكوە اۋدانىندا 600 ورىندىق ەكى مەكتەپ اشىلادى.
ايتقانداي, پرەزيدەنت تاپسىرماسىنا وراي شىعىستا باستاۋىش سىنىپ وقۋشىلارى تەگىن تاماقتانادى. الەۋمەتتىك جاعىنان از قامتىلعان وتباسىلاردىڭ وقۋشىلارى دا مەكتەپتە تەگىن تاماقپەن قامتاماسىز ەتىلگەن. جالپى, ايماقتا 4,6 مىڭ بالانى مەكتەپكە كۇندەلىكتى تاسىمالداۋعا 126 اۆتوبۋس قىزمەت كورسەتەدى.
شىعىس قازاقستان وبلىسى
