مەملەكەت باسشىسى ازاماتتاردىڭ تۇرمىسىن جاقسارتۋدى كوزدەيتىن جۇيەلى ەكونوميكالىق وزگەرىستەرگە باسا نازار اۋداردى. پرەزيدەنت اتاپ وتكەن بارلىق توعىز باسىمدىق مەملەكەتتىك ساياساتتى ءدال وسى مىندەتتى ورىنداۋعا جۇمىلدىرادى.
جولداۋدا جۇزگە جۋىق ءتۇرلى باستاما, ۇسىنىس, تاپسىرما بار. مىسالى, سالىق جۇيەسىن مۇقيات ويلاستىرا وتىرىپ قايتا جۇكتەۋ, شاعىن جانە ورتا بيزنەستى قولداۋعا ارنالعان شارالار توپتاماسىن وڭتايلاندىرۋ, اۋىل شارۋاشىلىعى ونەركاسىبى ءۇشىن قولجەتىمدى نەسيە بەرۋ, ءادىل ءارى ءتيىمدى تاريف ساياساتىن جۇرگىزۋ, كولىك ينفراقۇرىلىمىن جاڭعىرتۋ, بىلىكتى ماماندار دايارلاۋ, جاساندى ينتەللەكتىنى دامىتۋ جانە جاپپاي تسيفرلاندىرۋ, ازاماتتاردىڭ قاۋىپسىزدىگىن جان-جاقتى قامتاماسىز ەتۋ سياقتى باسىمدىقتاردى ايرىقشا اتاپ وتەۋگە بولادى.
پرەزيدەنت قوعامدا ءبىر جىل بويى تالقىلانىپ جاتقان اتوم ەلەكتر ستانساسىن سالۋ ماسەلەسىنە قاتىستى رەفەرەندۋمدى وتكىزۋ كۇنىن بەلگىلەدى. بۇل رەفەرەندۋم – «حالىق ۇنىنە قۇلاق اساتىن مەملەكەت» تۇجىرىمداماسىنىڭ جانە ادىلەتتى قازاقستان يدەياسىنىڭ جۇزەگە اسىرىلىپ جاتقانىنىڭ تاعى ءبىر ايقىن دالەلى.
مەملەكەت باسشىسى حالىقتى الاڭداتىپ وتىرعان بىرقاتار وزەكتى ماسەلەگە ارنايى توقتالدى. ونىڭ ىشىندە ينتەرنەتتەگى الاياقتىق, جول اپاتتارى, اسكەردەگى ءتارتىپ, ناركوبيزنەسكە قارسى كۇرەس, مەديتسينالىق ساقتاندىرۋ جۇيەسىنىڭ كەمشىلىگى, پەداگوگيكالىق جانە مەديتسينالىق كادرلاردىڭ تاپشىلىعى, شاعىن جانە ورتا بيزنەس سالاسىن شەكتەن تىس مەملەكەتتىك باقىلاۋ, اۋىل شارۋاشىلىعى ستاتيستيكاسىن بۇرمالاۋ سياقتى تۇيتكىلدەر بار.
جولداۋداعى كوپتەگەن الەۋمەتتىك-ەكونوميكالىق باستاما مەملەكەت باسشىسى ۇلتتىق قۇرىلتايدىڭ وتىرىستارىندا ايتقان يدەولوگيالىق تۇجىرىمداردىڭ ءىس جۇزىندە جۇزەگە اسىرىلۋىنىڭ كورىنىسى بولعانىن اتاپ وتكەن ءجون.
پرەزيدەنت جولداۋىن جاريالاۋعا ارنالعان جيىنعا دەپۋتاتتار, مينيسترلەر مەن اكىمدەر عانا ەمەس, ءتۇرلى سالادا قاجىرلى ەڭبەگىمەن دارالانعان جۇمىسشىلار, سونداي-اق ۇلتتىق قۇرىلتايدىڭ, ايماقتىق قوعامدىق كەڭەستەردىڭ مۇشەلەرى قاتىستى. بۇل تاجىريبە جاڭا ساياسي داستۇرگە اينالىپ كەلەدى.
جالپى, جولداۋ كوپتەگەن كۇندەلىكتى مىندەتتەردى شەشۋ جانە ەلدى دامىتۋدىڭ ستراتەگيالىق ماقساتتارىنا جەتۋ جولدارىنا ارنالدى.
ەرلان قارين,
مەملەكەتتىك كەڭەسشى
