فوتو: senate.parlam.kz
سونداي-اق زاڭ مەن ءتارتىپتى قامتاماسىز ەتۋگە جانە ساياسي جۇيەنىڭ تيىمدىلىگىن ارتتىرۋعا ارنالعان ماڭىزدى مىندەتتەر دە بەلگىلەندى.
جولداۋدا بانكتەردىڭ ەكونوميكاعا كوبىرەك قارجى قۇيۋىنا جاعداي جاساۋ ماسەلەسىنە باسا ءمان بەرىلدى. قازىرگى تاڭدا وتاندىق بانكتەردىڭ تابىسى ايتارلىقتاي دەڭگەيدە ەكەنى بەلگىلى. ونى حالىقارالىق ساراپشىلار دا اتاپ وتكەن. سوعان قاراماستان بانكتەردىڭ بيزنەستى قارجىلاندىرۋ بەلسەندىلىگى تومەن بولىپ وتىر. وسىعان بايلانىستى مەملەكەت باسشىسى بۇل سالاداعى سالىق مولشەرىن ءادىل بەلگىلەۋ كەرەكتىگىنە نازار اۋدارىپ, بانكتەر تۋرالى جاڭا زاڭ قابىلداۋدى تاپسىردى.
سونىمەن قاتار وتاندىق بيزنەستىڭ ۇلتتىق ەكونوميكاداعى ۇلەسىن ايتارلىقتاي ۇلعايتۋعا مۇمكىندىك بەرەتىن شارالار كەشەنى قابىلداندى. بۇدان بىلاي ءوندىرىستى وركەندەتەمىز دەگەن ينۆەستورلارعا جانە تەرەڭ وڭدەلگەن ءونىمدى ەكسپورتقا شىعاراتىن كاسىپكەرلەرگە جەڭىلدىكتەر قاراستىرىلادى.
سالىقتىق اكىمشىلەندىرۋ ىسىندە دە بيزنەس قاۋىمداستىق ءۇشىن ءتيىمدى شەشىمدەر قابىلدانادى. وسىعان وراي سالىق كودەكسىن ازىرلەۋ پروتسەسى تىڭعىلىقتى ءارى بايىپتى جۇرگىزىلەدى. پرەزيدەنتىمىز وسىنداي جۇيەلى قولداۋ شارالارىنىڭ ارقاسىندا 2029 جىلعا قاراي ورتا بيزنەستىڭ ەل ەكونوميكاسىنداعى ۇلەسىن 15 پايىزعا جەتكىزۋدى مىندەت ەتىپ جۇكتەدى. قازىر بۇل كورسەتكىش – 7 پايىز شاماسىندا.
مەملەكەت باسشىسى جولداۋدا ەلىمىزدىڭ ونەركاسىپ الەۋەتىن تولىق پايدالانۋ ماسەلەسىنە دە ايرىقشا توقتالدى. بۇل باعىتتا اۆتوكولىك قۇراستىرۋ جانە مۇناي-گاز-حيميا سالاسىن ودان ءارى دامىتۋ جونىندەگى ناقتى جوبالارعا باسىمدىق بەرىلەدى.
ەلىمىزدە ينفراقۇرىلىم باعىتىندا قوردالانعان پروبلەمالار دا از ەمەس. بۇل, اسىرەسە, ەنەرگەتيكا جانە كوممۋنالدىق شارۋاشىلىق ءۇشىن وتە وزەكتى. سوندىقتان پرەزيدەنتىمىز وسى سالانى جاڭعىرتۋ جونىندەگى ۇلتتىق جوبانى جىل سوڭىنا دەيىن بەكىتۋدى تاپسىردى. بۇل قۇجات ازاماتتاردىڭ تۇرمىس ساپاسىن جاقسارتۋعا تىكەلەي ىقپال ەتەتىنى انىق.
قاسىم-جومارت كەمەل ۇلى قوعامدا قىزۋ تالقىلانعان اتوم ەلەكتر ستانساسىن سالۋ ماسەلەسىنە دە ەرەكشە ءمان بەردى. اەس سالۋعا قاتىستى جالپىۇلتتىق رەفەرەندۋم 6 قازاندا وتەتىنى بەلگىلى بولدى. بۇل – قوعامدىق پىكىردىڭ ۇستەمدىگىن كورسەتەتىن ماڭىزدى قادام. وسى رەتتە ازاماتتارىمىز بەلسەندىلىك تانىتادى دەپ سەنەمىز.
ساياسي جۇيەنى رەفورمالاۋ ءىسى دە نازاردان تىس قالمادى. بۇل باعىتتا سوڭعى جىلداردا اۋقىمدى رەفورمالار ۇزدىكسىز جۇزەگە اسىرىلعانى بەلگىلى. سول جۇمىستاردىڭ كەلەسى كەزەڭىندە اۋدان جانە وبلىستىق ماڭىزى بار قالالاردىڭ اكىمدەرى تىكەلەي سايلانادى.
سونداي-اق جولداۋدا كولىك-لوگيستيكا, اگروونەركاسىپ, ءبىلىم بەرۋ, دەنساۋلىق ساقتاۋ, تسيفرلىق دامۋ جانە تاعى باسقا سالالاردى جەتىلدىرۋگە قاتىستى ناقتى مىندەتتەر بەلگىلەندى. قوعامدا زاڭ مەن ءتارتىپ يدەولوگياسىن تەرەڭ ورنىقتىرۋ قاجەتتىلىگى دە ناقتى بەلگىلەندى.
وسى جانە باسقا دا مىندەتتەر مەن ماقساتتارعا قول جەتكىزۋ ءۇشىن ءتيىستى زاڭدار قابىلداۋ قاجەت. بۇل قاتاردا پرەزيدەنتىمىز اتاپ كورسەتكەن بانكتەر, قۇقىق بۇزۋشىلىقتاردىڭ الدىن الۋ, بۇقارالىق سپورتتى دامىتۋ, الەۋمەتتىك ساياسات, اكتيۆتەردى قايتارۋ تۋرالى زاڭدار بار.
مۇنىڭ ءبارى پارلامەنتكە ماڭىزدى مىندەتتەر جۇكتەيدى. وسىعان وراي سەنات ءماجىلىس پەن ۇكىمەتتەگى ارىپتەستەرىمەن جانە ساراپشىلارمەن بىرگە بەلسەندى جۇمىس ىستەيتىن بولادى.
مەملەكەت باسشىسى بەلگىلەپ بەرگەن باسىمدىقتاردى ساپالى ءارى ۋاقتىلى جۇزەگە اسىرۋ ەلىمىزدىڭ تۇراقتى ەكونوميكالىق دامۋىنا جانە ادىلەتتى قازاقستاننىڭ تۇعىرىن نىعايتا تۇسۋگە تىڭ سەرپىن بەرەدى دەپ سەنەمىز.
ماۋلەن اشىمباەۆ,
قر پارلامەنتى سەناتىنىڭ توراعاسى
