ءساندى دە ءماندى سايلاۋ

سايلاۋدى بايقاۋشىلار قاتارىندا ماڭعىستاۋ وبلىسىنا تمد ميسسياسىنان 9 ادام كەلدى. سايلاۋ بارىسىندا رەسەيدىڭ استراحان قالاسىنان كەلگەن حالىقارالىق بايقاۋشى, استراحان وبلىسى گۋبەرناتورى اكىمشىلىگى جەتەكشىسىنىڭ ورىنباسارى يگور ەۆشەۆسكيگە جولىعىپ, از-كەم تىلدەسۋدىڭ ءساتى ءتۇستى. – يگور اناتولەۆيچ, قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى ماڭعىستاۋدا قالاي وتۋدە؟ حالىقتىڭ قاتىسۋ بەلسەندىلىگى قانداي؟ – سايلاۋ ماڭعىستاۋدا وتە جوعارى دەڭگەيدە ۇيىم­داس­تىرىلعانىنا كۋا بولدىم. سايلاۋ ۋچاسكەلەرى قالاي جۇمىس جاساۋ كەرەك بولسا, ولار بارلىق جەردە ءدال سولاي, ياعني زاڭدىلىقتارعا ساي قىزمەت اتقاردى. تاڭەرتەڭگى ساعات 7.00-دە قازاقستان رەسپۋبليكاسىنىڭ انۇرانىمەن باستالعان سايلاۋ بىردەن قارقىن الىپ جۇرە بەردى. جەكسەنبى كۇنى ۇيقىدان كەشىرەك تۇراتىن ادامدار بار, سايلاۋ باستالىسىمەن ەشكىم بولا قويمايتىن شىعار دەپ ويلا­عانمىن, سويتسەم قاتەلەسىپپىن, «ءاپ» دەگەننەن 30-40 ادام كەزەككە تۇرعانىن كورگەندە تاڭعالدىم. ەكىنشى ءبىر مەن كۇتپەگەن جاعداي – سايلاۋعا, اسىرەسە, باستاپقى كەزدە جاستاردىڭ كوپ كەلۋى. مەن بۇل تۋرالى دا «تاڭەرتەڭگىلىك ۇلكەن كىسىلەر, قارتتار كوبىرەك كەلەتىن بولار» دەپ توپشىلاعانمىن. ماڭعىستاۋلىقتار سايلاۋعا وتە بەلسەندى اتسالىسىپ جاتىر. قاي ۋچاسكەگە بارسام دا, كەلىپ-كەتىپ جاتقان ادامدار. – سايلاۋدا وعاش وقيعالاردى بايقادىڭىز با؟ – جوق. ورەسكەل زاڭ بۇزۋ­شىلىقتار تۇرماق, كىشىگىرىم بۇزاقىلىقتار دا بولعان جوق. ادامدار ءتارتىپتى داۋىس بەردى, ولاردىڭ ارقايسىسىنان كوتەرىڭكى كوڭىل-كۇيدى اڭعاردىم. ءبىر-بىرىمەن امانداسىپ, «مەرەكەڭمەن!» دەپ قۇتتىقتاپ جاتىر. كوبىنە سايلاۋ ۋچاسكەلەرى مەكتەپتەرگە ورنالاسقاندىقتان, ونداعى كوميسسيا قۇرامىندا كوبىنە مۇعالىمدەر ءجۇر. كەلگەندەردى جىلى قابىلداپ, نە ىستەۋ كەرەكتىگىن ءتۇسىندىرىپ, جىميا جول سىلتەپ جۇرگەن ولارعا ريزامىن. استراحان قالاسىنىڭ كورشىسى – اقتاۋ اسەم قالا, ال ونىڭ تۇرعىندارى قوناقجاي, مەيىرىمدى ەكەن. وسى جولى وعان دا كوزىم جەتتى جانە ادامداردىڭ مۇنداي كوڭىلدى, جايلى جايدارى ءجۇزىن كورۋ تارتىمدى. كەيبىر سايلاۋ ۋچاسكەلەرىندە تۇسكە دەيىن اۋەن بولعان جوق, بىراق سايلاۋشىلاردىڭ جىلى ءجۇزى, اۋلادا ۇيىمداستىرىلعان جارمەڭكەلەر جان-جاقتى ءبارىبىر كوڭىلدى ەتىپ تۇردى. – راحمەت. اڭگىمەلەسكەن گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى.