فوتو: اشىق دەرەككوز
مەملەكەت باسشىسى ۇكىمەتتىڭ الدىندا تۇرعان ماڭىزدى مىندەتتى اتادى.
«2029 جىلعا قاراي ورتا بيزنەستىڭ ەل ەكونوميكاسىنداعى ۇلەسى 15 پايىزعا جەتۋى كەرەك. بۇل – ۇكىمەتتىڭ الدىندا تۇرعان ماڭىزدى مىندەت. قازىر بۇل كورسەتكىش – 7 پايىز شاماسىندا. جىل باسىندا مەن ورتا بيزنەستى قولداۋ ءۇشىن ناقتى شەشىمدەر قابىلداۋ جونىندە تاپسىرما بەردىم. ياعني, جان-جاقتى شارالار قولعا الىنۋى كەرەك ەدى. الايدا ءىس جۇزىندە ءالى دايىن ەمەس», دەدى پرەزيدەنت.
قاسىم-جومارت توقاەۆتىڭ ايتۋىنشا, ءار كاسىپكەر قولداۋدىڭ قانداي ءتۇرى بار ەكەنىن جانە وعان قالاي قول جەتكىزە الاتىنىن ەش قيىندىقسىز ءبىلىپ وتىرۋى قاجەت. سوندا شاعىن بيزنەس ورتا بيزنەس ساناتىنا وتۋگە مۇددەلى بولادى.
«بىزدە قازىر قولداۋ شارالارىنىڭ 100-دەن استام ءتۇرى بار. بۇدان بىلىكتى ماماننىڭ ءوزى شاتاسۋى مۇمكىن. سوندىقتان مەملەكەتتىك قولداۋ شارالارىنىڭ قانشالىقتى ءتيىمدى ەكەنىن مۇقيات تەكسەرىپ شىعۋ كەرەك. ۇسىنىلاتىن جەڭىلدىكتەردىڭ بيزنەس وكىلدەرىنە تۇسىنىكتى بىرىڭعاي ءتىزىمىن ازىرلەۋ قاجەت. شاعىن جانە ورتا بيزنەستى دامىتۋ ءۇشىن فينتەح تاسىلدەرىن پايدالانۋعا بولادى, بۇل ماسەلە بويىنشا ءتيىستى ۇسىنىستار بار», دەدى مەملەكەت باسشىسى.
سونىمەن قاتار, ەل پرەزيدەنتى اگروونەركاسىپ كەشەنىنە ينۆەستيتسيا تارتۋدىڭ وتە ماڭىزدى مىندەت ەكەنىن اتاپ ءوتتى.
«اگروونەركاسىپ كەشەنىنە ينۆەستيتسيا تارتۋ – وتە ماڭىزدى مىندەت. تاسقىن سۋدان بولعان قيىنشىلىقتارعا قاراماستان, ديقاندارىمىز ەگىن ەگۋ جۇمىسىن دەر كەزىندە اياقتادى. ولارعا زور ريزاشىلىعىمدى بىلدىرەمىن. بيىل ەگىس ناۋقانىنا ەكى ەسە كوپ قاراجات ءبولىندى. الايدا اگروونەركاسىپكە بولىنەتىن بۇكىل اقشانىڭ 70 پايىزى – مەملەكەت قارجىسى. بۇل سالاعا كوممەرتسيالىق بانكتەردىڭ قاراجاتىن دا تارتۋ قاجەت. ديقاندارعا ءوسىمى از نەسيە بەرۋ ءۇشىن مەملەكەتتىك قارجى ينستيتۋتتارىن سۋبسيديالاۋ شارالارى قولعا الىندى. بانكتەرگە قاتىستى وسىنداي تاجىريبەنى قولدانۋ كەرەك. مۇنىڭ ءبارى شارۋالاردى اينالىمعا قاجەتتى قاراجاتپەن شۇعىل قامتاماسىز ەتۋگە, سىبايلاس جەمقورلىق قاتەرىن ازايتۋعا جانە نەسيە الۋدى وڭتايلاندىرۋعا جول اشادى», دەدى مەملەكەت باسشىسى.
