داۋ

ماڭعىستاۋ وبلىسىنداعى مەكتەپ وقۋشىلارىن تاسىمالدايتىن كومپانيا ەكى ءتۇرلى داۋدىڭ ورتاسىندا قالىپ تۇر. ءبىرى – بىرنەشە ايلاردان بەرى جالاقى الا الماعان, وقۋشىلاردى تاسۋ ءۇشىن جالدانعان اۆتوبۋس جۇرگىزۋشىلەرىنىڭ شۋى بولسا, ەكىنشىسى – وسى ۋاقىتقا دەيىن اقشا بولمەي, سونىڭ سالدارىنان جۇرگىزۋشىلەردى بىرنەشە ايلار بويى جالاقىسىز قالدىرۋعا اكەلىپ سوقتىرعان اكىمدىكتەردىڭ ارەكەتى. مەملەكەتتىك تاپسىرىس بويىنشا جۇمىس ىستەيتىن كومپانيا  باسشىسى جەرگىلىكتى اتقارۋشى ورگاندار اقشانى اۋدارماعاندىعىن ايتادى.  ايتۋىنشا, وڭىردەگى بالالارى تاسىمالداناتىن 5 اۋىل اكىمدىگى بۇلارعا 70 ميلليون تەڭگە قارىز ەكەن. جۇرگىزۋشىلەر كومپانيا باسشىسىنان ايلىعىن تالاپ ەتسە, كومپانيا باسشىسى ءوز كەزەگىندە قوماقتى قارجىنى وتەۋى ءۇشىن ەندى جەرگىلىكتى شەندىلەردى سوتقا بەرمەك. 6 مىڭ وقۋشىنى تاسىمالدايتىن مەكەمەدە 57 اۆتوبۋس جۇرگىزۋشىسى بار بولسا, ولاردىڭ كەيبىرى  7 ايدان بەرى جالاقى الماعان. جۇرگىزۋشىلەردى كولىگىمەن بىرگە جالداپ وتىرعان مەكەمە جالاقى تولەۋدەن جالتارماعانمەن, قارجى تابا الماي داعدارۋدا. –       ومىرزاق ەلدى مەكەنى – 5 ميلليون, مۇنايلىداعى اتامەكەن – 22-23 ميلليون, باسقۇدىق – 11 ميلليون 900 مىڭ, اقشۇقىر – 33 ميلليون, سايىن اۋىلى 7 ميلليونداي قارىز, دەيدى كولىك كومپانيا­سىنىڭ ديرەكتورى مۇحتار قاتارباەۆ. ونىڭ ايتۋىنشا, اۋىلداردىڭ اراسىندا وقۋ جىلى باستالعالى ءبىر تيىن تولەمەگەندەر دە بار. اكىمدەرى ونىڭ سەبەبىن ءتۇسىندىرۋدى سۇراپ جازعان حاتقا جاۋاپ تا بەرمەگەن. كومپانيا باسشىلىعى اكىمدەر ۇستىنەن سوتقا ارىزدانۋدا. ال جۇرگىزۋشىلەر جوعارىعا جولداعان ارىزدارىنان ناتيجە بولماسا, اكىمدىك الدىنا بارىپ, نارازىلىق شەرۋىن وتكىزۋگە بەل بايلاپ وتىر. گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى.