الەمدىك ستاندارتتارعا ساي كەلدى

– دەيدى پرەزيدەنت سايلاۋى جونىندە حالىقارالىق بايقاۋشى يۋري ريابوۆ قازاقستاننىڭ باتىستاعى قاقپاسى – ورال وڭىرىندە پرەزيدەنت سايلاۋىنىڭ زاڭدىلىعىن ساقتاۋ جانە مولدىرلىگى مەن ادىلدىگىن قاداعالاۋ ءۇشىن مىڭنان استام بايقاۋشى تىركەلدى. ونىڭ بىرقاتارى  – حالىقارالىق بايقاۋشىلار. ءبىز كەشە سولاردىڭ ءبىرى يۋري ريابوۆتى اڭگىمەگە تارتقان ەدىك. – يۋري فەدوروۆيچ, بۇعان دەيىن قازاقستانداعى ەلەك­تورالدىق ناۋقانداردا بولىپ پا ەدىڭىز؟ پرەزيدەنت سايلاۋىنىڭ ءوتۋ بارىسى تۋرالى نە ايتاسىز؟ – جوق, ءبىرىنشى رەت بولىپ وتىرمىن. بىراق مەن بۇعان دەيىن تمد مەملەكەتتەرى اۋقىمىندا جانە ەۋروپا ەلدەرى مەن اقش-تا وتكىزىل­گەن پرەزيدەنتتىك ءجا­نە پارلامەنتتىك سايلاۋلارعا قاتىستىم. بۇل ءجايت مەنىڭ مۇلدەم تاجىريبەسىز ەمەستىگىمنەن حابار بەرە الادى عوي دەپ ويلايمىن. كەشە قازاقستاندا وتكىزىلگەن پرەزيدەنت سايلاۋىندا بىردەن كوزىم جەتكەن ءجايت, مۇندا جوعارى دەڭگەيدەگى سايلاۋلار وتكىزۋدە جان-جاقتى تاجىريبەلەر جيناقتالعانى. الەمدىك ستاندارتتارعا سايكەس پرەزيدەنت نەمەسە پارلامەنت سايلاۋىن وتكىزۋ قالپاقپەن سوعىپ الا قوياتىنداي وڭاي ءىس ەمەس. ءارى كەز كەلگەن مەملەكەت مۇنداي وزىق دەڭگەيگە قول جەتكىزە بەرمەيدى. دەگەنمەن, قازاقستاندى ءدال وسى تۇرعىدا تاني العانىمدى اشىق ايتا الامىن. – سوندا ءسىز ءۇشىن قازاق­ستانداعى پرەزي­دەنت سايلاۋ­ى كەزىندە ايرىقشا اسەر قال­دىر­عان, وي مەن كوڭىل تۇكپى­رىنەن بەرىك ورىن تەپكەن وڭ كورىنىستەر قانداي؟ – مەنى ءبىرىنشى ءتانتى ەتكەنى – قازاق­ستاندىقتاردىڭ ازاماتتىق بەلسەندىلىگى. كەز كەلگەن ەلدەگى سايلاۋ كەزىندە داۋىس بەرۋ ۇدەرىسى 12-13 ساعاتقا دەيىن سوزىلاتىنى انىق. ايتسە دە كورشىلەس ەل تۇرعىندارى ءالى دە ۋاقىت بار عوي دەپ ارقانى كەڭگە سالىپ جاتىپ الماي, دەنى سايلاۋ ۋچاسكەلەرىنە ەرتە كەلگەنى ءبىزدى قاتتى ءسۇيسىندىردى. ءتىپتى, بۇل كورىنىسكە ءارى قىزىعا, ءارى قىزعانا قاراعانىمدى دا جاسىرىپ قالعىم كەلمەيدى. ەڭ باستىسى, قانداي دا ءبىر بولماسىن بيلىك ورگاندارى تاراپىنان كۇشتەۋ مەن ىقپال جاساۋدىڭ ۇشقىنىن دا بايقاي المادىق. جۇرەك قالاۋىمەن جاسالعان قادامنىڭ عۇمىرى قاشاندا ۇزاق. قاشاندا ماڭگىلىك. مەن وسىنى اڭعاردىم. ءتىپتى, قازاقستانداعى پرەزيدەنت سايلاۋىنىڭ ۇيىمداستىرىلۋ دەڭگەيىنەن وزگەلەر ءۇشىن ءۇي­رەنەتىن ۇردىستەر دە مول ەكە­نىن بايقادىم. قىسقاسى, جا­ڭا قازاقستان ءوزىنىڭ دەربەس مەم­لەكەتتىلىگىنىڭ شيرەك عاسىرعا جۋىق تاريحىندا دە­­موكراتيالىق قاعيداتتار مەن الەمدىك ەلەكتورالدىق ستان­دارت­تارعا قول جەتكىزە بىلگەنىنەن كوزىمىز جەتتى. – قازاقستاننىڭ ەۋرازيالىق ەندىكتەگى قالاسى – ورال تۇر­عىندارىنا قاتىستى نە دەر ەدىڭىز؟ – تەڭىزدىڭ ءدامى تامشىسىنان بىلىنەدى دەمەي مە؟ مەنىڭ بۇعان دەيىن تۇتاستاي قازاقستاندىق ازاماتتاردىڭ ەلەكتوراتتىق بەلسەندىلىگىنە بايلانىستى پىكىرىم ورال تۇرعىندارىنا دا ورتاق ءارى تىكەلەي قاتىستى ەكەندىگىنە كۇمانىڭىز بولماسىن. – يۋري فەدوروۆيچ, شىنايى كوڭىلدەن ايتقان اق-ادال وي-پىكىرىڭىز ءۇشىن سىزگە كوپ راحمەت! اڭگىمەلەسكەن تەمىر قۇسايىن, «ەگەمەن قازاقستان». باتىس قازاقستان وبلىسى. سۋرەتتى تۇسىرگەن رافحات حالەلوۆ.