بۇل جاس ماماندار بۇگىندە مەملەكەتتىك قىزمەتتە ەڭبەك ەتىپ, ەلىمىزدىڭ دامۋ جولىندا ءوز ىزدەرىن قالدىرىپ كەلەدى. ونىڭ اراسىندا جاس تا بولسا باس بولىپ, باسشىلىق لاۋازىمداردا جۇرگەندەرى دە از ەمەس. كونستيتۋتسيامەن قۇرداس ساقشىنىڭ ءبىرى – وبلىستىق پد اقپاراتتاندىرۋ جانە بايلانىس باسقارماسىنىڭ باسشىسى, پوليتسيا كاپيتانى بەك شاميل.
– مەن اتا زاڭىمىز قابىلدانعان جىلى دۇنيە ەسىگىن اشقان ەكەنمىن. ەلىمىزدەگى باستى قۇجات – كونستيتۋتسيانىڭ ءتول قۇرداسىمىن. باقىتتى بالالىق شاعىمدى وتباسىمنىڭ ورتاسىندا الاڭسىز وتكىزدىم. بۇل ەلدەگى تىنىشتىق پەن تاۋەلسىزدىكتىڭ ارقاسى دەپ سانايمىن. ارمانىمدى ىسكە اسىرۋ باعىتىندا ىشكى ىستەر سالاسىنا قىزمەتكە ورنالاسىپ, بۇگىندە وسى قۇرىلىمنىڭ قازانىندا قايناپ, شىڭدالىپ ءجۇرمىن. الدىڭعى بۋىن اعالاردىڭ جولىن جالعاپ, جۇمىسىمداعى جاۋاپكەرشىلىكتى سەزىنەمىن. مەرەكە قارساڭىندا بارشاڭىزدى قۇتتىقتاپ, ەلىمىزگە اماندىق تىلەيمىن, – دەدى پوليتسيا كاپيتانى بەك شاميل.
راس, ەلدىڭ نەگىزگى زاڭى ەل حالقىنىڭ ەرىك-جىگەرىن, ولاردىڭ مەملەكەتتى دەموكراتيالىق, زايىرلى, قۇقىقتىق جانە الەۋمەتتىك مەملەكەت رەتىندە قۇرۋعا دەگەن ۇمتىلىسىن كورسەتەدى. ايتۋلى مەرەكەگە وراي ەرلىگىمەن, ەڭبەگىمەن كوزگە تۇسكەن پوليتسەيلەر دە ماراپاتتالدى. مەرەكە قارساڭىندا تۇركىستان وبلىسىنىڭ 180-نەن اسا ءتارتىپ ساقشىسى ماراپاتتالىپ, قىزمەت بابىندا قازا تاپقان پوليتسەيلەردىڭ انالارى مەن جارلارىنا دا سىي-قۇرمەت كورسەتىلدى.
جيىن ءبىرىنشى كەزەكتە قىزمەتتىك بورىشىن اتقارۋ كەزىندە قازا تاپقان پوليتسەيلەردىڭ انالارى مەن جۇبايلارىنا سىي-قۇرمەت كورسەتۋدەن باستالدى. جۇلدىزى ەرتە سونگەن پوليتسەيلەردىڭ تۋىستارىنا ەستەلىك سىيلىقتار مەن العىسحاتتاردى وبلىستىق پوليتسيا دەپارتامەنتىنىڭ باسشىسى مۇرات قابدەنوۆ تابىس ەتتى.
مەرەكەلىك ءىس-شارالاردا ۇمىتپاي, ەلەپ-ەسكەرىپ, قۇتتىقتاپ, شاقىرتۋ جىبەرىپ تۇراتىن پوليتسيا باسشىلىعىنا قازا تاپقان پوليتسەي مۇحتار داۋرەنبەكوۆتىڭ جۇبايى دينارا جيپسىباەۆا العىسىن جەتكىزدى.
سونداي-اق كونستيتۋتسيا كۇنى قارساڭىندا جەكە قۇرامعا اتا زاڭىمىزدىڭ جالپى تاريحى بەينەلەنگەن حرونيكالىق-دەرەكتى فيلم كورسەتىلدى. فيلم وتانعا سۇيىسپەنشىلىك, قىزمەتتىك بورىشقا ادالدىقتى قالىپتاستىرىپ, قىزمەتكەرلەردىڭ رۋحىن كوتەرۋ ماقساتىندا تۇسىرىلگەن. دەرەكتى ءفيلمدى تاماشالاعان ءتارتىپ ساقشىلارى تاۋەلسىزدىك العان جىلدان بۇگىنگى كۇنگە دەيىنگى ارالىقتا ەلىمىز ءجۇرىپ وتكەن جولدار, اتا زاڭىمىزدىڭ ورنىعۋى, ۇستەمدىگى تۋرالى حاباردار بولدى. ءىس-شارا سوڭى ەلىمىزگە تانىمال ونەرپازداردىڭ ءان شاشۋىمەن ۇلاستى. پوليتسەي ءانشى-ونەرلى قىزمەتكەرلەرمەن قاتار ساحنادا نۇرجان تولەنديەۆ, باقىتجان مۇستافاەۆ, «سەمسەر» توبىنىڭ جىگىتتەرى ءان شىرقاپ, كوپشىلىككە كوتەرىڭكى كوڭىل-كۇي سىيلادى. پوليتسيا گەنەرال-مايورى مۇرات قابدەنوۆ حالىق پەن ەلگە قىزمەت ەتۋدى وزىنە ازاماتتىق بورىش ساناعان ءتارتىپ ساقشىلارىن ماراپاتتارىمەن قۇتتىقتاي وتىرىپ, ەڭبەكتەرىنە تابىس, قىزمەتتە ابىروي تىلەدى.
راۋشان ناربەك,
جۋرناليست
تۇركىستان وبلىسى
