فوتو: favoritnr1.com
مەملەكەت باسشىسىنىڭ زاڭسىز قۇمار ويىندارمەن بايلانىستى قاۋىپ قاتەرلەردى بەيتاراپتاندىرۋ تۋرالى تاپسىرماسىن ورىنداۋ ماقساتىندا قما-نىڭ باستاماسىمەن ۆەدومستۆوارالىق كەزدەسۋ وتكىزىلىپ, زاڭسىز ونلاين قۇمار ويىندارعا جانە لۋدومانياعا قارسى كۇرەس ماسەلەلەرى تالقىلاندى.
اتالعان جيىنعا قارجى نارىعىن رەتتەۋ جانە دامىتۋ اگەنتتىگىنىڭ توراعاسى مادينا ابىلقاسىموۆا, قارجى ءمينيسترى ءمادي تاكيەۆ, تۋريزم جانە سپورت ءمينيسترى ەرمەك مىرجىقپاەۆ, ۇلتتىق بانك توراعاسىنىڭ ورىنباسارى اقىلجان بايماعامبەتوۆ, مادەنيەت جانە اقپارات ۆيتسە-ءمينيسترى قانات يسكاكوۆ قاتىستى.
قما توراعاسى دميتري مالاحوۆ جيىندى اشا وتىرىپ, قۇمار ويىندار مەن لوتەرەيا قىزمەتىن رەتتەۋگە باعىتتالعان بىرقاتار شارالاردىڭ قولدانىستاعى زاڭنامادا قاراستىرىلعانىن اتاپ ءوتتى.
ء«بىز بىرلەسىپ بۇل ماسەلەنى شەشۋ جولدارىن تالقىلاۋ ءۇشىن جينالدىق. بۇل قوعام مەن مەملەكەت ءۇشىن وتە ماڭىزدى جانە ءبىز بۇل سالادا شۇعىل ارەكەت ەتۋىمىز قاجەت», دەدى د.مالاحوۆ.
ايتا كەتەيىك, وتكەن جىلى قما مادەنيەت جانە اقپارات مينيسترلىگىمەن بىرلەسىپ, TikTok-تا جاپپاي كارتا ويىندارىن ۇيىمداستىرۋدىڭ الدىن الدى. 300-دەن استام ۇيىمداستىرۋشى اككاۋنتى انىقتالىپ, قۇقىققا قايشى كونتەنتتىڭ ەفيرىن جەدەل تۇردە بۇعاتتاۋعا مۇمكىندىك بەرەتىن جاساندى ينتەللەكت ەنگىزدى.
قازىرگى ۋاقىتتا Instagram-داعى زاڭسىز لوتەرەيالاردى ۇيىمداستىرۋشىلارعا قارسى جۇمىس جۇرگىزىلىپ جاتىر.
اگەنتتىك وسى ارەكەتتەرگە قاتىسى بار ادامداردى جاۋاپكەرشىلىككە تارتۋعا قاتاڭ باعىتتالعان.
قما ازاماتتاردى زاڭسىز لوتەرەيالارعا تارتاتىن ادامداردى انىقتاۋدا مادەنيەت جانە سپورت مينيسترلىگىنە كومەك كورسەتۋگە, سونداي-اق تولەنبەگەن سالىقتاردى قوسىمشا ەسەپتەۋ ءۇشىن مەملەكەتتىك كىرىستەر كوميتەتىنە اقپارات ۇسىنۋعا دايىن.
وعان قوسا, ونلاين-كازينولارعا قارسى كۇرەس بويىنشا اۋقىمدى جۇيەلى جۇمىس جۇرگىزىلىپ جاتىر. وسى جىلدىڭ باسىنان باستاپ 6 مىڭنان استام وسىنداي سايتتار بۇعاتتالىپ, كوشىرمەلەرى تاۋلىك ىشىندە جويىلدى.
زاڭسىز ونلاين-قۇمار ويىندارعا قارسى كۇرەستە ولاردىڭ قارجىلىق وپەراتسيالارىن توقتاتۋ ماڭىزدى ماسەلە بولىپ تابىلادى.
شەتەلدىك ۇيىمداستىرۋشىلار قازاقستاندىق ويىنشىلاردان تىكەلەي اقشا قابىلداي المايدى, سوندىقتان ولار جەرگىلىكتى تولەم ۇيىمدارى مەن بانكتەردى پايدالانادى.
الايدا, قۇمار ويىندار تۋرالى جاڭا زاڭ كۇشىنە ەنگەننەن كەيىن, ينتەرنەت-كازينوعا جاسالاتىن ترانزاكتسيالار شەكتەلەدى. ال بانكتەر مەن تولەم ۇيىمدارى كومەك كورسەتكەنى ءۇشىن جاۋاپكەرشىلىككە تارتىلادى.
بۇل ماسەلە بويىنشا قما, مادەنيەت جانە سپورت مينيسترلىگى جانە ۇلتتىق بانك بىرلەسىپ جۇمىس ىستەپ, زاڭسىز اقشا اۋدارىمدارىن انىقتاپ, بۇعاتتاۋدى جۇزەگە اسىرادى.
جيىن سوڭىندا قاتىسۋشىلار قۇمار ويىندارعا پاتولوگيالىق تاۋەلدىلىكتەن جاس ۇرپاقتى قورعاۋعا باعىتتالعان شارالار مەن ءىس-قيمىل الگوريتىمىن قامتيتىن ىنتىماقتاستىق تۋرالى مەموراندۋمعا قول قويدى.
