جوبانى ازىرلەۋگە وڭىردە جەكەلەگەن قىلمىستاردىڭ ءوسىپ, جالپى تىركەلگەن قىلمىستىڭ 5%-عا ارتقانى سەبەپ بولىپ وتىر ەكەن. تالداۋ ناتيجەسى وبلىس ورتالىعىندا ورنالاسقان كوڭىل كوتەرۋ ورىندارىندا ءجيى قىلمىس بولاتىنىن كورسەتىپ وتىر. جىل باسىنان پوليتسيا ورگاندارىنا وسىنداي ورىنداردان 2 700-دەن اسا حابارلاما ءتۇسىپ, 50 قىلمىستىق, 1 633 اكىمشىلىك ءىس قوزعالىپتى.
قىلمىستىڭ بارلىعى 24:00 مەن تاڭعى 5:00 ارالىعىندا تىركەلەتىنىنە نازار اۋدارعان وبلىس پروكۋرورى ريزابەك وجاروۆ تۇنگى كلۋب, مەيرامحانا مەن ءدامحانا جۇمىسىنىڭ كەستەسىن قالىپتاستىرىپ, كۇزەت قىزمەتىن پايدالانۋ جانە بەينەباقىلاۋدى ورناتۋعا باعىتتالعان مەموراندۋم جاساسۋ ماسەلەسىن پىسىقتاۋ كەرەكتىگىن ايتتى.
وبلىستىق پروكۋراتۋرانىڭ قوعامدىق مۇددەلەردى قورعاۋ باسقارماسىنىڭ باسشىسى باۋىرجان توقمىرزانىڭ حابارلاماسىندا اۋداندارداعى جەرگىلىكتى اتقارۋشى ورگاندار مەن مەيرامحانا, ءدامحانا يەلەرى اراسىندا جۇمىس كەستەسىن قىسقارتۋعا جاسالعان كەلىسىم جاقسى ناتيجە بەرگەنى ايتىلدى. بىراق وبلىس ورتالىعىنداعى كوڭىل كوتەرۋ ورىندارىندا جاسالعان قىلمىس سانى ازايماي تۇر. ولاردىڭ كوبىندە دەمالۋعا بارعان ادامنىڭ قاۋىپسىزدىگىن قامتاماسىز ەتۋ شارالارى جاسالماعان. مىسالى, قىزىلورداداعى «ماك» ءدامحاناسىندا ىشىمدىككە تويىپ العان قالا تۇرعىنى ەش سەبەپسىز ءبىر ازاماتقا پىشاق سىلتەگەن. ءدال وسى ءدامحانادا اششى سۋعا مەلدەكتەي تويعاننىڭ ءبىرى دەمالۋشىلاردىڭ ءبىرىنىڭ ۇيالى تەلەفونىن تارتىپ العان. شۇعىلا شاعىن اۋدانى تۇرعىندارىنىڭ دا اينالاسىن ءار ءتۇن سايىن ازان-قازان قىلىپ جاتاتىن ءدامحانا يەلەرىنە ايتار شاعىمى كوپ.
وبلىستىق قوعامدىق تاماقتاندىرۋ جانە قىزمەت كورسەتۋ سالاسى قاۋىمداستىعىنىڭ جەتەكشىسى اقمارال ابدىرازاقوۆانىڭ دەرەگىنشە, وبلىس ورتالىعىنىڭ وزىندە 170-تەن استام مەيرامحانا مەن ءدامحانا بار. سونىڭ سالىقتى ۋاقتىلى تولەپ, زاڭ بەلگىلەگەن تالاپتاردى بۇلجىتپاي ورىندايتىن 25-ءى عانا قاۋىمداستىققا مۇشە. «پاندەميا كەزىندە «Ashyk» قوسىمشاسى ارقىلى قاراعانىمىزدا, مەيرامحانا, ءدامحانالاردىڭ 70%-ىندا سالىقتىق تىركەلىم, ليتسەنزيا مەن سەس قىزمەتى بەرەتىن رۇقسات جوق بولىپ شىقتى. ورتاق تالاپقا باعىنباي, باسقالارعا كەسىرىن تيگىزەتىن كورىنىستىڭ ءبارى – سوندايلاردىڭ تىرلىگى. بىراق ولاردى ەشكىم «كورە» قويمايدى. تەكسەرۋشىلەردىڭ زاڭ تالاپتارىن ساقتاپ وتىرعان مەيرامحانا, دامحانالارعا شۇيلىگە بەرەتىنى ءبىز ءۇشىن تۇسىنىكسىز. جاڭاعىداي كولدەنەڭ تابىس تاۋىپ جاتقانداردى كاسىپكەر دەۋگە دە اۋزىڭ بارمايدى. وسى ماسەلەنى اياقسىز قالدىرماي, كولدەنەڭ تابىس تاۋىپ جۇرگەندەردى ءبىر جاعىنا شىعارعان دۇرىس», دەيدى اقمارال ماقسۇتقىزى.
جەرگىلىكتى پوليتسيا قىزمەتىنىڭ باسشىسى ەرداۋلەت جاۋكەەۆ وبلىس ورتالىعىنداعى 80-نەن استام وسىنداي ورىننىڭ 20-عا جۋىعى تاۋلىك بويى جۇمىس ىستەيتىنىن ايتادى. جاراقتى كۇزەتى تۇرماق قالقايعان قاراۋىلى دا جوق كوڭىل كوتەرۋ ورىندارىندا ۇرلىق-قارلىق تا, بۇزاقىلىق پەن اۋىر قىلمىس تا جاسالىپ جاتىر.
«شىن مانىندە بۇلار اس ءىشىپ, تىنىعاتىن ەمەس, اراق ءىشىپ, جۇرتتىڭ مازاسىن الاتىن ورىندارعا اينالىپ بارادى. ءبىز جۇرگىزگەن زەرتتەۋ تويدان «تويماي» شىققانداردىڭ وسىنداي جەرلەرگە جينالاتىنىن كورسەتىپ وتىر. دەمالىس پەن مەرەكە كۇندەرى وبلىستىق پوليتسيا دەپارتامەنتى مەن قالالىق پوليتسيا باسقارماسىنىڭ اپپارات قىزمەتكەرلەرىنەن جاساقتالعان توپ تاڭعا دەيىن وسىنداي ءدامحانالار ماڭىن كۇزەتۋگە ءماجبۇر», دەيدى ەرداۋلەت بايانباي ۇلى.
ءتيىستى ورىندار وكىلدەرى قاتىسقان جيىن قورىتىندىسىندا وبلىس پروكۋرورى ريزابەك وجاروۆ ءىس-شارالار جوسپارىن بەكىتىپ, جەرگىلىكتى اتقارۋشى جانە پوليتسيا ورگاندارى, «اتامەكەن» كاسىپكەرلەر پالاتاسى, ارداگەرلەر كەڭەسىمەن بىرلەسىپ جۇمىس توبىن قۇرىپ, جوسپاردىڭ ورىندالۋىن باقىلاۋعا الۋدى تاپسىردى. زاڭدى تالاپتىڭ ساقتالۋىنا كەدەرگى جاساپ وتىرعان «كاسىپكەرلەرگە» ەندى تىيىم بولاتىن شىعار.
قىزىلوردا
