بۇل كونفەرەنتسيا 1956 جىلدان باستاپ دۇنيە ءجۇزىنىڭ ءار ەلىندە ءتورت جىلدا ءبىر رەت وتەدى. سوندىقتان ايتۋلى جيىن بيىل ەلىمىزدە عانا ەمەس, ورتالىق ازيا كولەمىندە العاش ءوتىپ وتىر. وعان اقش, رەسەي, جاپونيا, قىتاي, برازيليا, تۇركيا, وڭتۇستىك افريكا, چەحيا, ۇلىبريتانيا, كانادا, پورتۋگاليا, تاعى باسقا ەلدەردەن كەلگەن بەدەلدى عالىمدار قاتىسىپ, ولار ءبىر اپتا بويى يزولياتورلار مەن مەتالل ەمەس ماتەريالدارداعى اقاۋلارعا قاتىستى پىكىر الماسىپ, ىرگەلى جانە قولدانبالى زەرتتەۋلەر جونىندە ءدارىس وقىدى.
مازمۇندى ءىس-شارانىڭ اشىلۋىندا ءسوز العان ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ عالىمدار اراسىنداعى ىنتىماقتاستىقتىڭ ءبىر كورىنىسى – حالىقارالىق عىلىمي كونفەرەنتسيالار وتكىزۋ ەكەنىن اتاپ ءوتتى.
ء«بىزدىڭ فيزيك عالىمدارىمىز وسىدان بەس جىل بۇرىن, ياعني 2019 جىلى 20 ەلدىڭ عالىمدارى قاتىسقان REI-20 مەرەيتويلىق كونفەرەنتسياسىن وتكىزگەن ەدى. بۇگىن ءبىز سونداي ماڭىزدى عىلىمي فورۋمنىڭ ءبىرى – 1956 جىلى اقش-تىڭ ارگوننا قالاسىندا باستالعان كونفەرەنتسيالار سەرياسىنىڭ ءححى كونفەرەنتسياسىن وتكىزىپ وتىرمىز. جاڭا عاسىر باستالعاننان بەرى ICDIM كونفەرەنتسيالارى – وڭتۇستىك افريكا, لاتۆيا, برازيليا, اقش, فرانتسيادا وتكەنى بەلگىلى. ال ۇيىمداستىرۋ كوميتەتىنىڭ شەشىمىمەن 2024 جىلى كونفەرەنتسيانى قازاقستاندا, ونىڭ ىشىندە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وتكىزۋ ۇيعارىلدى. ەندى ءتورت جىلدان كەيىن, ياعني 2028 جىلى تاعى وسىنداي حالىقارالىق كونفەرەنتسيا وتكىزۋ جوسپارلانىپ وتىر», دەدى رەكتور.
كونفەرەنتسيا جۇمىسىنا ەۋرزيا ۇلتتىق ۋنيۆەرسيتەتىنىڭ پروفەسسورى الما داۋلەتبەكوۆا مەن عىلىم دوكتورى, لاتۆيا ۋنيۆەرسيتەتىنىڭ قاتتى دەنە فيزيكاسى ينستيتۋتىنىڭ پروفەسسورى اناتولي پوپوۆ توراعالىق ەتتى. «قازاقستاندا العاش رەت ءوتىپ وتىرعان كونفەرەنتسياعا جاس عالىمداردىڭ قاتىسۋى مەنى قۋانتتى. ويتكەنى قازىرگى جاستار وتە ءبىلىمدى, بەلسەندى. ولاردىڭ اراسىندا حالىقارالىق دەڭگەيدە تانىمال جاس عالىمدار دا بار. بۇل باسقوسۋ ولارعا شەتەلدىك ارىپتەستەرىنەن جاڭا ءبىلىم الۋعا عانا ەمەس, سونىمەن قاتار بولاشاقتا تاعىلىمدامادان وتۋگە, ەۋروپالىق عالىمدارمەن بىرلەسىپ جاڭا زەرتتەۋ جۇمىستارى تۋرالى كەلىسسوز جۇرگىزۋگە مۇمكىندىك بەرەدى», دەدى لاتۆيا ۋنيۆەرسيتەتىنىڭ پروفەسسورى ا.پوپوۆ.
