ال قازىر 750-دەن استام مەكتەپتىڭ باسشىلىعى شاحماتتى وقۋ باعدارلاماسىنا ەنگىزۋگە دايىن ەكەنىن جەتكىزگەن. بىردەن ايتايىق, ءپان رەتىندە ەمەس. قازىر ءبىلىم جۇيەسىندە قولدانىلىپ جۇرگەن ءۆارياتيۆتى كومپونەنت دەگەن تەرمين بۇرىنعى فاكۋلتاتيۆتى ساباق دەگەن ۇعىمدى بىلدىرەدى. ياعني تاڭعى اۋىسىمدا وقيتىن وقۋشى تۇستەن كەيىن مەكتەپكە بارىپ شاحمات ۇيىرمەسىنە قاتىسا الادى دەگەن ءسوز.
جوبا شەڭبەرىندە 1–4 سىنىپتارعا ارنالعان «شاحمات نەگىزدەرى» وقۋ باعدارلاماسى ازىرلەنىپ, بەكىتىلگەن. وقۋ باعدارلاماسى شەڭبەرىندە شاحماتتى باستاۋىش سىنىپ پەداگوگتەرى ۇيرەتەدى. بۇل تۋرالى استانادا وتكەن ء«بىلىم بەرۋدەگى شاحمات» حالىقارالىق كونفەرەنتسياسى بارىسىندا ايتىلدى.
اتالعان ءىس-شارانى وقۋ-اعارتۋ مينيسترلىگى, حالىقارالىق شاحمات فەدەراتسياسى (FIDE), «Freedom Holding Corp» باس ارىپتەستىگىمەن KazChess/قازاقستان شاحمات فەدەراتسياسى ۇيىمداستىردى. كونفەرەنتسيادا اقش, ەۋروپا, ازيا جانە تمد ەلدەرىنىڭ حالىقارالىق ساراپشىلارى, سونداي-اق ەلىمىزدىڭ ءبىلىم جۇيەسىندە ەڭبەكتەنىپ جۇرگەن 200-دەن استام پەداگوگ باس قوستى. ەكى كۇندىك پانەلدىك پىكىرتالاس بارىسىندا حالىقارالىق جانە وتاندىق ساراپشىلار تسيفرلاندىرۋ جانە جاساندى ينتەللەكت قارقىنىمەن دامىپ جاتقان زياتكەرلىك ويىننىڭ ادام داعدىسىنىڭ دامۋىنا تيگىزەتىن اسەرىن تالقىلادى.
«بۇگىندە قازاقستان شاحمات فەدەراتسياسى وسى زياتكەرلىك ويىندى ءبىلىم سالاسىنا ەنگىزۋ ۇدەرىسىنىڭ نەگىزى بولىپ وتىر. وقۋ-اعارتۋ مينيسترلىگىمەن جانە جەرگىلىكتى اتقارۋشى ورگاندارمەن بىرلەسىپ, بىلتىر قاناتقاقتى جوبا رەتىندە ەلىمىزدىڭ جەتى وڭىرىندەگى 42 مەكتەپتىڭ 1000-عا جۋىق وقۋشىسى شاحماتتى مەڭگەردى. سونىمەن قاتار 1-سىنىپ وقۋشىلارىنا ارناپ ازىرلەنگەن وقۋ-ادىستەمەلىك كەشەن ماقۇلداندى», دەدى KazChess ءبىرىنشى ۆيتسە-پرەزيدەنتى دارمەن سادۋاقاسوۆ.
ايتا كەتەيىك, بيىل ءساۋىر ايىندا 1-سىنىپ وقۋشىلارىنا ارناپ ازىرلەنگەن وقۋ-ادىستەمەلىك كەشەن بەكىتىلگەن. قازىرگى ۋاقىتتا ەكىنشى سىنىپ وقۋشىلارىنا ارنالعان وقۋ-ادىستەمەلىك كەشەن ازىرلەندى, ونى دا بەكىتەتىن كۇن الىس ەمەس. 2024–2025 وقۋ جىلىنا دايىندىق ماقساتىندا ايماقتاردىڭ ءبىلىم باسقارمالارىمەن بىرلەسە وتىرىپ شاحماتتى ءۆارياتيۆتى ءپان رەتىندە ەنگىزۋگە دايىن ەكەنىن راستاعان 767 مەكتەپتىڭ ءتىزىمى انىقتالعان. قازىرگى ۋاقىتتا مەكتەپتەردىڭ ءتىزىمى جەرگىلىكتى بيۋدجەتتىڭ مۇمكىندىكتەرى مەن ءبىر ادامعا شاققانداعى قارجىلاندىرۋ كولەمى ەسكەرىلىپ, ءبىلىم باسقارمالارى دەڭگەيىندە ناقتىلانىپ جاتىر.
