قوعامعا زالالى كوپ كەسەل

سىبايلاس جەمقورلىققا قارسى ءىس-قيمىل اگەنتتىگى وتكەن اپتادا ەلىمىزدە جەمقورلىق جاساپ قولعا تۇسكەن باسشىلاردىڭ مالىمەتتەرىن جاريالادى. سونىڭ ءبىرى – سولتۇستىك قازاقستان وبلىسى بويىنشا قىلمىستىق اتقارۋ جۇيەسى دەپارتامەنتىنىڭ باسشىسى ا.مۇستافينوۆكە قاتىستى قىلمىستىق ءىس. وتكەن اپتادا پەتروپاۆل قالالىق سوتى كۇدىكتىگە قاتىستى ۇكىم شىعاردى.

دەپارتامەنت باسشىسىنا دەلدال ارقىلى وبلىستاعى قىلمىستىق اتقارۋ جۇيەسى مەكەمەلەرىنە ۇن جەتكىزۋ ماقساتىندا مەملەكەتتىك ساتىپ الۋ شارتىن جاساسۋعا جاردەمدەسكەنى ءۇشىن كاسىپكەردەن 1 ملن تەڭگە مولشەرىندە پارا الدى دەگەن كىنا تاعىلعان. سوت ۇكىمىمەن ا.مۇستافينوۆ مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋ قۇقىعىنان ءومىر بويىنا ايىرىلىپ, وعان 30 ملن تەڭگە مولشەرىندە, ال پارا بەرۋشى مەن دەلدالعا تيىسىنشە 20 ملن جانە 10 ملن تەڭگە كولەمىندە ايىپپۇل سالىندى. قازىرگى تاڭدا ۇكىم زاڭدى كۇشىنە ەنگەن جوق.

سونىمەن قاتار ىشكى ىستەر ءمينيسترىنىڭ بۇيرىعىمەن ءتيىستى ۆەدومستۆولىق باقىلاۋ مەن پروفي­لاكتيكالىق جۇمىستىڭ بولماعانى ءۇشىن قىلمىستىق اتقارۋ جۇيەسى كوميتەتىنىڭ باس­شىلىعى تارتىپتىك جاۋاپ­كەرشىلىككە تارتىلدى. اتاپ ايتقاندا, كوميتەت توراعاسى, ادىلەت پولكوۆنيگى ت.جانىبەكوۆكە سوگىس, ونىڭ ورىنباسارى, ادىلەت گەنەرال-مايورى م.ايۋباەۆقا, وزىندىك قاۋىپسىزدىك, كادرلىق جۇمىس جانە تىلدىق قامتاماسىز ەتۋ باسقارمالارىنىڭ باستىقتارىنا قاتاڭ سوگىس جاريالاندى. وسى بۇيرىقپەن ا.مۇستافينوۆ تەرىس سەبەپتەرمەن ىشكى ىستەر ورگاندارىنان بوساتىلدى.

تاعى ءبىر جەمقورلىق وقيعاسى ماڭعىس­تاۋ وبلىسىندا تىركەلدى. تۇپ­قارا­عان اۋداندىق سوتى ماڭ­عىستاۋ وبلىسى جۇمىس­پەن قامتۋدى ۇيلەستىرۋ جانە الەۋ­مەتتىك باعدارلامالار باس­قارماسىنىڭ «ەڭبەك موبيلدىلىگى ورتالىعى» كمم ديرەكتورى م.قايرانباەۆقا قاتىس­تى ۇكىم شىعاردى. ول وزبەك­ستان رەسپۋبليكاسى ازاماتىنان جۇمىسقا ورنالاسۋعا جاردەمدەسۋ سىل­­تاۋىمەن 200 مىڭ تەڭگە مول­شە­رىن­دە اقشا قاراجاتىن الاياقتىق جول­مەن جىمقىرعانى ءۇشىن كىنالى دەپ تانىلدى. سوت ۇكىمىمەن وعان 2 جىل 4 اي مەرزىمگە باس بوستان­دى­عىنان ايىرۋ جازاسى تاعايىندالدى.

سونداي-اق سوتتالعان ادام مەم­لە­كەت­تىك قىزمەتتە جانە كۆازي­مەم­لەكەتتىك سەكتور سۋبەكتى­لەرىندە قىزمەت اتقارۋ قۇقى­عىنان ءومىر بويىنا ايىرىلدى. قازىرگى تاڭدا ۇكىم زاڭدى كۇشىنە ەنگەن جوق.

بۇگىندە پاراقورلىق قىلمىسى مىسالدارىن قوعامنىڭ بارلىق سالاسىنان تابۋعا بولادى. «باتپانداپ كىرگەن اۋرۋ مىسقالداپ شىعادى» دەمەكشى, جەمقورلىق كەسەلى­نەن دە ءاپ-ساتتە ايىعۋ مۇم­كىن بولماي تۇر. سونىڭ ءبىر مىسالى – قازىرگى تاڭدا ماڭ­عىستاۋ وبلىسى بويىنشا سىباي­لاس جەمقورلىققا قارسى ءىس-قي­مىل دەپارتامەنتى «قازاق گاز وڭدەۋ زاۋىتى» جشس ديرەكتورىنا قاتىستى سوتقا دەيىنگى تەرگەۋ جۇر­گىزىپ جاتىر. ول اۋكتسيون وتكىزبەس­تەن زاڭسىز ساتۋ ارقىلى كاسىپورىن­نىڭ مۇلكىن اسا ءىرى مولشەردە جىم­قىردى دەگەن كۇدىككە ىلىنگەن. زالال كولەمى – 65 ملن تەڭگە.

بۇگىندە سوتتىڭ سانكتسياسىمەن كۇدىكتى قاماۋعا الىنىپ, تەرگەۋ جال­عاسىپ جاتىر. قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى.

ال قىزىلوردا وبلىسىندا ەكونومي­كالىق تەرگەۋ دەپارتا­مەنتى باسشىسىنىڭ بۇرىنعى ورىنباسارى ا.قاسىمباەۆ پەن كاسىپكەر ج.ساكەنوۆ سوتتالدى. الماتى قالالىق سوتىنىڭ انىقتاۋىنشا, ولار الاياقتىققا وقتالعانى جانە الماتى قالاسى كاسىپورىندارىنىڭ ءبىرى ديرەك­تورى­نىڭ قىلمىستىق ءىسىن توقتاتۋ ماق­ساتىندا قۇقىق قورعاۋ ورگاندارىنىڭ قىزمە­تكەرلەرىنە 10 ملن تەڭگە كولەمىندە پارا بەرۋگە يتەرمەلەگەنى ءۇشىن كىنالى دەپ تانىلدى.

سوت ۇكىمىمەن ەكى ازامات مەم­لەكەتتىك ورگاندار مەن كۆازيمەم­لەكەتتىك سەكتور سۋبەكتىلەرىندە قىزمەت اتقارۋ قۇقىعىنان ءومىر بويىنا ايىرىلا وتىرىپ, الداعى 7 جىل ءومىرىن تەمىر توردىڭ ارعى جاعىندا وتكىزەتىن بولدى. سوت ۇكىمى زاڭدى كۇشىنە ەندى.

وزگە وڭىرلەرگە ەلدىكتىڭ ۇلگىسىن كور­سەتۋگە ءتيىس استانانىڭ وزىندە قولى مەن قۇرىعى ۇزىن «شورتان­داردىڭ» سىبايلاس جەمقورلىق­پەن ۇستالىپ جاتقان وقيعالارىن ءجيى كوزىمىز شالادى. سونىڭ ءبىرى – «ساقالدى» قۇرىلىسقا اينالعان «Astana LRT» اينالاسىنان داۋ ارىلماي تۇر. بىرنەشە جىل بو­يىنا تۇرالاپ قالعان نىساننىڭ ءوزى كوڭىلگە كوپ كۇدىك ۇيالاتادى. قازىرگى تاڭدا سىبايلاس جەمقورلىققا قارسى ءىس-قيمىل اگەنتتىگى «Astana LRT» جشس-نىڭ بۇرىنعى باسقار­ما توراعاسى تالعات اردانعا قا­تىس­تى قىلمىستىق ءىستى تەرگەپ جاتىر. اۋىر قىلمىس جاساعانىن بىلدى­رەتىن دالەل­دەر كۇدىكتى ت.اردان ارەكەت­تەرىن قىلمىستىق كودەكستىڭ 361-بابى 4-بولىگى 3-تارماعى بو­يىنشا سارالاۋعا مۇمكىندىك بەر­دى. ال وتكەن اپتادا قىلمىستىق-پرو­تسەستىك كودەكستىڭ 208-بابى 1-بولىگىنە سايكەس كۇدىكتى جاۋاپ الۋعا شاقىرتىلدى.

الايدا ت.اردان ەلدەن تىس جەردە بولۋىنا جانە كەلۋدەن جالتارۋىنا بايلانىستى سىبايلاس جەمقورلىققا قارسى ءىس-قيمىل اگەنتتىگى قپك-ءنىڭ 205-بابىنىڭ 3-بولىگىن باسشىلىققا الا وتىرىپ, كۇدىكتىنى شاقىرۋ تۋرالى حابارلامانى بۇقارالىق اقپارات قۇرالدارىندا جاريالاعان بولاتىن. جاۋاپ الۋ جانە كۇدىكتىنىڭ ءىس-ارەكەتىن سارالاۋ تۋرالى قاۋلىنى جاريالاۋ ءۇشىن ت.اردان 2024 جىلى 23 تامىزدا ساعات 09:00-دە استانا قالاسى, قابانباي باتىر داڭعىلى, 19, «ب» بلوگى مەكەنجايىندا ورنالاسقان سىبايلاس جەمقورلىققا قارسى ءىس-قيمىل اگەنت­تىگىنىڭ اكىمشىلىك عيماراتىنا جەدەل-تەرگەۋ توبىنىڭ باسشىسى ج.وتەپقاليەۆكە كەلۋى قاجەت بولاتىن. الايدا اگەنتتىكتىڭ ءباسپاسوز قىزمەتىنەن بىلگەنىمىزدەي, كۇدىكتى كەزدەسۋگە كەلمەگەن.

ايتا كەتسەك, ت.اردان تەرگەۋ ارەكەت­­تەرىنە قاتىسۋ ءۇشىن قور­عاۋ­شىنى دەربەس شاقىرۋعا نە قىل­مىستىق پروتسەستى جۇرگىزۋشى ورگان­ن­ىڭ قورعاۋشىنىڭ قاتىسۋىن قامتا­ما­سىز ەتۋى تۋرالى ءوتىنىش بەرۋگە قۇقىلى (قر قپك 68-بابى). ەگەر قور­عاۋشىنى كۇدىكتى نەمەسە ونىڭ زاڭ­دى وكىلدەرى, سونداي-اق ولاردىڭ تاپ­سىر­مالارىمەن باسقا ادامدار شاقىر­ماسا, قورعاۋشىنىڭ قاتىسۋىن قىل­مىستىق پروتسەستى جۇرگىزەتىن ورگان قامتاماسىز ەتەدى (قر قپك 67-بابى).