الەمدىك ستاندارت تالاپتارىنا جاۋاپ بەرەتىن بۇل جوعارى وقۋ ورنى بيىل ءوزىنىڭ العاشقى تۇلەكتەرىنە جولداما بەرمەك
ەلباسىمىز نۇرسۇلتان نازارباەۆتىڭ يدەياسىمەن جانە تىكەلەي قامقورلىعىنىڭ ناتيجەسىندە ومىرگە كەلگەن نازارباەۆ ۋنيۆەرسيتەت ءوزىنىڭ اشىلۋ ساتىنەن باستاپ, ەلىمىزدىڭ ءبىلىم بەرۋ سالاسىندا بۇرىن-سوڭدى بولماعان جاڭا جوعارى مەكتەپ جۇيەسىنىڭ العاشقى نەگىزىن قالادى. مۇنداعى ءبىلىم حالىقارالىق بيىك تالاپتارعا سايكەس كەلەتىندىگىمەن ەرەكشەلەنەدى.
ۋنيۆەرسيتەت قازىردىڭ وزىندە جوعارى ءبىلىم سالاسىنىڭ ۇلتتىق برەندىنە اينالىپ ۇلگەردى. ويتكەنى, ەلىمىزدەگى كەز كەلگەن وقۋشى وسى ۋنيۆەرسيتەتتە ءبىلىم العاندى قالايدى. بالالارىنىڭ بولاشاعىن كۇنى بۇرىن ويلايتىن اتا-انالار بالالارىن ناق وسى وقۋ ورنىنا ءتۇسىرۋ ماقساتىندا ەڭ الدىمەن ولاردى ەلىمىزدىڭ ءاربىر ايماقتارىندا اشىلىپ جاتقان نازارباەۆ ينتەللەكتۋالدىق مەكتەپتەرىنە وقۋعا بەرەدى. ءسويتىپ, بۇل ۋنيۆەرسيتەتتە وقۋدىڭ قامى بالانىڭ ءوزى مەكتەپ بىتىرمەستەن كوپ بۇرىن جانە الدىن-الا جاسالىنعان جان-جاقتى ازىرلىكتەرمەن باستالىپ كەتەدى.
اتقارۋ كەڭەسى, قامقورشىلىق كەڭەسى جانە جوعارى قامقورشىلىق كەڭەسى ۋنيۆەرسيتەتتىڭ باسقارۋ ورگانى بولىپ تابىلادى. جوعارى قامقورشىلىق كەڭەسىنىڭ توراعاسى – قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ. ۋنيۆەرسيتەتتىڭ نەگىزى 2009 جىلى قالاندى. 2009 جىلدىڭ 17 قازانىندا ونىڭ باسشىلىق قۇرامىنىڭ ءبىرىنشى ءماجىلىسى بولىپ ءوتىپ, وعان پرەمەر-مينيستر كارىم ءماسىموۆ توراعالىق ەتتى. وسى ءماجىلىستە ۋنيۆەرسيتەتتىڭ 2010-2012 جىلدارعى دامۋ ستراتەگياسى بەكىتىلدى. 2010 جىلدىڭ كۇزىندە ۋنيۆەرسيتەت «Foundation» دايىنداۋ باعدارلاماسىنا ءبىرىنشى ستۋدەنتتەردى قابىلدادى. وسى جىلدىڭ 22 جەلتوقسانىندا قازاقستان رەسپۋبليكاسى پارلامەنتىنىڭ ءماجىلىسى «نازارباەۆ ۋنيۆەرسيتەتتىڭ» مارتەبەسى تۋرالى» زاڭ قابىلدادى. 2012 جىلى استانادا جاڭا حالىقارالىق ۋنيۆەرسيتەتتى حالىقارالىق دەڭگەيدە تانىستىرۋعا ارنالعان ەكى كۇندىك سەمينار بولىپ ءوتتى. ونىڭ جۇمىسىنا ەلىمىزدىڭ ءبىلىم سالاسىنىڭ باسشىلىعىمەن قاتار كەمبريدج ۋنيۆەرسيتەتىنىڭ ۆيتسە-كانتسلەرى ەنن لونسدەيل, ستەنفورد ۋنيۆەرسيتەتىنىڭ قامقورشىلىق كەڭەسىنىڭ حاتشىسى دجەففري ۋاحتەل, لوندون ۋنيۆەر-سيتەتتىك كوللەدجىنىڭ ۆيتسە-پروۆوستى مايكل ۋورتون, سونداي-اق, سينگاپۋر ۋنيۆەرسيتەتى مەن باسقا دا الەمگە تانىمال جوعارى وقۋ ورىندارىنىڭ پروفەسسورلارى قاتىستى.
ۋنيۆەرسيتەتتەگى جۇزەگە اسىرىلىپ جاتقان جاڭالىقتار مەن جۇرگىزىلىپ جاتقان جۇمىستار ەلباسىنىڭ تۇراقتى نازارىندا. مەملەكەت باسشىسى مۇندا كەلىپ, اتقارىلىپ جاتقان جۇمىستارمەن تانىسىپ تۇرادى. ۇستىمىزدەگى جىلدىڭ ناۋرىز ايىندا بولعان كەزىندە ۋنيۆەرسيتەتتە قۇرىلعان ەكى عىلىمي ورتالىقتىڭ جۇمىسىمەن جان-جاقتى تانىستى. مۇندا ەلباسى نازارىنا كوپتەگەن جوبالار ۇسىنىلدى. سولاردىڭ ءبىرى قاتەرلى ىسىكتى ەرتە ايقىندايتىن اپپارات. ۋنيۆەرسيتەت عالىمدارى مەن ماماندارىنىڭ جانە ستۋدەنتتەردىڭ قاتىسۋىمەن ازىرلەنگەن بۇل اپپاراتتى وندىرىستىك نەگىزدە شىعارعان جاعدايدا قاتەرلى ىسىكتەن امان قالۋدىڭ تابىستى ءبىر مۇمكىندىگى ەلىمىزدىڭ مەديتسينا سالاسىنا دا ەنگىزىلگەن بولار ەدى.
«ءبىز ميكروبولشەكتەردى زەرتتەپ, ولاردىڭ ساندىق كورسەتكىشىن سيپاتىمەن سالىستىرامىز. مۇنى ءبىز قاتەرلى ىسىكتىڭ بەتىن قايتاراتىنداي امالدار ىزدەستىرۋ ءۇشىن جاسايمىز. اپپارات مىنە, سونىڭ ناتيجەسىندە دۇنيەگە كەلدى. مۇنداعى جۇمىستاردىڭ بىرقاتارى قازىرگى كۇنى وندىرىستىك نەگىزگە قويۋعا دا ءازىر تۇر. ماسەلەن, بىلتىرعى جىلى ازىرلەنگەن دياگنوستيكالىق ساقينا مەن موبيلدىك قوسىمشالار بيىلعى جىلى شىعارىلاتىن بولادى», دەيدى نازارباەۆ ۋنيۆەرسيتەتتىڭ زەرتتەۋشى-تاعىلىمداۋشىسى ۆەرونيكا داشكوۆا.
ۋنيۆەرسيتەتتە كىشى عىلىمي قىزمەتكەر بولىپ جۇمىس ىستەيتىن دامەلى مەكتەپباەۆا دياگنوستيكالىق ساقينا قىزمەتىنە ءبىرشاما سيپاتتاما بەرە كەتتى. كارتريدجدە قاعاز چيپ ورنالاستىرىلادى. ءچيپتىڭ قاعازدان بولاتىن سەبەبى, مۇنداي جاعدايدا ونىڭ قۇنى ەۋروپالىق بالاماعا قاراعاندا الدەقايدا ارزاندايدى, بىراق ساپا جاعىنان كەم بولمايدى. ول جەكە ۇيلەردى جىلىتۋ ءۇشىن قىزمەت ەتەدى. مامانداردىڭ ايتۋىنا قاراعاندا, ەكىقاباتتى جەكە ۇيگە ورناتىلعان مۇنداي قوندىرعى قۇنى 300 مىڭ تەڭگەدەن اسپايدى.
ۋنيۆەرسيتەتتە قازىرگى كۇندەرى 170 عىلىمي جوبا جۇزەگە اسىرىلۋ ۇستىندە. ەلباسى ولاردىڭ بىرقاتارىمەن تانىستى.
نازارباەۆ ۋنيۆەرسيتەت, مىنە, وسىنداي بيىك تالابى جانە ەرەكشەلىگىمەن قازىرگى مەكتەپ قابىرعاسىنداعى ءجاسوسپىرىمدەردى ءوز بولاشاقتارىن كۇنى بۇرىن ويلاۋعا, الدىنا ەرتەرەك ماقسات قويىپ, وعان جەتۋگە تالپىنىس جاساۋعا تاربيەلەۋ ۇستىندە. ءوز بولاشاعىنا ەرتە باستان كوز تىگەتىن جاستار ءۇشىن ول ادامدى اداستىرمايتىن تەمىرقازىق جۇلدىزى سەكىلدى. الىستان ساۋلە توگىپ, وزىنە شاقىرىپ تۇرادى.
قازىرگى كۇنى نازارباەۆ ۋنيۆەرسيتەتتە ءبىر ورتالىق پەن جەتى مەكتەپ جۇمىس ىستەيدى. ولار – ۋنيۆەرسيتەتالدى دايارلىق ورتالىعى, ينجەنەرلىك مەكتەبى, عىلىم مەن تەحنولوگيالار مەكتەبى, گۋمانيتارلىق جانە الەۋمەتتىك عىلىمدار مەكتەبى, بيزنەستىڭ جوعارى مەكتەبى, مەملەكەتتىك ساياساتتىڭ جوعارى مەكتەبى, ءبىلىم بەرۋدىڭ جوعارى مەكتەبى جانە مەديتسينا مەكتەبى. بۇل ءاربىر مەكتەپتىڭ تاجىريبە ءبولىسۋ ماقساتىندا تىعىز قارىم-قاتىناس جاسايتىن حالىقارالىق ارىپتەسى بار. ول ارىپتەستەر الەمگە تانىمال جوعارى وقۋ ورىندارى اراسىنان تاڭداپ الىنعان.
ۋنيۆەرسيتەت, سونداي-اق, ءوزىنىڭ ءسان-سالتاناتىمەن دە ەرەكشەلەنەدى. بۇل ءبىلىم ورداسىنا العاش كىرىپ كەلگەن ساتتە ونىڭ ۋنيۆەرسيتەت ەكەندىگىن بىردەن اڭعارا المايسىڭ. ويتكەنى, ءبىرىنشى كەزەكتە ءسىزدىڭ الدىڭىزدان ءىشى جاسىل الەمگە تولى بوتانيكالىق باق اشىلعانداي بولادى. بىراق ەندىگى ساتتە قولدارىنا وقۋلىقتار مەن نوۋتبۋكتار ۇستاعان قىز-جىگىتتەر پايدا بولعان كەزدە بارىپ قانا ءسىز بۇل عيماراتتىڭ جاڭا تۇرپاتتى «ءبىلىم مەن عىلىمنىڭ حرامى» ەكەندىگىن اڭعارا باستايسىز. ۋنيۆەرسيتەت قۇرىلىسىن جوبالاعان ماماندار قازاقستان پرەزيدەنتى نۇرسۇلتان نازارباەۆ يدەياسىن ءومىر شىندىعىنا اينالدىرۋ ماقساتىندا ايانباستان تەر توككەندىگى بىردەن كورىنىس بەرەدى. اركالار, كۇمبەزدەر, كولوننادالار… وسىنىڭ بارلىعى ۋنيۆەرسيتەتكە ەرەكشە ءبىر اسقاقتىقپەن قاتار ءسان-سالتانات بەرىپ تۇر. ارلەۋ جۇمىستارىنا جوعارى ساپالى ماتەريالداردىڭ پايدالانىلعاندىعى بايقالادى. سونىمەن قاتار, مۇندا حالقىمىزدىڭ ۇلتتىق ەرەكشەلىكتەرى دە ەسكەرىلگەن ەكەن. كەيبىر جەرلەرى ويۋ-ورنەكتەرمەن بەزەندىرىلگەن. ال, ديزاين باتىستىق ءستيلدىڭ قازىرگى زاماندىق بارلىق تالاپتارىنا جاۋاپ بەرە الادى. وسىنىڭ بارلىعى قوسىلا كەلىپ, ۋنيۆەرسيتەتتە ءبىلىم الۋ ۇستىندەگى قازاقتىڭ ءاربىر قىز بەن جىگىتىنە جانعا جايلى جاعىمدىلىق سىيلايتىندىعىن اڭعارۋعا بولادى.
نازارباەۆ ۋنيۆەرسيتەتتە جاستارعا تەك ءبىلىم بەرۋمەن قاتار, جوعارىدا ايتىپ كەتكەنىمىزدەي, مۇندا عىلىمي-زەرتتەۋ باعىتىنا كوپ ءمان بەرىلەدى. قازىرگى كۇنى وندا ءۇش عىلىمي ورتالىق جۇمىس ىستەيدى. ولار – نازارباەۆ ۋنيۆەرسيتەتتىڭ زەرتتەۋ جانە يننوۆاتسيالىق جۇيەسى, ءومىر تۋرالى عىلىمي ورتالىق جانە ءبىلىم بەرۋدىڭ جوعارى مەكتەبى جانىنداعى ءبىلىم بەرۋ ساياساتى ورتالىعى. مۇنداعى نازارباەۆ ۋنيۆەرسيتەت زەرتتەۋ جانە يننوۆاتسيالىق جۇيەسى قايتا جاڭعىرتىلاتىن ەنەرگەتيكاداعى تەحنولوگيالار سالاسىندا جوبالار ازىرلەۋمەن, ەنەرگيا ۇنەمدەۋ ماسەلەلەرىمەن, قورشاعان ورتانى قورعاۋدىڭ ماڭىزدى ماسەلەلەرىندە جاڭا ءادىس-تاسىلدەردى ىزدەستىرۋمەن شۇعىلدانادى. ءومىر تۋرالى عىلىمي ورتالىق دەربەستەندىرىلگەن مەديتسينا جانە گەنوميكا, رەگەنەراتيۆتىك مەديتسينا جانە ۇزاق ءومىر ءسۇرۋ, جاھاندىق دەنساۋلىق قورعاۋ ماسەلەلەرىمەن اينالىسادى.
بۇگىنگى كۇندەرى ۋنيۆەرسيتەتتى وندىرىسپەن بايلانىستىرۋدىڭ اۋقىمدى جوبالارى قولعا الىنۋدا. مۇندا اتى الەمگە تانىمال ترانسۇلتتىق ءىرى كومپانيالار وزدەرىنىڭ وكىلدىكتەرىن اشاتىن بولادى. وسى باعىتتاعى العاشقى قادامدار قازىردىڭ وزىندە جاسالىندى. ماسەلەن, جۋىقتا عانا استانادا وتكەن پرەزيدەنت جانىنداعى شەتەل ينۆەستورلارى كەڭەسىنىڭ كەزەكتى پلەنارلىق وتىرىسىندا ينۆەستيتسيالار جانە دامۋ ءمينيسترى اسەت يسەكەشەۆ General Electric, Microsoft, Intel جانە باسقا دا الەمدىك دەڭگەيدەگى ءىرى كومپانيالار «نازارباەۆ ۋنيۆەرسيتەت» ينتەللەكتۋالدىق-يننوۆاتسيالىق كلاستەرى اۋماعىندا وزدەرىنىڭ كورپوراتيۆتىك ورتالىقتارىن اشاتىندىعىن مالىمدەدى. ءمينيستردىڭ اتاپ وتكەنىندەي, وسىنداي ماقساتتا 90-نان استام ءىرى كومپانيالارمەن كەلىسسوزدەر جۇرگىزىلگەن. سولاردىڭ 6-ۋىمەن مەموراندۋم جاسالىنعان.
ينتەللەكتۋالدىق-يننوۆاتسيالىق كلاستەردى قالىپتاستىرۋ ماقساتىندا ۋنيۆەرسيتەت كامپۋسى ماڭايىنان 50 گەكتار جەر ءبولىنىپ وتىر. بولاشاقتا بۇل جەردە ۇلتتىق جانە حالىقارالىق جوعارى تەحنولوگيالىق كومپانيالاردىڭ ءارتۇرلى ورتالىقتارى سالىنىپ, جۇمىس ىستەيتىن بولادى. عىلىمي پاركتى دامىتۋ جۇمىسىنا كاسىپكەرلەر دە تارتىلماق.
ءيا, ءسويتىپ بۇل ۋنيۆەرسيتەتتى ءبىتىرىپ شىققان ءاربىر جاس حالىقارالىق تالاپتارعا ساي كەلەتىن جوعارى ءبىلىم الۋىمەن بىرگە ءوز ۇلتىنىڭ تاۋەلسىزدىك جىلدارىندا جەتكەن جەتىستىكتەرىن ماقتانىش ەتەتىن پاتريوت بولىپ شىعاتىندىعى دا انىق. مۇنداعى ءاربىر تاماشا كورىنىس جاس ۇلاندارىمىزدىڭ كوكىرەگىندە ۇيالاپ قالاتىندىعى ءسوزسىز. جوعارى وقۋ ورنىنىڭ اۋماعى گۇلزارلارمەن, جاسىل اعاشتارمەن كومكەرىلگەن. ولاردى وتىرعىزعان كەزدە دەكوراتيۆتىك كورىنىستەرمەن قاتار, استانا اۋا رايىنىڭ ەرەكشەلىكتەرى دە ەسكەرىلىپتى. جالپى اۋماعى 100 مىڭ شارشى مەتر الاڭعا ۋنيۆەرسيتەتتىڭ 9 كورپۋسى ورنالاسقان. ولاردىڭ بارلىعىن ۇلكەن اتريۋم جالعاستىرادى. بۇل اتريۋم جوعارى وقۋ ورنىنىڭ ەڭ ءبىر كورىكتى دە كوگالداندىرىلعان تۇسى. جوعارىدا ايتقانىمىزداي, العاشقى كىرگەن ادامنىڭ ەسىندە مۇنداعى تروپيكالىق باقشانىڭ ساقتالىپ قالاتىندىعى انىق. وندا 300 جىلدىق ءزايتۇن اعاشتارى دا ءوسىپ تۇر. مۇنداعى اتموسفەرا تابيعاتقا وتە جاقىن.
نازارباەۆ ۋنيۆەرسيتەت كىتاپحاناسىن ەرەكشە اتاپ وتۋگە تۋرا كەلەدى. ونىڭ وقۋ زالدارى 250 ادامعا ارنالعان. ولاردا 100-دەن استام كومپيۋتەر ورنالاستىرىلعان. بۇل ەلىمىزدەگى اقپاراتتىق رەسۋرستاردىڭ اعىلشىن تىلدىك كوللەكتسياسىنا ەڭ باي كىتاپحانا. ونىڭ قورى كىتاپتاردان, مەرزىمدى باسىلىمداردان جانە ەلەكتروندى رەسۋرستاردان تۇرادى. ءبىر ەسەپتەن العاندا, ونى سۋپەرتەحنولوگيالىق كىتاپحانا دەپ تە ايتۋعا بولادى. مۇندا 60-قا جۋىق تولىق تەكستى عىلىمي بازاعا, عىلىمي-تانىمدىق جۋرنالداردىڭ ميلليوننان استام ماقالالارىنا ەركىن كىرۋگە بولادى. مۇنىڭ سىرتىندا 100 مىڭعا تارتا ەلەكتروندى كىتاپتار بار. وسىناۋ ءبىلىم ساقتاۋ مەكەمەسىنەن بۇكىل قازاقستان مەن تمد ەلدەرىندە جوق كىتاپتاردى دا تابۋعا بولادى. كىتاپحانانىڭ تاعى ءبىر ەرەكشەلىگى مۇندا كەلۋشىلەر كىتاپحانا قىزمەتكەرىنىڭ كومەگىنسىز-اق كىتاپتاردى الىپ, قايتا وتكىزە الادى. بۇل قىزمەت كىتاپتار بەرۋدىڭ ەلەكتروندى ستانساسى ارقىلى جۇزەگە اسىرىلادى. كەلۋشىلەرگە كوپ رەلستى كىتاپ جەتكىزۋ جۇيەسى قىزمەت كورسەتەدى.
قازىرگى كۇنى ۋنيۆەرسيتەتتە 2 مىڭنان استام ستۋدەنت ءبىلىم الۋدا. ولارعا بارلىق جاعداي جاسالىنعان. بولاشاقتا ولاردىڭ قاتارى ارتا بەرەتىندىگى انىق. جاتاقحانا, كىتاپحانا, رەسۋرستار ورتالىعى, لەكتسيا زالدارى, زەرتحانالار, ستۋدەنتتىك كافەتەريلەر, مەديتسينالىق ورتالىق, ساۋدا دۇكەندەرى, ستۋدەنتتەردى قولداۋ قىزمەتى, سپورت الاڭدارى, مىنە, وسىلاردىڭ قىزمەتىنىڭ بارلىعى ستۋدەنتتەرگە ارنالعان.
بيىلعى جىل – نازارباەۆ ۋنيۆەرسيتەت ءۇشىن تاريحي جىل. ويتكەنى, ناق بيىلعى جىلى العاشقى تۇلەكتەر ءبىتىرىپ شىقپاق. بۇل شارا 15 ماۋسىم كۇنى اتاپ وتىلمەك.
سۇڭعات ءالىپباي,
«ەگەمەن قازاقستان».
دەرەك پەن دايەك
نازارباەۆ ۋنيۆەرسيتەتتىڭ نەگىزى 2009 جىلى قالاندى. 2009 جىلدىڭ 17 قازانىندا ونىڭ باسشىلىق قۇرامىنىڭ ءبىرىنشى ءماجىلىسى بولىپ ءوتتى. وسى ماجىلىستە ۋنيۆەرسيتەتتىڭ 2010-2012 جىلدارعى دامۋ ستراتەگياسى بەكىتىلدى. 2010 جىلدىڭ كۇزىندە ۋنيۆەرسيتەت «Foundation» دايىنداۋ باعدارلاماسىنا ءبىرىنشى ستۋدەنتتەردى قابىلدادى. وسى جىلدىڭ 22 جەلتوقسانىندا قازاقستان رەسپۋبليكاسى پارلامەنتىنىڭ ءماجىلىسى «نازارباەۆ ۋنيۆەرسيتەتتىڭ» مارتەبەسى تۋرالى زاڭ قابىلدادى. 2012 جىلى استانادا جاڭا حالىقارالىق ۋنيۆەرسيتەتى حالىقارالىق دەڭگەيدە تانىستىرۋعا ارنالعان ەكى كۇندىك سەمينار بولىپ ءوتتى. * * * قازىرگى كۇنى نازارباەۆ ۋنيۆەرسيتەتتە ءبىر ورتالىق پەن جەتى مەكتەپ جۇمىس ىستەيدى. ولار – ۋنيۆەرسيتەتالدى دايارلىق ورتالىعى, ينجەنەرلىك مەكتەبى, عىلىم مەن تەحنولوگيالار مەكتەبى, گۋمانيتارلىق جانە الەۋمەتتىك عىلىمدار مەكتەبى, بيزنەستىڭ جوعارى مەكتەبى, مەملەكەتتىك ساياساتتىڭ جوعارى مەكتەبى, ءبىلىم بەرۋدىڭ جوعارى مەكتەبى جانە مەديتسينا مەكتەبى. ءاربىر مەكتەپتىڭ تاجىريبە ءبولىسۋ ماقساتىندا تىعىز قارىم-قاتىناس جاسايتىن حالىقارالىق ارىپتەسى بار. ول ارىپتەستەر الەمگە تانىمال جوعارى وقۋ ورىندارى اراسىنان تاڭداپ الىنعان. * * * نازارباەۆ ۋنيۆەرسيتەتتە جاستارعا تەك ءبىلىم بەرۋمەن قاتار عىلىمي-زەرتتەۋ باعىتىنا كوپ ءمان بەرىلەدى. قازىرگى كۇنى وندا ءۇش عىلىمي ورتالىق جۇمىس ىستەيدى. ولار – نازارباەۆ ۋنيۆەرسيتەتتىڭ زەرتتەۋ جانە يننوۆاتسيالىق جۇيەسى, ءومىر تۋرالى عىلىمي ورتالىق جانە ءبىلىم بەرۋدىڭ جوعارى مەكتەبى جانىنداعى ءبىلىم بەرۋ ساياساتى ورتالىعى. * * * نازارباەۆ ۋنيۆەرسيتەت كىتاپحاناسىن ەرەكشە اتاپ وتۋگە تۋرا كەلەدى. ونىڭ وقۋ زالدارى 250 ادامعا ارنالعان. ولاردا 100-دەن استام كومپيۋتەر ورنالاستىرىلعان. بۇل ەلىمىزدەگى اقپاراتتىق رەسۋرستاردىڭ اعىلشىن تىلدىك كوللەكتسياسىنا ەڭ باي كىتاپحانا. ونىڭ قورى كىتاپتاردان, مەرزىمدىك باسىلىمداردان جانە ەلەكتروندىق رەسۋرستاردان تۇرادى. ءبىر ەسەپتەن العاندا ونى سۋپەرتەحنولوگيالىق كىتاپحانا دەپ تە ايتۋعا بولادى. مۇندا 60-قا جۋىق تولىق تەكستى عىلىمي بازاعا, عىلىمي-تانىمدىق جۋرنالداردىڭ ميلليوننان استام ماقالالارىنا ەركىن كىرۋگە بولادى. مۇنىڭ سىرتىندا 100 مىڭعا تارتا ەلەكتروندىق كىتاپتار بار. وسىناۋ ءبىلىم ساقتاۋ مەكەمەسىنەن بۇكىل قازاقستان مەن تمد ەلدەرىندە جوق كىتاپتاردى دا تابۋعا بولادى. * * * جۋىقتا عانا استانادا وتكەن قازاقستان پرەزيدەنتى جانىنداعى شەتەل ينۆەستورلارى كەڭەسىنىڭ كەزەكتى پلەنارلىق وتىرىسىندا ينۆەستيتسيالار جانە دامۋ ءمينيسترى اسەت يسەكەشەۆ General Electric, Microsoft, Intel جانە باسقا دا الەمدىك دەڭگەيدەگى ءىرى كومپانيالار «نازارباەۆ ۋنيۆەرسيتەت» ينتەللەكتۋالدىق-يننوۆاتسيالىق كلاستەرى اۋماعىندا وزدەرىنىڭ كورپوراتيۆتىك ورتالىقتارىن اشاتىندىعىن مالىمدەدى. ءمينيستردىڭ اتاپ وتكەنىندەي, وسىنداي ماقساتتا 90-نان استام ءىرى كومپانيالارمەن كەلىسسوزدەر جۇرگىزىلگەن. سولاردىڭ 6-ۋىمەن مەموراندۋم جاسالىنعان. سۋرەتتەردى تۇسىرگەن ەرلان وماروۆ.
