ەرەكشە بەلسەندىلىك تانىتىلدى

تاڭبوزىنان ءبىر بايقاعانىم, بيىلعى سايلاۋدا ۇلكەن ەرەكشەلىك بار سەكىلدى... قازىر الماتىدا قۇستىڭ قاناتىمەن كەلگەن سۇلۋ كوكتەم. سول كوكتەممەن بىرگە ەرتەمەن سايراعان بۇلبۇل ءۇنىن كۇندە ەستيمىز. عاجاپ اۋەن! ال, بۇگىن بۇلبۇلدىڭ نازىك ۇنىنە مەرەكەلىك ءان مەن كۇي قوسىلىپ, قالا كوشەلەرى مەن باۋلارى ءبىر شادىمان شاتتىققا ۇلاسىپ كەتىپتى. الماتى تۇگەل ءان سالىپ تۇرعانداي. تابيعات تا ءدۇر سىلكىنىپ, قۇلپىرا جاسانىپ كەتكەن. مەرەكە دەپ, مىنەكي, وسىنى ايت! ەڭ باستىسى – بيىلعى سايلاۋ­شىلاردىڭ كوڭىل-كۇيلەرى دە ارۋ كوكتەمدەي كوتەرىڭكى ەكەنىن بايقادىق. سودان با, ولار وزگەشە بەلسەندىلىك تانىتۋدا. ءتىپتى ءبىزدىڭ ۋچاسكەدە سايلاۋشىلاردىڭ كوپتىگىنەن قايتا-قايتا كەزەككە تۇرىپ قالىپ جاتىر. كەيبىر ادامداردى سوزگە تارتىپ, سىر اقتارىپ, اڭگىمەلەسىپ تە كوردىك. سودان ۇققانىم مىناۋ بولدى... بىرىنشىدەن – سايلاۋشىلاردىڭ ساياسي كوزقاراسى ايقىن, تۇعىرى نىق, وزدەرىنىڭ ازاماتتىق پارىزىن, بيىك جاۋاپكەرشىلىكتەرىن جاقسى تۇسىنەدى. ەكىنشىدەن, «تۇراقتىلىق, تاتۋلىق, قوعامدىق كەلىسىم» دەگەن سوزدەردى ەلباسى تاۋەل­سىزدىگىمىزدىڭ ءبىرىنشى كۇنى­نەن بەرى تانباي ايتىپ كەلە جاتقانىن بىلەمىز. نەسىن جاسىرامىز, كەيدە وسى سوزدەر ابدەن ىعىر بولعانداي كورىنىپ كەتەتىنى بار. ەندى قاراڭىز, وسى ءبىر قاراپايىم سوزدەردىڭ ءمانى مەن ماڭىزىن, اقيقاتى مەن شىن­دىعىن سوڭعى جىلدارى قازاقستاندىقتار دۇرىس ءتۇسىنىپ, تەرەڭنەن پايىمداعانداي. وعان سەبەپ – ىرگەدەگى كورشى ەلدەردە بولىپ جاتقان الۋان وقيعالار بولسا كەرەك. اسىرەسە, ۋكرايناداعى قانتوگىس قازاقستاندىقتارعا, اسىرەسە, قازاق اعايىنعا زور ساباق بولدى. ۋكرايناداي الپاۋىت مەملەكەتتى تورعايداي توزدىرعان جاعداي – ءبىزدىڭ ازاماتتاردى ۇيقىسىنان سەرپىلگەندەي كۇيگە ءتۇسىردى, وي تاستادى. تاۋەلسىزدىك تە, ەلدىڭ تاعدىرى, جەردىڭ تۇتاستىعى دا – اباي بولماساڭ, ۇستارانىڭ جۇزىندەي نازىك ماسەلە ەكەنىنە كوزدەرى ابدەن جەتتى. سوندىقتان بۇل جاعداي حالقىمىزدى قوعامدىق تاتۋلىق پەن بىرلىككە شاقىرىپ, ەلباسىنىڭ ماڭايىنا ودان ءارى تىعىز توپتاسا تۇسۋىنە سەبەپشى بولۋدا. جۇرتشىلىقتىڭ بيىلعى سايلاۋعا ەرەكشە بەلسەندىلىك تانىتۋىنىڭ ۇلكەن سىرى وسىندا دەگەن ويدامىن. الىبەك اسقاروۆ, جازۋشى, مەملەكەتتىك سىيلىقتىڭ لاۋرەاتى.