تامىزدىڭ 21-ءى كۇنى جىمپيتى جەرىندە «قازاقستان حالقىنا» قوعامدىق قورىنىڭ قارجىسىنا سالىنعان 100 ءۇيدىڭ كىلتى باسپانا يەلەرىنە سالتاناتتى تۇردە تابىس ەتىلدى. وسىدان از عانا كۇن بۇرىن 14 ءۇي بەرىلگەن ەدى. وسىلايشا, سىرىم اۋدانىندا بارلىعى 114 ءۇي سالىندى. اتاپ ايتساق, ولەڭتى اۋىلىندا – 40, جىمپيتىدا – 48, بۇلدىرتى اۋىلىندا – 25 جانە كوزدىقارا اۋىلىندا 1 ءۇي پايدالانۋعا بەرىلدى. بۇل بيىلعى سۋ تاسقىنىندا تابيعي اپات سەبەبىنەن ادام تۇرۋعا جارامسىز دەپ تانىلعان باسپانالار بولاتىن.
زارداپ شەگۋشىلەردى جارىلقاعان قورعا ريزا بولعان تۇرعىندار جىمپيتى اۋىلىندا پايدا بولعان شاعىن اۋداندى «قازاقستان حالقىنا» دەپ اتاۋدى ۇيعارىپتى.
سالتاناتتى ءىس-شاراعا باتىس قازاقستان وبلىسىنىڭ اكىمى ناريمان تورەعاليەۆ پەن «قازاقستان حالقىنا» قورىنىڭ توراعاسى بولات جامىشەۆ كەلىپ, جاڭا قونىس يەلەرىن قۇتتىقتادى.
«پرەزيدەنت تاپسىرماسىمەن قۇرىلعان «قازاقستان حالقىنا» قورى قيىن-قىستاۋ كەزەڭدە وتانداستارىمىزعا قول ۇشىن بەردى. بيىل ەلىمىزدىڭ بىرنەشە ءوڭىرى الاپات سۋ تاسقىنىنان زارداپ شەكتى. سول كەزدە ءبىزدىڭ قور ەلىمىزدىڭ 5 وڭىرىندە 20 ەلدى مەكەندە 627 تۇرعىن ءۇي سالۋعا اتسالىستى. بۇگىن مىنە, سىرىم اۋدانىندا سالىنعان جاڭا ۇيلەردىڭ كىلتى تابىس ەتىلدى. ءبىزدىڭ مەتسەناتتارىمىزدىڭ, باتىس قازاقستان وبلىسى اكىمدىگىنىڭ, قۇرىلىسشىلار مەن «قازاقستان حالقىنا» قورىنىڭ بىرلەسكەن جۇمىسىنىڭ ارقاسىندا سىرىم اۋدانىندا 114 جاڭا ءۇي سالىندى», دەيدى قوعامدىق قور توراعاسى بولات جامىشەۆ.
وڭىردەگى توتەنشە جاعدايدىڭ زاردابىن جويۋعا قولداۋ كورسەتكەنى ءۇشىن وبلىس اكىمى ناريمان تورەعاليەۆ «قازاقستان حالقىنا» قورىنا العىس ايتتى.
«مەملەكەت باسشىسى سۋ تاسقىنىنان زارداپ شەككەن ازاماتتاردى بارلىق قاجەتتىلىكپەن قامتاماسىز ەتۋدى تاپسىرعان ەدى. وسىعان وراي ءبىز تابيعي اپاتقا ۇشىراعان وبلىس تۇرعىندارىنىڭ ءتيىستى اقشالاي وتەماقىسىن ۋاقتىلى بەرىپ, باسپانامەن تولىق قامتۋ ءۇشىن قولدان كەلگەننىڭ ءبارىن جاسايمىز. بۇعان مەتسەناتتار مەن ۇكىمەتتىك ەمەس ۇيىمدار ۇلكەن قولداۋ كورسەتىپ جاتىر. بۇگىن ەرەكشە كومەگى ءۇشىن «قازاقستان حالقىنا» قوعامدىق قورىنا العىس ايتامىن», دەدى ن.تورەعاليەۆ.
قۇرىلىس الاڭدارىنداعى قاربالاس جۇمىس اتالعان قور مەن بقو اكىمدىگى اراسىندا مەموراندۋمعا قول قويىلعاننان كەيىن باستالعان ەدى. اكىمدىك سۋ باسۋ قاۋپى جوق اۋماقتان جاڭا ءۇي سالۋ ءۇشىن جەر تەلىمدەرىن انىقتاپ, ءبولدى. سونداي-اق قاجەتتى ينجەنەرلىك ينفراقۇرىلىمدى جۇرگىزدى. جاز بويى جەرگىلىكتى قوعام بەلسەندىلەرى قۇرىلىس جۇمىسىنىڭ بارىسى مەن ساپاسىن باقىلاپ, قاداعالاپ وتىردى. ەندى مىنە, 80 شارشىمەترلىك جاڭا ۇيلەر حالىقتىڭ يگىلىگىنە بەرىلىپ وتىر.
باتىس قازاقستان وبلىسى
