الماتى قالاسىنداعى 5571 اسكەري ءبولىمىنىڭ قاتارداعى قوس جاۋىنگەرى – شىمكەنت قالاسىنىڭ تۋمالارى. مەكتەپتەن بەرى اجىراماس دوستار جوعارى وقۋ ورنىنا دا بىرگە تۇسەدى. «اسكەري قىزمەت – ءاربىر ەر-ازاماتتىڭ وتان الدىنداعى بورىشى» دەپ سانايتىن ولار ون سەگىزگە تولا سالىسىمەن, وقۋلارىن ۋاقىتشا توقتاتىپ كەڭەس وداعىنىڭ باتىرى, گۆارديا پولكوۆنيگى باۋىرجان مومىش ۇلى اتىنداعى 5571 اسكەري بولىمىنە تۇسەدى. قىزىعى, قاتارداعى قوس جاۋىنگەر ءبىر ۋاقىتتا ءبىرىنشى جەدەل ماقساتتاعى باتالونعا ءبىرىنشى روتاعا تاپ بولادى. قىزمەت كەزىندە دە ەڭ العاشقى جاساققا دا بىرگە تۇسكەن. ءبىر قالادا ءوسىپ, ءبىر اسكەري بولىمگە تۇسكەن دوستاردىڭ ەسكە الار قىزىقتى ساتتەرى كوپ.
– ءبىزدىڭ باسىمىزدان وتكەن قىزىقتار ەڭ العاشقى وقۋ-جاتتىعۋ كەزىنەن باستاۋ الدى. وسى جەرگە كەلىپ دوستىعىمىز ودان سايىن نىعايا ءتۇستى. ءبىر روتا بولعاننان كەيىن كۇن سايىن ۋاقىتتى بىرگە وتكىزەمىز. كادىمگى ءبىر ءۇيدىڭ بالاسىنداي ەتەنە جاقىن ارالاسىپ كەتتىك. ۋاقىتتى دا وتە پايدالى ءارى قىزىقتى وتكىزۋگە تىرىسىپ ءجۇرمىز. اسىرەسە اسكەردەگى ەستەلىكتەر بىزگە وتە قىزىق, وزىمىزگە قاتتى ۇناپ ءجۇر. ءبىر-بىرىمىزگە قولداۋ كورسەتىپ جۇرگەننەن كەيىن ۋاقىتتىڭ قالاي تەز ءوتىپ جاتقانىن اڭعارماي دا قالدىق. اسكەرگە كەلگەنىمىزگە دە توعىز ايدان اسىپتى. ساناۋلى كۇندەردەن كەيىن ءۇي-ىشىمىزبەن, اعايىن-تۋعانمەن قايتا قاۋىشامىز, – دەيدى قاتارداعى راحات ۋسماناليەۆ.
«راحاتتىڭ ادامگەرشىلىك قاسيەتىنە ارقاشان ءتانتىمىن. ول وتە اقىلدى. كەز كەلگەن قادامدى اقىلعا سالىپ تارازىلايدى. اقكوڭىل, جاناشىر دوسىمنىڭ بارىنا ماقتانامىن. سوندىقتان ءوز ورتامىزدا ابىرويلى. كوڭىلىمە ەڭ جاقىن تارتقان قاسيەتى – بەرگەن ۋادەسىندە ارقاشان تۇراتىنى. اسكەري ومىرىمىزدە دە سەنىمگە سەلكەۋ تۇسىرمەيتىن قاسيەتى دە كوپ كومەگىن تيگىزىپ كەلەدى. دوستىقتىڭ دانەگى سەنىم مەن سىيلاستىقتا جاتىر. اقتىق دەمىم قالعانشا ادال دوس بولۋعا, كەز كەلگەن جاعدايدا كومەك بەرۋگە دايىنمىن», دەپ اعىنان جارىلدى ابىلاي ءدىناسىلوۆ.
اسكەري ومىردە قوساقتاسىپ جۇرگەن دوستار «سارباز بولۋ شىدامدىلىقتى, توزىمدىلىكتى ۇيرەتتى» دەيدى. وتان الدىنداعى جاۋاپكەرشىلىكتى سەزىنگەن ولار بۇرىن وتباسىنىڭ اتىنا كىر كەلتىرمەۋدى ويلاسا, قازىر حالىقتىڭ بالاسى اتانىپ, ەلدىڭ اتىنا سىزات تۇسىرمەۋگە سەرتتەسكەن. سەنىم مەن بىرلىكتى تۋ ەتە بىلگەن قوس ساربازدىڭ سەرتتەرىندە تۇرىپ, سەنىمگە سەلكەۋ تۇسىرمەسىنە كەپىلدىك مول. ءبىز دە اينىماس ادال دوستىقتارى ماڭگى بولىپ, ابىرويلى قىزمەت اتقاراتىن ادال ازامات بولۋىن تىلەدىك.
