فوتو: abai.kz
ءىس-شارانىڭ نەگىزگى ماقساتى – بۇقارالىق اقپارات قۇرالدارىنىڭ وكىلدەرىنە ءدىني ماسەلەلەردى دۇرىس جاريالاۋدا كومەك كورسەتۋ, سونداي-اق تاقىرىپتى كاسىبي تۇردە جاريالاۋ داعدىلارىن شىڭداۋعا مۇمكىندىك بەرۋ. سەميناردى اشقان ورتالىقتىڭ باسقارما توراعاسىنىڭ مىندەتىن اتقارۋشى دياننا ەسەنوۆا ماتەريالداردى دايىنداۋ كەزىندە دۇرىس ءدىني تەرميندەر مەن ۇعىمداردى قولدانۋدىڭ ماڭىزدىلىعىن اتاپ ءوتتى.
ء«دىن – وتە وزەكتى ءارى نازىك تاقىرىپ. بۇل سالادا ماقالا جازۋدا نەمەسە سيۋجەت تۇسىرۋدە ساقتىق پەن ۇقىپتىلىق كەرەك. ەشكىمنىڭ ءدىني سەنىمىن قورلاۋعا, دىنارالىق نارازىلىق تۋعىزۋعا, زايىرلى مەملەكەتتىڭ ۇستانىمدارىنا قايشى اقپاراتتاردى شىعارۋعا جول بەرمەگەن ءلازىم. ءاربىر ءجۋرناليستىڭ, بلوگەردىڭ ماقساتى – ەل ىشىنە دۇربەلەڭ سالۋ ەمەس, قوعامنىڭ بىرلىگى مەن تىنىشتىعىن ساقتاۋعا ۇلەس قوسۋ. سول سەبەپتى ءدىني اقپاراتتى جازۋعا ۇلكەن جاۋاپكەرشىلىكپەن كەلگەن ءجون», دەدى ول.
سونىمەن قاتار ترەنينگ جۇمىسىنا قاتىسقان مادەنيەت جانە اقپارات مينيسترلىگى ءدىن ىستەرى كوميتەتى ءدىني ەكسترەميزمنىڭ الدىن الۋدى ينتەرنەت-كەڭىستىگىندە ۇيلەستىرۋ باسقارماسىنىڭ باسشىسى جاپال دوليەۆ تاقىرىپتى ودان ءارى قاۋزاپ, باق-تا ءدىني ماتەريال جاريالاۋدىڭ ناقتى كەيستەرىنە توقتالدى.
جيىن بارىسىندا قاتىسۋشىلار جەتەكشى ساراپشىلاردان ءدىني تاقىرىپتاردى دۇرىس جاريالاۋ ماسەلەلەرىنە قاتىستى قۇندى ۇسىنىستار الىپ, وزەكتى ماسەلەلەر مەن سىن-قاتەرلەردى تالقىلادى. ەتيكالىق اسپەكتىلەرگە, بەيتاراپتىق پەن وبەكتيۆتىلىك قاعيداتتارىنا, سونداي-اق ءدىني توزىمدىلىكتى ساقتاۋ مەن ەلدەگى ءارتۇرلى كونفەسسيالاردى قۇرمەتتەۋ ماسەلەلەرىنە ەرەكشە نازار اۋداردى.
ايتا كەتسەك, كەيىنگى جىلدارى ءدىن تاقىرىبىندا جازۋ – سالالىق جۋرناليستيكا باعىتى رەتىندە دامىپ كەلەدى. بۇل – ۋاقىت تالابىنان تۋىنداعان ماڭىزدى ءۇردىس. ءدىني ماقالا نەمەسە اقپاراتتى وسى سالادا توسەلگەن, ءدىني تەرميندەردەن حابارى بار, ءاربىر ءدىننىڭ نەگىزگى ەرەكشەلىكتەرى مەن قاعيداتتارىن بىلەتىن ادامنىڭ جازعانى ءجون. بۇل ەل ىشىندە ءدىني الاۋىزدىقتىڭ تۋىنداماۋىنا جانە سىني ويلاۋ قابىلەتى تومەن جانداردىڭ اداسپاۋىنا سەبەپ بولماق. وسى جانە وزگە دە ماڭىزدى ويلار ايتىلعان سەميناردىڭ سوڭىندا بارلىق قاتىسۋشىعا سەرتيفيكات تاپسىرىلدى.
