جيىندا Respublica پارتياسىنىڭ توراعاسى سايلاۋشىلاردان تۇسەتىن شاعىمداردى كوتەردى, سونىڭ ىشىندە شارۋالارعا سۋبسيديالاردىڭ ۋاقتىلى تولەنبەۋى. ءوز كەزەگىندە شىعىس قازاقستان وبلىسىنىڭ اۋىل شارۋاشىلىعى تاۋار وندىرۋشىلەرى سۇراقتارىن قويىپ, ۇسىنىستارىن ايتتى.
مايلى داقىلدار تاجىريبە شارۋاشىلىعىنىڭ باس ديرەكتورى فاريد ابىتاەۆ شىعىس ءوڭىرى تۇقىم سەلەكتسياسى حابىنا اينالىپ, بۇكىل قازاقستاندى ساپالى تۇقىممەن قامتاماسىز ەتە الاتىنىن اتاپ ءوتتى. دەگەنمەن بۇل ءۇشىن سۋبسيديالاۋ جۇيەسىن قايتا قاراۋ ارقىلى مال ششارۋاشىلىعىمەن اينالىسىپ وتىرعانداردى قولداۋ قاجەت.
«ۆوستوك-مولوكو» كورپوراتسياسىنىڭ باس ديرەكتورى سەيىلجان سايلاۋباەۆ مال شارۋاشىلىعىندا قوردالانىپ قالعان ماسەلەلەردى كوتەردى. بۇل – مالعا برۋتسەللەز اۋرۋىنىڭ تارالۋى, رەسپۋبليكالىق ۆەتەريناريالىق زەرتحانالار جۇمىسىنداعى ماسەلەلەر, جانۋارلاردى يدەنتيفيكاتسيالاۋ ماسەلەلەرى, مال قوزعالىسىن باقىلاۋ قاجەتتىلىگى, ۆەتەريناريالىق پۋنكتتەردى قارجىلاندىرۋ, ۆەتەريناريالىق باقىلاۋ جۇيەسىنىڭ قۇرىلىمى. كاسىپورىن باسشىسى ەلگە ۆەتەريناريا اگەنتتىگىنىڭ قاجەت ەكەنىن ايتتى.
جيىن بارىسىندا ءسوز العان ستاندارتتاۋ جانە سەرتيفيكاتتاۋ ۇلتتىق ورتالىعى وبلىستىق فيليالىنىڭ باسشىسى مايرا سادىقوۆا ورتالىق زەرتحانالارىن زاماناۋي زەرتتەۋلەردى جىلدام جۇرگىزۋگە مۇمكىندىك بەرەتىن قۇرال-جابدىقتارمەن جابدىقتاۋ قاجەتتىگىن ورتاعا سالدى. مەرينوس جۇنىنەن تاۋار وندىرەتىن «بىزدىكى» سەرىكتەستىگى وتاندىق تاۋاردى ءىرى ساۋدا جەلىلەرى ارقىلى وتكىزۋ ءۇشىن ساۋدا ورنىن قىمباتقا جالعا بەرۋ ماسەلەسىن دە جەتكىزدى.
«وڭىردە ماسەلە كوپ. سونىڭ ءبىرى – جايىلىمنىڭ جوقتىعى, جەر بەرىلگەننەن كەيىن ەرەجە قابىلدانعان سوڭ جەردى قايتارىپ الۋ. باتىس قازاقستان وبلىسىندا بۇگىندە شارۋالار كوتەرگەن مۇنداي ماسەلەلەر ءىس جۇزىندە شەشىمىن تاپتى. ءبىزدىڭ پارتيا اياققا نىق تۇرعان شاعىن بيزنەس ەلىمىزدىڭ بولاشاعى ەكەنىن جاقسى تۇسىنەدى. ءبىز كاسىپكەرلەردىڭ مۇددەسىن قورعاپ جاتىرمىز», دەپ تۇيىندەدى ءسوزىن ايداربەك قوجانازاروۆ.
وڭىرلەردە كوتەرىلگەن ماسەلەلەردى ماجىلىستەگى پارتيا فراكتسياسى الداعى ۋاقىتتا نازارعا الاتىنىن ايتتى.
