جەرلەستەر تاڭداۋ جاسادى

«ەگەمەن قازاقستاننىڭ» مەنشىكتى ءتىلشىسى داۋرەن باۋىرجان ۇلى بەيجىڭنەن حابارلايدى: شەت مەملەكەتتەردە جۇرگەن وتانداستارىمىز دا سايلاۋ كۇنى ازاماتتىق بورىشى تۋرالى ۇمىتپادى. جىراقتا جۇرسە دە جەرلەستەرىمىز جەرگىلىكتى ديپلوماتيالىق وكىلدىكتەرىنە بارىپ داۋىس بەردى. باستى ساياسي ناۋقان مەرزىمىندە قىتاي حالىق رەسپۋبليكاسى تەرريتورياسىندا بولعان قازاقستان ازاماتتارى ەرەكشە بەلسەندىلىك تانىتتى. قىتاي قازاقستانمەن شەكارالاس ءارى جاقىن ستراتەگيالىق سەرىكتەس مەملەكەت بولعاندىقتان, مۇندا قازاقستاندىق ازاماتتار ءجيى بارادى. ولار كوبىنەسە وقۋعا, ەمدەلۋگە, تۋريزم جانە قىزمەت بابىمەن كورشى ەلگە ساپار شەگەدى. سايلاۋشى رەتىندە تىركەلگەن ادام­داردىڭ تولىعى دەرلىك كەشە كونستي­تۋ­تسيالىق قۇقىقتارىن پايدالانىپ, وزدە­رىنىڭ قالاعان كانديداتتارىنا داۋىس بەردى. قىتاي ۋاقىتتىق بەلدەۋى استا­نا­دان ەكى ساعات الدا. قىتايداعى سايلاۋ جەر­گىلىكتى ۋاقىت بويىنشا جەتىدە, ال ءبىز­شە بەستە باستالدى. تەك بەيجىڭ­نىڭ وزىندە ءبىر كۇن ىشىندە 1,5 مىڭ, ال شانحايدا 400-گە جۋىق ادام ءوز تاڭداۋىن جاسادى. جالپى بەيجىڭ, گونگكونگ, شانحاي, ءۇرىمجى قالالارىندا ورنالاسقان سايلاۋ ۋچاسكەلەرىنە كەلىپ داۋىس بەرۋشىلەر مەرەكەلىك كوڭىل-كۇيدە بولدى. سايلاۋشىلاردىڭ باسىم بولىگىن قۇرايتىن ستۋدەنتتەردىڭ كوبى ءۇشىن بۇل تۇڭعىش سايلاۋ. سوندىقتان ەلگەزەك ­جاستارىمىز بۇعان اسا جاۋاپكەرشى­لىك­پەن قارادى. ولاردىڭ ايتۋىنشا شەت مەملەكەتتە ءجۇرىپ ءوز ەلىڭدە بولىپ جاتقان ساياسي ناۋقانعا اتسالىسۋ مۇمكىندىگى – مەملەكەتىمىزدىڭ ەگەمەندىگىن, تاۋەلسىزدىگىن, الەم ارەناسىنداعى بە­دەلىنىڭ ايعاعى. بەيجىڭدەگى قازاقستاندىق ستۋدەنتتەر ۇيىمىنىڭ جەتەكشىسى ءاشىم دۇرىسكەلدى سايلاۋدى ءوز ومىرىندەگى ەڭ ەلەۋلى وقيعا دەپ بىلەدى. «بۇل مەنىڭ تۇڭعىش رەت مەملەكەت تاع­دىرىنا, تاريحىنا قوسقان ۇلەسىم. وسى تەك­تەس شارالار, جاستاردى, جالپى حا­لىقتى پاتريوتتىققا تاربيەلەپ, ءبىر­لىككە شا­قىرادى. سوندىقتان بۇگىنگى تاڭدا سايلاۋ – ەڭ ماڭىزدى شارۋا», – دەدى ول. قىتايدا ءبىلىم الىپ جاتقان بارشا ستۋدەنتتەردىڭ تىلەگى دە وسىعان سايادى. ەڭ باستىسى, ولار ەل تاعدىرىنا بەيجاي قاراي المايتىنىن كورسەتتى. جالپى, بۇل ەلدە تۇرىپ جاتقان جەرلەستەرىمىز ازاماتتىق بەلسەندىلىگىن تولىق تانىتتى دەۋگە تولىق نەگىز بار.