فوتو: اقوردا
مەملەكەت باسشىسى, ەڭ الدىمەن, «استانا ارەنا» ستاديونىن ارالاپ كوردى. مۇندا حالىقارالىق سپورتتىق-مادەني ءىس-شارانىڭ اشىلۋ سالتاناتى وتەدى. وتىز مىڭ كورەرمەن ەركىن سىياتىن ستاديونعا جىل بويى كۇردەلى جوندەۋ جۇرگىزىلدى. قازىرگى كەزدە اباتتاندىرۋ جۇمىستارى اياقتالىپ, جابدىقتارى تولىقتاي جاڭارتىلدى.
قاسىم-جومارت توقاەۆقا «Qazaqstan» جەڭىل اتلەتيكا كەشەنىندە ورنالاسقان اككرەديتتەۋ ورتالىعىنىڭ جۇمىسى, كوشپەلىلەر ويىنىنا قاتىساتىن ۇلتتىق قۇرامانىڭ كيىم ۇلگىسى تانىستىرىلدى. حالىقارالىق ءىس-شاراعا 1500 ەرىكتى تارتىلادى.
سپورت جانە تۋريزم ءمينيسترى ەرمەك مارجىقپاەۆ ۇلتتىق قۇرامانىڭ ازىرلىگى جونىندە باياندادى. ونىڭ ايتۋىنشا, وسى ۋاقىتقا دەيىن حالىقارالىق جانە رەسپۋبليكالىق دەڭگەيدە 42 وقۋ-جاتتىعۋ جيىنى وتكەن. سونداي-اق سپورتشىلار 7 حالىقارالىق جانە 25 رەسپۋبليكالىق تۋرنيرگە قاتىسقان.
جالپى V دۇنيەجۇزىلىك كوشپەلىلەر ويىندارىنا الەمنىڭ 89 ەلىنەن 2800 قاتىسۋشى مەن رەسمي دەلەگاتسيا مۇشەلەرى كەلەدى. سايىستىڭ 21 تۇرىنەن 97 مەدال ساراپقا سالىنادى. نەگىزگى جارىستار «استانا-ارەنا» ستاديونى, «قازانات» يپپودرومى, «الاۋ» مۇز سارايى, جاقسىلىق ۇشكەمپىروۆ اتىنداعى جەكپە-جەك سارايى, «دۋمان» قوناق ءۇي-سپورت كەشەنىندە وتەدى. ال جامبى اتۋ مەن تەڭگە ىلۋگە ارنايى الاڭ جاساقتالعان.
حالىقارالىق دودا اياسىندا 150-دەن استام مادەني ءىس-شارا جوسپارلانعان. ماسەلەن, ەتنواۋىلدا كوشپەلىلەر مادەنيەتى مۋزەيى, قولونەرشىلەر جانە مۇسىندەر كورمەسى, ال ۇلتتىق مۋزەيدە «كوشپەندى حالىق: تاريح, تانىم, تاعىلىم» اتتى حالىقارالىق عىلىمي-پراكتيكالىق كونفەرەنتسيا ۇيىمداستىرىلادى.
الدىن الا بولجامعا سايكەس, وسى كۇندەرى ەلورداعا 100 مىڭعا جۋىق تۋريست كەلۋى مۇمكىن. وسىعان وراي 20-دان استام قوناق ءۇيدىڭ, سونداي-اق تۋريستەر ءجيى باراتىن ورىنداردىڭ دايىندىعى پىسىقتالىپ, قالا كوشەلەرىن اباتتاندىرۋ, بەزەندىرۋ جۇمىستارى قارقىندى جۇرگىزىلىپ جاتىر.
