سەناتتىڭ قولداۋىمەن قازاقستان شاحمات فەدەراتسياسىنىڭ ۇيىمداستىرۋىمەن العاش رەت وتكىزىلىپ وتىرعان سايىسقا وبلىستار مەن رەسپۋبليكالىق ماڭىزى بار قالالاردىڭ ءماسليحات دەپۋتاتتارى, وبلىستىق جانە قالالىق قوعامدىق كەڭەستەردىڭ مۇشەلەرى, سونداي-اق باق وكىلدەرى قاتىسىپ جاتىر.
الماتىدا وتكەن سوڭعى جارتىلاي فينالدىق باسەكەدە «شىعىس» وڭىرىندەگى 100-دەن استام اۋەسقوي شاحماتشى باق سىنادى. ولار – الماتى قالاسى مەن شىعىس قازاقستان, اباي, الماتى جانە جەتىسۋ وبلىستارىندا ۇيىمداستىرىلعان ىرىكتەۋ كەزەڭدەرىنىڭ جەڭىمپازدارى. جارتىلاي فينال سايىسىنىڭ اشىلۋ راسىمىنە قالالىق ءماسليحاتتىڭ توراعاسى مەيىرجان وتىنشيەۆ جانە قازاقستان شاحمات فەدەراتسياسىنىڭ وكىلدەرى قاتىستى.
17 تامىز كۇنى 9 تۋردان تۇرعان راپيد جارىسىندا «شىعىس» وڭىرىنەن Senat Open فينالىنا جولداما العان 25 شاحماتشى بەلگىلى بولدى. جارىس سوڭىندا دەپۋتاتتار, جۋرناليستەر, قوعام بەلسەندىلەرى, ايەلدەر جانە 60 جاستان اسقاندار اراسىندا ۇزدىكتەر انىقتالىپ, ارنايى سەرتيفيكاتتارمەن ماراپاتتالدى.
سايىستىڭ فينالدىق باسەكەسى تامىزدىڭ سوڭىندا استانا قالاسىندا وتەدى. شەشۋشى سىندا 200-گە جۋىق اۋەسقوي شاحماتشى ءوزارا مىقتىنى انىقتايدى. ولاردىڭ قاتارىندا پارلامەنت دەپۋتاتتارى مەن رەسپۋبليكالىق باق-تىڭ جۋرناليستەرى دە بار.
