فوتو: ۇلتتىق سپورت قاۋىمداستىعى
ساداقشىلار ءدۇبىرلى دودادا سايىس وتەتىن «قازانات» يپپودرومىندا جاتتىعىپ جاتىر.
ءداستۇرلى ساداق اتۋدان ۇلتتىق قۇراما باس باپكەرى دياس احمەتوۆتىڭ ايتۋىنشا, بۇگىندە دكو اياسىندا وتەتىن ءداستۇرلى ساداق اتۋ سايىسىنا قاتىسۋعا 35 مەملەكەتتەن ءوتىنىش تۇسكەن.
«قازىر اككرەديتاتسيا جۇمىستارى جۇرگىزىلىپ جاتىر. بايراقتى باسەكەدە تۇركيا, مالايزيا, قىرعىزستان, ۆەنگريا, رەسەي سىندى مەملەكەتتەردىڭ ساداقشىلارى جاقسى ونەر كورسەتەتىنى بەلگىلى. دەگەنمەن, ءبىزدىڭ سپورتشىلارىمىز وزدەرىنىڭ مىقتىلىعىن دالەلدەيتىنىنە سەنىمدىمىن», دەدى دياس احمەتوۆ.
ەلوردادا وتەتىن باسەكەگە ەل سپورتشىلارى تىڭعىلىقتى دايىندالىپ جاتىر. ولار دۇنيەجۇزىلىك كوشپەلىلەر ويىندارىنىڭ قازاقستاندا ۇيىمداستىرىلۋى ۇلكەن جاۋاپكەرشىلىك جۇكتەيتىنىن ايتتى.
«بۇل جارىس ءبىزدىڭ الاڭدا وتەتىن بولعاندىقتان موينىمىزدا زور جاۋاپكەرشىلىك بار ەكەنىن بىلەمىز. ال سايىس وتەتىن الاڭدا جاتتىعۋ ءبىز ءۇشىن جاقسى مۇمكىندىك. ويتكەنى بۇل جەردى تولىق زەرتتەپ, كليماتىن, جەل جىلدامدىعىن, نىسانانىڭ ورنالاسۋى سىندى ماڭىزدى تۇستاردى ءتۇرتىپ الىپ جاتىرمىز», دەدى ساداق اتۋدان ۇلتتىق قۇراما مۇشەسى باقبەرگەن ءسالىموۆ.
ايتا كەتەيىك, 8-13 قىركۇيەكتە استانا قالاسىندا 5-ءشى دۇنيەجۇزىلىك كوشپەلىلەر ويىندارى وتەدى. ءىس-شاراعا 89 ەلدەن 2000-نان استام سپورتشى قاتىسادى دەپ جوسپارلانىپ وتىر.
