فوتو: atamura.info
تەكسەرۋ بارىسىندا ايىرتاۋ اۋداندىق پروكۋراتۋراسى بالاباقشالاردىڭ ءبىرىنىڭ قىزمەتكەرلەرى مەكتەپكە دەيىنگى ۇيىمعا ءىس جۇزىندە بارمايتىن بالالاردى تىركەۋ ارقىلى بيۋدجەت قاراجاتىن زاڭسىز العاندارىن انىقتادى.
بۇل ارەكەتتەردىڭ بارلىعى سوڭعى 3 جىلدا 2021-2024 جىلدار ارالىعىندا جاسالعان. سونىمەن قاتار ايىرتاۋ اۋداندىق پروكۋراتۋراسىمەن اۋداندىق ءبىلىم ءبولىمىنىڭ قىزمەتكەرلەرىنە قاتىستى باستالعان سوتقا دەيىنگى تەرگەپ-تەكسەرۋ جالعاسىپ جاتىر.
«قىلمىستىق-پروتسەستىك كودەكستىڭ 201-بابىنىڭ تالاپتارىنا سايكەس سوتقا دەيىنگى تەرگەپ-تەكسەرۋ دەرەكتەرى جاريا ەتۋگە جاتپايدى», دەلىنگەن پروكۋراتۋرانىڭ جازباسىندا.
سونىمەن قاتار تەكسەرۋلەر بارىسىندا ءورت قاۋىپسىزدىگى, سانيتارلىق نورمالار, بالالاردىڭ ينتەرنەت جەلىسىندە تىيىم سالىنعان اقپاراتقا قول جەتكىزۋى جانە ت.ب. سالالاردا بىرقاتار بۇزۋشىلىق انىقتالدى.
انىقتالعان زاڭ بۇزۋشىلىقتار بويىنشا قاداعالاۋ اكتىسى ەنگىزىلىپ, كىنالىلەر ءتۇرلى جاۋاپكەرشىلىككە تارتىلدى.
كامەلەتكە تولماعانداردىڭ قۇقىقتارىن قورعاۋ سالاسىنداعى قاداعالاۋ جۇمىستارى جالعاسىپ كەلەدى جانە اۋداندىق پروكۋراتۋرانىڭ ەرەكشە باقىلاۋىندا.
