الماتى
كەزەكتەن تىس پرەزيدەنتتىك سايلاۋعا الماتى قالاسىنىڭ جۇرتشىلىعى ءبىر كىسىدەي تاڭ ازاننان قاتىسىپ, قالا اۋداندارىندا وتكىزىلگەن جەكسەنبىلىك ويىن-ساۋىق مەيرامدارىنا بارۋعا دا ۋاقىت تاپتى. بۇل كۇنى قالادا ادەتتەگىدەي جەكسەنبىلىك كوڭىل-كۇيمەن قاتار, مەرەكەلىك ەكپىن, قالا تۇرعىندارى مەن قوناقتارىنىڭ جانىن جادىراتار جاعداي تولىقتاي سالتانات قۇردى.
الماتى قالاسى بويىنشا سايلاۋ كۇنى حالىقتىڭ 17,25 پايىزى, ياعني تۇرعىلىقتى حالىقتىڭ قالالىق تۇراقتى بۋىنى ءوز داۋىسىن بەرىپ ۇلگەردى. بۇل از كورسەتكىش ەمەس. قالاعا كەيىننەن كەلىپ قوسىلعان, قالا مەجەسىندە تىركەلگەن قالالىقتار توبى تولاسسىز داۋىس بەرۋ ورتالىقتارىنا باس سۇعۋ ارقىلى, بۇعان دەيىنگى تىركەلگەن مەجەنى ەداۋىر العا جىلجىتتى. بۇل سايلاۋ بارشا ەل ءۇشىن جاۋاپتى دا ساياسي سەرپىلىس جاساۋ مۇمكىندىگى ەكەنىن قالاداعى ءاربىر سايلاۋ ۋچاسكەسىنە اعىلعان جۇرت ايقىندادى.
الماتى قالاسىنداعى جاڭادان اشىلعان الاتاۋ اۋدانىنىڭ تۇرعىنى 100 جاستاعى كەيۋانا ءماميليا ءالىمباەۆانىڭ (سۋرەتتە) «شاڭىراق» شاعىن اۋدانىنداعى №26 مەكتەپ زالىنا, №20 سايلاۋ ۋچاسكەسىنە ءوز اياعىمەن كىرىپ كەلۋىنىڭ ءوزى سايلاۋعا قاتىسۋشىلاردى ءبىر سەرپىلتىپ تاستادى. سول جەردەگى توپ 100 جاساعان انامەن سۋرەتكە ءتۇسىپ, ەستەلىك ءۇشىن انا باتاسىن الۋعا اسىقتى. م.ءالىمباەۆا اپامىز ءوزىنىڭ ازاماتتىق پارىزى – داۋىس بەرۋ قۇقىعىن ورىنداي وتىرىپ, سايلاۋ ۋچاسكەسىندەگى جاماعاتقا ءوز باسىنان كەشىرگەن عۇمىرلىق شەجىرەسىنەن حابار بەرىپ, بارشا قاۋىمعا, بۇگىنگى سايلاۋعا ءتۇسىپ جاتقان ازاماتتاردىڭ بارشاسىنا تىلەك تىلەپ, باتا بەردى.
سوتسياليستىك ەڭبەك ەرى, 7 بالا, 25 نەمەرە, 16 شوبەرە, 7 شوپشەكتىڭ ۇلى اناسى ءماميليا اپا قازاقستان مەملەكەتىنىڭ بۇگىنگى شىققان بەلەسى مەن باعىندىرعان بيىكتەرىنە ۇلكەن قۋانىشىن بىلدىرە وتىرىپ, الدا قازاق ەلىنىڭ اسار اسۋى مەن جەتەر جەڭىسىنىڭ مولدىعىنا بەك سەنىمدى ەكەنىن مالىمدەدى.
اقتاۋ
سايلاۋ كۇنى ماڭعىستاۋ وبلىسىندا 177 سايلاۋ ۋچاسكەسى جۇمىس جاسادى دەسەك, سونىڭ 57-ءى وبلىس ورتالىعى اقتاۋ قالاسىندا ورنالاستى. بىزگە قىزمەتىمىزگە وراي, وسى ۋچاسكەلەردىڭ بىرنەشەۋىنە باس سۇعىپ, سايلاۋ بارىسى مەن سايلاۋشىلار قاتىسىن اڭعارۋعا مۇمكىندىك تۋدى.
قۇرىلعانىنا شيرەك عاسىردان استام ۋاقىت ءوتىپ, بىرنەشە ورتا بۋىن مامانداردىڭ تۇساۋىن كەسكەن ماڭعىستاۋ گۋمانيتارلىق كوللەدجى عيماراتى ءوزىنىڭ قاي مەرەكەنى دە جاسانتىپ-جاندىرىپ جىبەرەتىن داعدىسىنا ساي بۇل كۇنگە ەرەكشە دايىندىقپەن كەلىپتى. اۋلاسىن بىلدەي ءۇش جەكە كاسىپكەردىڭ جانە وزدەرىنىڭ ستۋدەنتتىك اسحانالارىنىڭ جارمەڭكەسىنە اينالدىرعان كوللەدج ماڭى ابىر-سابىر ادام. ويتكەنى, مۇندا №141 سايلاۋ ۋچاسكەسى ورنالاسىپتى. تاڭەرتەڭ سايلاۋدى سالتاناتتى جاعدايدا باستاعان اتالعان ۋچاسكە جاسى 18-گە تولىپ, العاش رەت سايلاۋعا كەلگەن 6 جاستى قۇتتىقتاپ, ارنايى سىيلىقتار تاپسىرعان. پاتريوتتىق ءان-اۋەن تەربەگەن ادەمى كوڭىلمەن دالىزگە ەنگەندەردى تياناقتىلىق پەن تازالىق لەبى ەسكەن ۋچاسكەدەن كوميسسيا مۇشەلەرى ىقىلاسپەن قارسى الۋدا.
– ءبىزدىڭ ۋچاسكەمىزگە 1734 سايلاۋشى تىركەلگەن. ءتورت ساعاتتان استام ۋاقىتتا 600-گە جۋىق ادام كەلىپ ءوز تاڭداۋلارىن جاسادى. ەقىۇ-دان, تمد ميسسياسىنان جانە وتاندىق بايقاۋشىلار دا كەلىپ, سايلاۋ بارىسىن ءوز كوزدەرىمەن كوردى. ەشقانداي سايلاۋ زاڭدىلىقتارىن بۇزاتىن ارەكەتتەر ورىن العان جوق, – دەدى اتالعان سايلاۋ ۋچاسكەسىنىڭ توراعاسى, ماڭعىستاۋ گۋمانيتارلىق كوللەدجىنىڭ ديرەكتورى مازىلبەك وتەباەۆ. مازىلبەك نۇربوسىن ۇلىنىڭ بۇل ءسوزىن «كاسپي» قوعامدىق كوميسسياسىنىڭ وكىلى – بايقاۋشى رىسكۇل ەسەۋوۆا دا ماقۇلدادى.
قىزىلدى-جاسىلدى بەزەندىرىلىپ, بۇيىردەگى ەسىكتەن سامال ەسكەن كەڭ زالدا كەلۋشىلەردى قارسى الىپ, ارقايسىسىن ءوز ۇيلەرى تىركەلگەن ۇستەلدەردەن بيۋللەتەن الۋعا سىلتەپ جۇرگەن بۇل ۋچاسكەنىڭ تىڭعىلىقتى تىرلىگى اقتاۋداعى بارلىق ۋچاسكەلەردە قايتالانىپ جاتتى.
سۋرەتتى تۇسىرگەن
تالانت قۇسايىن.
اقتوبە
قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى وبلىستا بەلسەندىلىكپەن باستالدى. سايلاۋ كۇنى 14 اۋماقتىق كوميسسيا جۇمىس ىستەپ, 521 سايلاۋ ۋچاسكەسى ەسىگىن ايقارا اشتى. اقتوبەلىكتەر سايلاۋدى ايرىقشا ساياسي ماڭىزدى وقيعا رەتىندە باعالاپ, اسقان ۇيىمشىلدىق تانىتتى. سايلاۋعا 448 مىڭنان استام ادام قاتىستى. بۇل سايلاۋعا الىس-جاقىن شەتەلدەردەن كوپتەگەن بايقاۋشىلار كەلدى. سولاردىڭ 19-ى كورشىلەس ورىنبور وبلىسىنان.
قالاداعى №19 ورتا مەكتەپتە ەكى سايلاۋ ۋچاسكەسى ورنالاسقان ەكەن. ءبىز بارعان №61 سايلاۋ ۋچاسكەسىندە تاڭعى 07.30-دا 50-دەن استام سايلاۋشى ءوز تاڭداۋلارىن جاساپ ۇلگەرگەنىن بىلدىك. مۇندا العاش داۋىس بەرۋشىگە, سونداي-اق, ەڭ قارت سايلاۋشىعا قۇرمەت كورسەتىلىپ, سىي-سياپات جاسالعان. سايلاۋ ۋچاسكەسىندە مەرەكەلىك كوڭىل-كۇي بايقالادى. سايلاۋ كوميسسياسىنىڭ ءتورايىمى روزا امانباەۆا سايلاۋشىلاردىڭ الدى ەرتەلەتىپ كەلگەنىن جەتكىزدى. اسىرەسە, قارتتار جاعى بەلسەندىلىك تانىتقانىن العا تارتا سويلەدى. ال 62 سايلاۋشىعا ۇيلەرىنە بارىپ, داۋىس بەرۋگە مۇمكىندىك تۋعىزىلعانىن اتاپ ءوتتى. وسى سايلاۋ ۋچاسكەسىندە العاش رەت داۋىس بەرگەن گۇلميرا امانجولوۆا ءوز تاڭداۋىن جاساعانىنا قۋانىشىن ءبىلدىردى.
وسىندا ورنالاسقان №60 سايلاۋ ۋچاسكەسىندە كەزەكتەن تىس پرەزيدەنتتىك سايلاۋ وتۋىنە بايلانىستى سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ وبلىستىق فيليالىنىڭ بايقاۋشىسى ءاسيا راحمانوۆانى كەزدەستىرىپ سوزگە تارتتىق. ول سايلاۋدىڭ ۋاقتىلى باستالعانىن, ەشقانداي زاڭ بۇزۋشىلىق بولماعانىن جەتكىزدى.
مەتاللۋرگتەر مادەنيەت ۇيىندە ورنالاسقان №38 سايلاۋ ۋچاسكەسىنە كەلگەنىمىزدە, ادامداردىڭ قاراسى كوپ بولدى. مۇندا كۇندىزگى 11.00 ساعاتتا سايلاۋشىلاردىڭ 52 پايىزى داۋىس بەرىپ ۇلگەرىپتى. بۇل مەتاللۋرگتەردىڭ ەڭبەكتە عانا ەمەس, قوعامدىق-ساياسي ومىردە دە بەلسەندىلىگى جوعارى ەكەنىن تاعى ءبىر اڭعارتتى. №38 سايلاۋ ۋچاسكەسىنەن رەسەيدەن كەلگەن تمد بايقاۋشىلار ميسسياسىنىڭ وكىلى, ورىنبور وبلىسى ۇكىمەتىنىڭ ۆيتسە-گۋبەرناتورى, ىشكى ساياسات ءبولىمى توراعاسىنىڭ ورىنباسارى ولەگ ديموۆتىڭ سايلاۋدىڭ ۇيىمشىلدىقپەن تازا جانە ءادىل ءوتىپ جاتقانى تۋرالى پىكىرىن ەستىپ, مارقايىپ قالدىق.
اقتوبەلىكتەر پرەزيدەنتتىك سايلاۋعا ءبىر كىسىدەي ۇيىمشىلدىقپەن قاتىستى. جالپى, وبلىس بويىنشا كەشكى 19.00-دە سايلاۋشىلاردىڭ 95,5 پايىزى داۋىس بەرىپ ۇلگەردى.
سۋرەتتى تۇسىرگەن
حايريلدين راۋشانوۆ.
اتىراۋ
مۇنايلى ءوڭىردىڭ تۇرعىندارى پرەزيدەنتتىك سايلاۋعا ءاتۇستى قاراعان ەمەس. بۇل جولى دا ازاماتتىق بەلسەندىلىكتىڭ ءۇلگىسىن كورسەتكەن 304 593 سايلاۋشى 232 سايلاۋ ۋچاسكەسىندە ءوز تاڭداۋىن جاساۋى ءتيىس بولسا, كۇندىزگى ساعات 12.00-گە دەيىن ولاردىڭ 47,54 پايىزى داۋىس بەرىپ ۇلگەردى. ءدال وسى ۋاقىتتا داۋىس بەرۋدە يساتاي (72,41%), قىزىلقوعا (58,38%) جانە قۇرمانعازى (55,08%) اۋداندارىندا سايلاۋشىلاردىڭ داۋىس بەرۋ بەلسەندىلىگى ايرىقشا بايقالىپ وتىردى. وبلىستىق سايلاۋ كوميسسياسى ءتوراعاسىنىڭ ورىنباسارى تامار امان-تۇرلينانىڭ ايتۋىنشا, وسىدان كەيىنگى ەكى ساعاتتىڭ ىشىندە, ياعني كۇندىزگى ساعات 14.00-گە دەيىن داۋىس بەرۋشىلەردىڭ قاتارى 73,41 پايىزعا جەتتى. كەيبىر سايلاۋ ۋچاسكەلەرىندە ادامداردىڭ داۋىس بەرۋ ءۇشىن كەزەككە تۇرعانىنا ءوزىمىز كۋا بولدىق.
– تاۋەلسىز قازاقستانىمىزدىڭ ەكونوميكالىق وركەندەۋ قارقىنى ءساتتى جالعاسۋى ءۇشىن داۋىس بەردىم. بۇل – مەنىڭ ازاماتتىق پارىزىم. سەبەبى, مەن قازاقستاننىڭ كەلەشەگى جارقىن بولعانىن, قۋاتتى مەملەكەتكە اينالىپ, باسەكەگە قابىلەتتى 30 ەلدىڭ قاتارىنان ورىن العانىن قالايتىن پاتريوتتىڭ ءبىرىمىن, – دەگەن پىكىرىمەن ءبولىستى مىڭداعان مۇنايشىنىڭ ءبىرى باتىرجان ميزامعاليەۆ.
اتىراۋدا داۋىس بەرۋ باستالىسىمەن سايلاۋ ۋچاسكەسىنە اسىعا جەتكەندەردىڭ ءبىرى – گۇلدانا ەلەمەسوۆا. قازىر ول ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە ەكونوميكا جانە قۇقىق فاكۋلتەتىنىڭ 2-كۋرسىندا وقيدى. ءدال وسى كۇنى العاش رەت ءوز تاڭداۋىن جاساعان جالىندى جاستاردىڭ قاتارىندا بۇرناعى كۇنى 18 جاسقا تولعان اتالعان وقۋ ورنىنىڭ تاعى ءبىر ستۋدەنتى يمانعالي تولەپوۆ تە بار. سونىمەن بىرگە, اتىراۋ قالاسىنا تاياۋ ورنالاسقان تومارلى اۋىلىنىڭ 104 جاستاعى تۇرعىنى نىشان جۇباەۆا دا ءوز تاڭداۋىن جاسادى.
بۇل كۇنى اتىراۋداعى اسكەري بولىمدەردىڭ ساردارلارى مەن ساربازدارى, كاسپي تەڭىزىنىڭ تورىندە ەڭبەك ەتىپ جۇرگەن مۇنايشىلار دا داۋىس بەردى. كەشكى ساعات 20.00-دەگى مالىمەت بويىنشا داۋىس بەرۋگە قۇقىلى اتىراۋلىقتاردىڭ 97,75 پايىزى ەل كەلەشەگى ءۇشىن ماڭىزدى تاڭداۋىن جاساپ ۇلگەردى. بۇل كۇنى سايلاۋ ۋچاسكەلەرىندە كوركەمونەرپازداردىڭ اسەم ءانى اۋەلەپ, مىڭ بۇرالعان بيشىلەر سازدى اۋەننىڭ ىرعاعىمەن تەربەتىلدى.
سۋرەتتى تۇسىرگەن
راحىم قويلىباەۆ.
كوكشەتاۋ
ءوزىمىز داۋىس بەرۋگە تىركەلگەن №6 سايلاۋ ۋچاسكەسىنە تاڭعى ساعات 6.30-دا كەلگەنبىز. قىرىقشاقتى ادام جينالىپ قالعان ەكەن. ارالارىندا 18 بەن 25-ءتىڭ شاماسىنداعى جاستار قالىڭداۋ. كوبىسىن تانيمىن. جۇزدەرى جارقىن, جىلى امانداسىپ جاتىرمىز. شۋاقتى كۇن مەرەكەلىك اۋاندى الا كەلگەندەي جەلپىنىس بار.
قالاداعى №1 مەكتەپتىڭ ەسىگى تۋرا 7.00-دە اشىلدى. قازاقستان رەسپۋبليكاسىنىڭ ءانۇرانى وينالدى. كەڭ زالدىڭ تورىندە تاۋەلسىز ەلىمىزدىڭ مەملەكەتتىك نىشاندارى كوز تارتادى. مۇندا داۋىس بەرۋشىلەرگە كوميسسيانىڭ بەس مۇشەسى الفاۆيتتىك تارتىپپەن قىزمەت كورسەتەدى, كوگىلدىر شىمىلدىقتى بەس كابينا جابدىقتالعان.
ۋچاسكەلىك سايلاۋ كوميسسياسىنىڭ ءتورايىمى يرينا گولوۆچەنكو ءوز ءارىپتەستەرىمەن جانە سايلاۋدى بايقاۋ ءجونىندەگى قوعامدىق كوميسسيانىڭ مۇشەسى ۆيكتور گەيدىڭ قاتىسۋىمەن داۋىس بەرۋ بيۋللەتەندەرى سالىنعان سەيفتى اشىپ, داۋىس بەرۋ جاشىگىن مورمەن بەكىتتى. مۇنىڭ بارلىعى كوميسسيانىڭ №1 قاۋلىسىندا كورىنىس تاۋىپ, ءىلىنىپ قويىلدى.
ءتورايىمنىڭ ايتۋى بويىنشا داۋىس بەرۋگە 2635 ادام تىركەلسە, 40 كىسىگە جول جۇرۋىنە بايلانىستى سايلاۋعا وزگە وڭىرلەردە قاتىسۋعا رۇقسات بەرىلىپتى. سايلاۋشىلاردىڭ 12-ءسى ماڭىزدى ناۋقانعا تۇڭعىش رەت قاتىسادى ەكەن. سونداي-اق, 31 كىسى جىلجىمالى داۋىس بەرۋ جاشىگىنىڭ قىزمەتىن پايدالانادى.
كوكشەتاۋداعى س.سەيفۋللين كوشەسىندەگى 13-ءۇيدىڭ, 20-پاتەرىندە تۇراتىن ستۋدەنت حايرات ايدىن ءبىرىنشى بولىپ داۋىس بەردى. جۇرتشىلىق وعان قوشەمەتپەن قول سوقسا, ۋچاسكە تاراپىنان ارنايى سىيلىق تاپسىرىلدى. ال ا.مىرزاحمەتوۆ اتىنداعى ۋنيۆەرسيتەتتىڭ 3-كۋرس ستۋدەنتى كەڭەس ءمولدىر اتا-اناسىمەن بىرگە ءجۇزى بال-بۇل جانىپ داۋىس بەردى.
وسى ۋچاسكەدە داۋىس بەرگەن اقمولا وبلىسىنىڭ اكىمى سەرگەي كۋلاگين جۇرتشىلىقتى ەل تاعدىرىنداعى ماڭىزدى وقيعامەن قۇتتىقتادى.
سايلاۋ بارىسىن بايقاۋعا قاتىسىپ وتىرعان نۇروتاندىق بورانباي بەگالين مەن ءا.قۇسايىنوۆتىڭ وكىلى سەرىك ەسماعامبەتوۆتى سوزگە تارتقانىمىزدا, ايتۋلى شارانىڭ جوعارى دەڭگەيدە ۇيىمداستىرىلعانىن, داۋىس بەرۋدىڭ بەلسەندىلىكپەن ءارى زاڭدىلىققا ساي وتكىزىلگەنىن اتاپ كورسەتتى.
سۋرەتتى تۇسىرگەن
تولەگەن قوسشىعۇلوۆ.
قاراعاندى
وبلىستا سايلاۋ ۇلكەن بەلسەندىلىكپەن قاتىسۋ ۇستىندە ءوتتى. 784 سايلاۋ ۋچاسكەسىنە تىركەلگەن 800-مىڭعا جۋىق داۋىس بەرۋشىنىڭ ساعات 20.00-گە دەيىن 97, 21 پايىزى ءوز تاڭداۋلارىن جاسادى.
بارلىق جەردە سايلاۋ سالتاناتتى راسىممەن اشىلدى. قاراعاندى قالاسىنداعى كەنشىلەر مادەنيەت سارايىنداعى №17 سايلاۋ ۋچاسكەسىندە ءوز تاڭداۋلارىن جاساۋعا ەرتەلەتىپ كەلۋشىلەردى «قىزىل جۇلدىز» وردەنى مەن مەدالداردىڭ يەگەرى, تىل ارداگەرى, پودپولكوۆنيك راحمەتوللا وسپانوۆ اقساقال ەل ومىرىندەگى ماڭىزدى ساياسي وقيعامەن قۇتتىقتاپ, العاشقى بولىپ داۋىس بەردى. سايلاۋعا ءبىرىنشى رەت قاتىسۋشى قاراعاندى مەملەكەتتىك تەحنيكالىق ۋنيۆەرسيتەتىنىڭ ستۋدەنتى امانعالي راحيموۆ جاستار اراسىنان وسىنداي قۇرمەتكە يە بولدى. «مەن ءوزىمنىڭ, ەلىمنىڭ بولاشاعى ءۇشىن داۋىس بەرۋگە كەلدىم. قالاۋىمدى ۇمىتكەرلەردىڭ قايسىسىنا جاساۋ ءۇشىن كوپ تولعاندىم. شەشىمىم دۇرىس بولدى دەپ ويلايمىن», – دەدى ول.
وبلىس ورتالىعىنداعى №53 سايلاۋ ۋچاسكەسىنە تىركەلگەن سايلاۋشىلار دا بەلسەندىلىگى ەسىگى اشىلعان ۋاقىتتان جوعارى بولدى. وسىندا تمد بايقاۋشىلار ميسسياسىنىڭ باسشىسى ولەگ سوسكوۆەتس بولىپ, داۋىس بەرۋ بارىسىمەن تانىستى. سۋ تاسقىنىنان زارداپ شەككەن ەلدى مەكەندەر تۇرعىندارى دا قالاۋلارىن بىلدىرۋگە زور ىنتا تانىتتى. نۇرا اۋدانىنداعى جاڭاقۇرىلىس اۋىلىنا سايلاۋ كوميسسياسىنىڭ ءمۇشەلەرى بيۋللەتەندەردى قايىقپەن الىپ بارىپ, داۋىس بەرۋگە جاعداي جاسادى.
حالىقارالىق جانە جەرگىلىكتى بايقاۋشىلار سايلاۋ ۋچاسكەلەرىندە بولۋ كەزىندە داۋىس بەرۋدىڭ ەل زاڭناماسىنا سايكەس ەش زاڭ بۇزۋشىلىق وتۋىنە جوعارى باعا بەرىپ, سايلاۋعا قاتىسۋشىلاردىڭ ازاماتتىق پارىزدارىن وتەۋگە دەگەن بيىك جاۋاپكەرشىلىك كورسەتۋىن اتادى.
سايلاۋدىڭ ناقتى قورىتىندىسى شىعۋىنا بايلانىستى وبلىس ورتالىعىنداعى مۇز ايدىنىندا ساياسي پارتيالار, قوعامدىق ۇيىمدار, قالا جۇرتشىلىعى وكىلدەرىنىڭ سالتاناتتى باس قوسۋى ءوتتى.
قوستاناي
«تىنىشتىق كۇنى» قوستانايدا كوكتەمنىڭ وكپەك جەلى تۇردى دا, سايلاۋ كۇنى تاڭەرتەڭنەن اق جاڭبىر جاۋسىن كەلىپ. قولشاتىرىن ۇستاپ, سايلاۋعا اعىلعان جۇرت. بارلىق سايلاۋ ۋچاسكەلەرىندە ەلىمىزدىڭ گيمنى ويناپ, داۋىس بەرۋ سالتاناتتى تۇردە باستالدى. №3 سايلاۋ ۋچاسكەسىنە «شارق» تاجىك-وزبەك ەتنومادەني بىرلەستىگىنىڭ جەتەكشىسى ەرگاشۆوي حولمەتوۆ تاڭەرتەڭگى 7.00 بولماي كەلدى. بيۋللەتەن الۋعا العاشقىلاردىڭ ءبىرى بولىپ وتىردى. ۇستىندە الا شاپان, كەستەلى كويلەك, باسىندا الا توپى. ول ءوز قالاۋىن جاساعاننان كەيىن تىلدەستىك. «قۇلپىرىپ كەتىپسىز دا» دەيمىز. «مەرەكەنىڭ ۇلكەنى بۇگىن! بارىمدى كيىپ كەلدىم. ءبىرىنشى داۋىس بەرگەندەر قاتارىندا سايلاۋ ۋچاسكەسىنىڭ سىيلىعىن دا الىپ تۇرمىن. «اللا ەرتە تۇرعانعا نەسىبە شاشادى» دەگەن وسى. ال بۇگىنگى سايلاۋ حالىقتىڭ نەسىبەسىن تۇگەندەيدى. ەلىمىزدىڭ بىرلىگى, تىنىشتىعى ءۇشىن داۋىس بەردىم», – دەدى ەرگاشۆوي اكا.
شىنىندا, سايلاۋ قوستانايدا مەرەكەدەن كەم تۇسكەن جوق. پەداگوگيكا كوللەدجىندە ورنالاسقان №60 سايلاۋ ۋچاسكەسىندە ستۋدەنتتەر قولىنان شىققان قولونەر بۇيىمدارىن قىزىقتاماعان سايلاۋشى قالمادى. پەدكوللەدج اۋلاسىندا ستۋدەنتتەر جاڭبىرعا قاراماي فلەش-موب بيلەدى. سايلاۋ وسى جاستاردىڭ باقىتتى بولاشاعى ءۇشىن ءوتىپ جاتقانىنا قۋانىش بىلدىرگەندەي اسەر قالدىردى. بارلىق سايلاۋ ۋچاسكەلەرى ۇيىمداستىرۋ جاعىنان باسەكەگە تۇسكەندەي, وتە ماڭىزدى شارانى شىنايى, قىزىقتى وتكىزۋگە ۇمتىلعانى ءبىلىنىپ-اق تۇر.
سايلاۋ ۋچاسكەلەرىنىڭ بارلىعىندا دەرلىك ءتۇرلى جاستاعى سايلاۋشىلاردىڭ تۇسكە قاراي كەزەگى قالىپتاستى. №21 سايلاۋ ۋچاسكەسىنە ۇلى وتان سوعىسىنىڭ ارداگەرى, اتاقتى تەمىرجولشى, 92 جاستاعى بەرتران رۋبينشتەين كەلگەندە كەزەكتە تۇرعان سايلاۋشىلار جارىلىپ جول بەردى.
– مەن كوپتى كورگەن اداممىن. ەلگە الدىمەن تىنىشتىق كەرەك, ونىڭ باعاسىن اينالامىزداعى جۇرتتار جاقسى سەزىنىپ وتىر. ەكونوميكا دامىپ كەلەدى. مەن تاڭداۋىمدى جاسادىم جانە دۇرىس تاڭداۋ ەكەنىنە سەنىمدىمىن, –دەدى بەرتران يوسيفوۆيچ.
وبلىستىق سايلاۋ كوميسسياسى تۇسكى ساعات 12.00-دە سايلاۋشىلاردىڭ 55 پايىزىنان استامى, ساعات 16.00-دە 80 پايىزى, كەشكى ساعات 18.00-دە 91 پايىزدان اسىپ كەتكەنىن حابارلاپ وتىردى. رەسپۋبليكالىق, جەرگىلىكتى جانە سىرتتان كەلگەن بايقاۋشىلاردىڭ بارلىعى دا ەڭ الدىمەن سايلاۋشىلاردىڭ بەلسەندىلىگىنە تاڭداي قاعۋمەن بولدى. سايلاۋ كۇنگى جاڭبىر اسپاننان جاۋعان نۇرداي سەزىلدى. ال اعاشتار ءدۇر ەتىپ بۇرشىك اتقالى تۇر. سايلاۋدان كەيىنگى ءومىر سەكىلدى...
قىزىلوردا
تاڭسارىدەن سايلاۋ ۋچاسكەلەرىنىڭ الدى حالىققا تولى بولدى. ساعات ءتىلى 7:00-ءدى سوققاندا بارلىق ۋچاسكەلەردە ءانۇران ورىندالىپ, سايلاۋشىلار داۋىس بەرە باستادى. جالپى, قىزىلوردا وبلىسى بويىنشا 397 885 ادام سايلاۋعا قاتىسا الادى. بۇل – شامامەن ايماق حالقىنىڭ جارتىسىنان استامى دەگەن ءسوز.
سايلاۋعا اقساقالدى قاريالار مەن اق جاۋلىقتى انالاردان باستاپ جاڭا عانا وتباسىن قۇرىپ, نەكەگە تۇرعان جاس جۇبايلار مەن ومىرىندە تۇڭعىش رەت داۋىس بەرۋ قۇقىنا يە بولعان ازاماتتارعا دەيىن بەلسەندى تۇردە قاتىستى. ولار ءۇشىن وڭىردە 345 سايلاۋ ۋچاسكەسى جۇمىس ىستەدى.
تۇسكى ساعات 14:00-دە سايلاۋعا حالىقتىڭ 73,13 پايىزى قاتىستى دەگەن اقپارات الدىق. ارادا ەكى ساعات وتكەننەن سوڭ 346 698 ادامنىڭ داۋىس بەرگەندىگى جونىندە دەرەك كەلدى. ياعني, تۇستەن كەيىننىڭ وزىندە قىزىلوردالىق سايلاۋشىلاردىڭ 87,5 پايىزى داۋىس بەرىپ ۇلگەرگەن ەدى. وسىدان-اق حالىقتىڭ ەل ومىرىندەگى ەلەۋلى وقيعاعا ەنجار قاراماي, سايلاۋعا وتە بەلسەندى قاتىسقانىن بايقاۋعا بولادى. وسى ارادا سايلاۋدىڭ مەرەكەلىك كوڭىل-كۇيدە وتكەنىن ايتقان ابزال شىعار. مىسالى, قىزىلوردا قالاسىنىڭ تۇرعىندارى نوسەرلەپ جاۋعان جاڭبىرعا قاراماي سايلاۋ ۋچاسكەلەرىنە بارىپ, ءوز تاڭداۋلارىن جاسادى. مۇنىڭ ءوزى ەلىمىزدە ساياسي مادەنيەتتىڭ كۇن ساناپ ارتىپ كەلە جاتقانىن دالەلدەسە كەرەك.
– ءدال قازىر قىزىلوردا وبلىسى بويىنشا ورنالاسقان بارلىق 345 سايلاۋ ۋچاسكەسىندە داۋىس بەرۋ پروتسەسى اياقتالدى. تىزىمگە ىلىنگەن سايلاۋشىلاردىڭ 97,5 پايىزى ساياسي ناۋقانعا تولىقتاي قاتىستى. بۇل قىزىلوردالىقتاردىڭ ساياسي بەلسەندىلىگىنىڭ ارتقانىن, ەل بولاشاعىنا بەيجاي قارامايتىنىن اڭعارتادى دەگەن ويدامىن. سايلاۋ بارىسىندا ەشقانداي زاڭ بۇزۋشىلىق تىركەلگەن جوق. بايقاۋشىلار تاراپىنان دا سىن-ەسكەرتپەلەر ايتىلمادى. ساياسي ناۋقان وتە جوعارى دەڭگەيدە ءوتتى, – دەدى قىزىلوردا وبلىستىق سايلاۋ كوميسسياسىنىڭ توراعاسى قورعانبەك قايروللاەۆ.
ورال
ەلىمىزدىڭ باتىستاعى قاقپاسى – ورال وڭىرىندە ەل ەرتەڭىن ايقىندايتىن ەلەۋلى كۇن – پرەزيدەنتتىك سايلاۋ كۇنى جوعارى ازاماتتىق بەلسەندىلىك پەن ءورشىل كوڭىل-كۇي جانە جارقىن دا شات-شادىمان مەرەكە جاعدايىندا وتكىزىلدى. ەگەر ءبىز بيىلعى 2015 جىلدىڭ 26 ءساۋىرى ەلدىگىمىزدىڭ تاعى ءبىر سىنعا تۇسكەن, مەملەكەتتىلىگىمىزدىڭ مەرەيىن ءوسىرۋ ءۇشىن تاعى ءبىر ارشىندى قادام جاسالعان كۇن بولدى دەپ ساناساق, وسى سىناقتان جايىقتىڭ بويىن جايلاعان قالىڭ ەل دە اسقاق ابىرويمەن شىعا بىلگەنى انىق.
بۇگىندە دالەلسىز, قيسىنسىز ايتىلعان ءسوزدىڭ قادىر-قاسيەتى مەن ەشقانداي باعاسى جوق. ياعني, الدىڭعى ايتىلعان قورعاسىنداي سالماقتى وي-پىكىرىمىزدى باتىس قازاقستان وبلىستىق سايلاۋ كوميسسياسىنان الىنعان سوڭعى دەرەكتەرمەن بايىتا تۇسەر بولساق, تاعى دا كوڭىل شىركىن ودان ءارى توعايا تۇسەدى.
مىسالى, ورال ءوڭىرى اۋماعىندا كەشە تۇسكى ساعات 12-00-گە دەيىن وبلىس بويىنشا داۋىس بەرۋ ءۇشىن تىركەلگەن 404 مىڭ 465 سايلاۋشىنىڭ 40 پايىزدان استامى ءوز تاڭداۋلارىن جاساپ ۇلگەردى. بۇدان سوڭ تۇستەن كەيىنگى ساعات 14.00-دە بۇل پايىزدىق كورسەتكىش 67,13-ءتى قۇرادى. كەشكى ساعات 20.00-دە, ياعني وڭىردەگى داۋىس بەرۋ ۇدەرىستەرى قورىتىندىلانار كەزدە بۇل كورسەتكىش 100 پايىزدىق مولشەرگە يەك ارتقانى بيىك ناتيجە ەكەنىنە تالاس جوق.
– بۇعان دەيىنگى رەسپۋبليكادا وتكىزىلگەن ەلەكتوراتتىق ناۋقاندارمەن سالىستىرعاندا, بيىلعى پرەزيدەنتتىك سايلاۋدىڭ باستى ەرەكشەلىگى – ونىڭ زاڭدىلىعى مەن مولدىرلىگىن ساقتاۋ جانە قاداعالاۋ ءۇشىن وتاندىق جانە شەتەلدىك بايقاۋشىلاردىڭ ۇلكەن جانە قالىڭ توپتارى قاتىسۋىندا. وبلىستا ولاردىڭ سانى مىڭنان اسىپ ءتۇستى. ونىڭ 14-ءى ەۋروپاداعى قاۋىپسىزدىك جانە ىنتىماقتاستىق ۇيىمى دەلەگاتسيالارى اتىنان كەلىپ, وڭىردەگى پرەزيدەنتتىك سايلاۋعا ازىرلىك پەن ونىڭ ءوتۋ بارىسىنا جانە ۇيىمداستىرىلۋ دەڭگەيىنە وڭ باعا بەردى. ايماقتا وتكىزىلگەن داۋىس بەرۋ ۇدەرىستەرىنىڭ تاعى ءبىر وزگەشەلىگى سايلاۋشىلار تىزىمدەرىن تۇبەگەيلى تۇگەندەۋ ءۇشىن ءاربىر سايلاۋ ۋچاسكەسى حالىققا قىزمەت كورسەتۋ ورتالىقتارىمەن بايلانىستىرىلدى. بۇل ءۇشىن سايلاۋ قوسىندارىنا ارنايى بايلانىس تەلەفوندارى ورناتىلدى, – دەدى گازەت تىلشىسىنە باتىس قازاقستان وبلىستىق سايلاۋ كوميسسياسىنىڭ توراعاسى عايسا قاپاقوۆ.
سۋرەتتى تۇسىرگەن
رافحات حالەلوۆ.
وسكەمەن
شىعىس ءوڭىرىنىڭ تۇرعىندارى پرەزيدەنتتىك سايلاۋعا قاتىسۋدا جوعارى بەلسەندىلىك تانىتتى. ونى وبلىس ورتالىعىنداعى گۋمانيتارلىق كوللەدجدە ورنالاسقان №79 سايلاۋ ۋچاسكەسىنە تاڭعى ساعات 7.00 بولماسا دا تۇرعىنداردىڭ مولىنان جينالىپ, ۋچاسكەنىڭ اشىلۋىن تاعاتسىزدانا كۇتكەنىنەن اڭدادىق. ۋچاسكەلەر انۇرانمەن اشىلىپ, جينالعان قاۋىمعا داۋىس بەرۋ ءتارتىبى ءتۇسىندىرىلدى. بيىلعى ەرەكشەلىك – ەرتە داۋىس بەرگەن ازاماتتارعا, العاش رەت داۋىس بەرۋشىلەرگە جانە بالالارىمەن كەلگەن وتباسىلارعا ارنايى سىيلىقتار ۇلەستىرىلدى. بارلىق سايلاۋ ۋچاسكەلەرىندە بالالاردىڭ شىعارماشىلىق ۇجىمدارىنىڭ قاتىسۋىمەن كونتسەرتتىك باعدارلامالار مەن كىشىگىرىم ساۋدا-ساتتىق, دويبى, شاحمات وينايتىن ورىندار ۇيىمداستىرىلدى.
دەنساۋلىعىنا بايلانىستى كەلە الماعان ارداگەرلەر مەن زەينەتكەرلەر ۇيدە داۋىس بەردى. وسكەمەندەگى جىبەك ماتالار كومبيناتى شاعىن اۋدانىنىڭ 80 جاستان اسقان تۇرعىندارى شەرنياز جامانباەۆ پەن شولپان كابدىكارىمقىزى اتالعان كومەكتى پايدالاندى. ەرلى-زايىپتى ەڭبەك ارداگەرلەرىنىڭ بيۋللەتەندەرىن №4 سايلاۋ ۋچاسكەسى كوميسسياسى ءتورايىمىنىڭ ورىنباسارى رۋلان نىساينوۆ الىپ كەلدى. «1954 جىلدان باستاپ داۋىس بەرىپ كەلەمىن. بۇرىن سايلاۋ ۋچاسكەلەرىنە ءوز اياعىممەن بارىپ داۋىس بەرەتىن ەدىم. بيىل دەنساۋلىعىم كوتەرە الماعاندىقتان, ءوتىنىش جازدىم. بالالاردىڭ باراقاتتى, بەرەكەتتى ءومىرى مەن كەلەشەگى ءۇشىن تاڭداۋىمىزدى جاسادىق», – دەدى شولپان اجە. تارباعاتاي اۋدانىندا دۇنيەگە كەلگەن قوس قاريا 8 بالا ءوسىرىپ, 12 نەمەرە مەن 4 شوبەرە ءسۇيىپ وتىر. ا.بايتۇرسىنوۆ اتىنداعى مەكتەپتە ورنالاسقان №82 سايلاۋ ۋچاسكەسىندە «التىن بەلگىدەن» ءۇمىتكەر وقۋشى ساعىنىش بايانبەكوۆا تۇڭعىش رەت ءوز تاڭداۋىن جاساپ, داۋىس بەردى.
وبلىستىق سايلاۋ كوميسسياسى ءتوراعاسىنىڭ ورىنباسارى الەكساندر رۋكيننىڭ ايتۋىنشا, ءوڭىر حالقىنىڭ سايلاۋعا قاتىسۋ دەڭگەيى وتە جوعارى بولعان. «كەشە ساعات 16.00-دەگى ءمالىمەت بويىنشا شىعىسقازاقستاندىق سايلاۋشىلاردىڭ 89,5 پايىزى داۋىس بەردى. ونىڭ ىشىندە كاتونقاراعاي – 99,5, بورودۋليحا 98,8 جانە بەسقاراعاي 98,6 پايىز جيناپ, اۋداندار اراسىندا الدىڭعى ۇشتىكتەن كورىندى. داۋىس بەرۋدىڭ تولىق قورىتىندىسى بويىنشا بۇل ءتىزىم وزگەرۋى دە مۇمكىن», – دەدى ا.رۋكين.
پاۆلودار
وبلىس ورتالىعىنداعى №59 سايلاۋ بولىمشەسىنە بۇگىن تاڭعى 7-دە اشىلعان ۋاقىتتان باستاپ العاشقى سايلاۋشىلار داۋىس بەرە باستادى. ءبارى دە كوتەرىڭكى كوڭىل-كۇيدە. وسى ۋچاسكەدە العاشقىلاردىڭ ءبىرى بولىپ داۋىس بەرگەن زەينەتكەر ۆالەنتينا ۆەرشينينانىڭ جاسى 80-دە ەكەن. قارت سايلاۋشى قوبالجىپ, كوڭىلى بوساپ, كوزىنە جاس الدى. «وسى جاسقا جەتەمىن, داۋىس بەرەمىن دەپ كىم ويلاپتى», – دەيدى. پاۆلودارعا سوناۋ ءبىر جىلدارى تومسكىدەن وقۋ ءبىتىرىپ جولدامامەن كەلىپتى. ۇزاق جىلدار «ەنەرگو» ورتالىعىندا ەنەرگەتيكا سالاسىندا قىزمەت ەتىپتى. بۇل كۇننىڭ ءوزى ءۇشىن دە, قازاقستاندىقتار ءۇشىن دە ماڭىزدى كۇن ەكەنىن ايتتى.
ال سايلاۋ ۋچاسكەسىنىڭ توراعاسى نۇربول وماروۆتىڭ ايتۋىنشا, بارلىق قازاقستاندىقتار ءۇشىن ەرەكشە ەستە قالاتىن كۇن ەكەنىن سايلاۋشىلاردىڭ سايلاۋ بولىمشەسى اشىلا سالىسىمەن ەرتە كەلگەن بەلسەندىلىكتەرى, ەل تاعدىرى ءۇشىن بەيجاي قارمايتىندارى ايقىن اڭعارتادى. ءبىرىنشى كەلگەن جانە 18 جاسقا بيىل تولىپ, ءبىرىنشى رەت داۋىس بەرۋگە قاتىسىپ وتىرعان ازاماتتارعا بەلسەندىلىك تانىتقاندارى ءۇشىن سىيلىقتار بەرىلدى. وبلىس ورتالىعىنىڭ جاستارى دا بۇگىن ەرەكشە بەلسەندىلىك كورسەتۋدە. وبلىستىق سايلاۋ كوميسسياسىنىڭ ءتورايىمى ءاليا سابىرحانوۆا تاڭەرتەڭ وبلىس ورتالىعىن ارالاپ شىققان كەزدە سايلاۋ بولىمشەلەرىندە داۋىس بەرۋگە سايلاۋشىلار كوپتەپ كەلىپ جاتقانىن كورگەن. «اعا ۇرپاق وكىلدەرىمەن قاتار, ءبىزدىڭ جاستارىمىزدىڭ وزدەرىنىڭ ازاماتتىق كوزقاراستارىن, جاۋاپكەرشىلىكتەرىن تانىتىپ جاتقاندارى قۋانتتى. جالپى, وبلىستىڭ بارلىق اۋىل, اۋدان ورتالىقتارى, قالالارى جاقسى بەلسەندىلىك كورسەتتى. ونى بىزدەر وزىمىزگە اۋدانداردان كەلگەن فوتوسۋرەتتەر ارقىلى دا كوز جەتكىزىپ وتىرمىز», – دەدى ءا.سابىرحانوۆا.
ءبىزدىڭ كەلەسى كەلگەن №79 سايلاۋ ۋچاسكەسىندە دە بەلسەندىلىك كورىنىپ تۇردى, ادەمى كيىمدەرىن كيىنىپ, قۋانىشتى كوڭىل-كۇيدە كەلىپ جاتقان قالا تۇرعىندارى كوپ ەدى. سايلاۋدىڭ بارىسىن باقىلاپ وتىرعان بايقاۋشىلار دا ەشقانداي زاڭ بۇزۋشىلىقتاردىڭ ورىن الماعانىن, ءبارى دە قالىپتى جاعدايدا وتكەنىن ايتىپ جاتتى.
پەتروپاۆل
تاڭمەن تالاسا تۇرعان سولتۇستىكقازاقستاندىقتار ەرەكشە مەرەكەلىك كوڭىل-كۇيمەن سايلاۋ ۋچاسكەلەرىنە كەلە باستادى. ساعات ءتىلى تاڭعى ساعات 7-ءنى كورسەتكەندە, وبلىستىق بالالار جانە جاسوسپىرىمدەر شىعارماشىلىق ورتالىعىندا ورنالاسقان №644 سايلاۋ ۋچاسكەسىنىڭ ەسىگى ايقارا اشىلدى. ءدۇبىرلى دودا باستالماي جاتىپ جينالعانداردىڭ قاراسى قالىڭ. مەملەكەتتىك ءانۇران وينالعاننان كەيىن سايلاۋ كوميسسياسىنىڭ توراعاسى قانات سادۋاقاسوۆ سايلاۋشىلاردى داۋىس بەرۋگە شاقىردى. ءوز كوزقاراسىن ايقىنداۋعا كەلگەن ماريا لەونوۆا كەيۋانا داۋىس بەرۋگە كەزەكسىز وتكىزىلىپ, ءوز ميسسياسىن اتقارىپ بولعاننان كەيىن ارنايى سىيلىق تارتۋ ەتىلدى. سويتسە, ءدال وسى كۇنى تىل ەڭبەككەرى 80-ءنىڭ سەڭگىرىن ەڭسەرگەن ەكەن.
وڭىردە «وۆ-تان» ءبىرىنشى بولىپ قۇتىلعان التاي قوجاحمەت اعامىز دا داۋىس بەرۋگە الدىڭعىلاردىڭ قاتارىندا جەتىپتى. قازاقتىڭ ويۋلى شاپانىن, وقالى قالپاعىن كيگەن عالىم اعامىز ابىز اقساقالدان اۋماي قالىپتى. ءبىر-بىرىمەن قاتار ورنالاسقان №684 جانە 685 سايلاۋ ۋچاسكەلەرىندە دە سايلاۋشىلاردىڭ بەلسەندىلىگىنە كوز جەتكىزدىك. مۇنداعى جاۋاپتى ادامداردىڭ ايتۋىنا قاراعاندا, ءار ۋچاسكە بويىنشا تىزىمگە 2300-دەن استام سايلاۋشى ەنگىزىلىپ, 10 كابينادان قويىلعان. 90 ادام ۇيدەن داۋىس بەرگەن.
بىرقاتار سايلاۋ ورىندارىن ارالاعاننان كەيىن جولاي وبلىستىق سايلاۋ كوميسسياسىنا سوعىپ, ماڭىزدى ناۋقاننىڭ ءوتۋ بارىسىمەن جەتە تانىسۋدى ۇيعاردىق. كوميسسيا توراعاسى اسقار ساقىپكەرەەۆ سايلاۋ ۋچاسكەسى اۋماعىنداعى تۇرعىلىقتى مەكەنجايلار بويىنشا 380 مىڭنان استام ادام تىزىمگە الىنىپ, 709 سايلاۋ ۋچاسكەسىندە ءوز تاڭداۋلارىن جاساپ جاتقاندارىن جەتكىزدى. دەمالىس ۇيلەرىندە, ەمحانالاردا, قارعىن سۋ شايعان, قاتىناۋى قيىن ەلدى مەكەندەردە ۇيىمداستىرۋ شارالارى تىڭعىلىقتى قاراستىرىلعان. ءجۇرىپ-تۇرۋى قيىن ادامدار ءۇشىن 141 كوشپەلى جاشىك قىزمەت كورسەتتى.
ساعات 18-دە ايىرتاۋ اۋدانىندا ىسساپارمەن جۇرگەن حالىقارالىق بايقاۋشى ماتۆەي بەرگمانمەن ۇيالى تەلەفون ارقىلى حابارلاسقانىمىزدا سايلاۋدىڭ اشىق, ءادىل ءوتىپ جاتقانىن سايلاۋشىلاردىڭ 97,5 پايىزى ءوز تاڭداۋلارىن جاساعاندارىن جەتكىزدى. ال وبلىس بويىنشا بۇل كورسەتكىش 93,86 پايىزدى قۇراپ, 98 ۋچاسكەدە تامامدالعانى بەلگىلى بولدى.
سۋرەتتى تۇسىرگەن
تالعات تانىباەۆ.
تالدىقورعان
جەتىسۋلىقتار كەشە ەرتەلەتە سايلاۋ ۋچاسكەلەرىنە اسىقتى. بۇگىنگىدەي بەيمارال زاماندا كونستيتۋتسيالىق قۇقىعىنا ساي ءتول مىندەتىن ورىنداۋشىلار پاراساتتىلىق پەن مادەنيەتتىلىك تانىتتى. سايلاۋ ۋچاسكەلەرىنە كەلىپ-كەتۋشىلەر مىڭداپ سانالعانىمەن, ادامدار اراسىنداعى سىيلاسىمدىلىق, ۇلكەنگە كورسەتىلگەن مەيىرىمدىلىك پەن كىشىگە جاسالعان ءىلتيپات كورگەن جاندى ءسۇيسىنتتى.
وسىعان دەيىنگى سايلاۋلارمەن سالىستىرعاندا, بۇگىنگى قازاقستان رەسپۋبليكاسىنىڭ پرەزيدەنتىن سايلاۋعا حالىقتىڭ قاتىسۋ بەلسەندىلىگى جوعارىلاپ, مادەنيەتتىلىكتىڭ تاماشا ءارى ءۇيلەسىمدى قىرىن كورسەتتى. بۇل – قۋانا قۇپتارلىق جايت. 26 ءساۋىر كۇنى تاڭعى ساعات 7.00-دە الماتى وبلىسى بويىنشا 883 سايلاۋ ۋچاسكەسى سايلاۋشىلارعا ەسىكتەرىن ايقارا اشتى.
مىنە, ساعات 20.00-دە وبلىس بويىنشا سايلاۋعا قاتىساتىندىعى انىقتالىپ, تىركەلگەن 945 708 سايلاۋشىنىڭ باسىم بولىگى, ياعني ناقتى ايتقاندا, 98,48 پايىزى داۋىس بەردى. ەلدىڭ بۇل سايلاۋعا دەگەن بەلسەندىلىگىنىڭ ارتۋى رەسپۋبليكامىزداعى الەۋمەتتىك-ەكونوميكالىق جاعدايدىڭ جاقسارعانىن جانە حالىقتىڭ ساياسي بەلسەندىلىگىنىڭ كوتەرىلگەندىگىن كورسەتەدى.
تاراز
جامبىل – ەجەلدەن ماڭگىلىك ەل يدەياسىنان تۋىنداپ وتىرعان ۇلتتىق بىرلىكتى سانادا ساقتاعان, تاتۋلىقتىڭ ورداسى بولعان ءوڭىر. قازاقستان پرەزيدەنتىن سايلاۋ جامبىل وبلىسىندا وتە ۇيىمشىلدىقپەن ءوتتى. اۋليەاتالىقتار بۇل ناۋقاندا اسقان بەلسەندىلىك تانىتتى.
وبلىستاعى 461 سايلاۋ ۋچاسكەسىنە ەل كۇنى بويى اعىلىپ جاتتى. وسىناۋ جانداردىڭ قۋانىشتى جۇزدەرىنەن بۇل ساياسي ناۋقاننىڭ جاۋاپكەرشىلىگىن سەزىنىپ, وعان تىڭ دايىندىقپەن كەلگەنىن بايقايسىز. سونىڭ ءبىرى رەتىندە تاراز قالاسىنداعى №50 سايلاۋ وكرۋگىن ايتساق بولادى. ۋچاسكەدە سايلاۋشىلارعا بارلىق جاعداي جاسالعان. اۋلادا اسەم ءان شىرقالىپ جاتسا, ىشتە داۋىس بەرۋشىلەردىڭ كەيبىرى شاحمات, دويبى ويىندارىنا قىزۋ كىرىسىپ كەتىپتى. سونداي-اق, سايلاۋ ۋچاسكەسى جانىندا ساۋدا دۇڭگىرشەكتەرى قويىلىپ, ەل قاجەتتى ازىق-ت ۇلىكتەرىن ساتىپ الۋدا.
ال تاراز قالاسىنداعى №39 سايلاۋ وكرۋگىنە العاشقىلاردىڭ ءبىرى بولىپ كەلگەن 78 جاستاعى بوتاباي مالدىباەۆ اقساقال ەل تاعدىرى شەشىلەتىن جاۋاپتى ساتكە بەيجاي قاراي المايتىنىن ايتادى. بۇگىندە بەينەتىنىڭ زەينەتىن كورىپ وتىرعان قاريا داۋىس بەرۋگە اجەي ەكەۋى كەلىپتى. ال جامبىل پوليتەحنيكالىق كوللەدجىنىڭ ستۋدەنتى زاحار شاريپوۆ ءوز تاڭداۋىن №35 سايلاۋ وكرۋگىندە جاسادى. بولاشاق جىلىجاي مامانى زاحار وسى ناۋقانعا اتسالىسىپ, داۋىس بەرگەنىنە وتە قۋانىشتى. «تاڭەرتەڭ ەرتە تۇرىپ, سايلاۋ ۋچاسكەسىنە جەتكەنشە اسىق بولدىم, بۇل – مەن ءۇشىن ۇلكەن جاۋاپكەرشىلىك», – دەيدى ول. جامبىلدىق سايلاۋشىلاردىڭ ءوز تاڭداۋلارىن جاساۋدا بەلسەندىلىك تانىتۋى, ارينە, ولاردىڭ بۇل جاۋاپتى ساتكە اسقان جاۋاپكەرشىلىكپەن قارايتىنىن بىلدىرسە كەرەك. بىرلىگى, ىنتىماعى جاراسقان ەلدىڭ حالقى وسىنداي ۇيىمشىل بولادى.
وبلىستىق سايلاۋ كوميسسياسىنىڭ ءمالىمەتىنە قاراعاندا, جامبىلدىق سايلاۋشىلاردىڭ 97,31 پايىزى داۋىس بەردى.
شىمكەنت
شىمكەنت قالالىق سايلاۋ كوميسسياسىنىڭ توراعاسى ەرلان بەكتۇرعانوۆ قالاداعى №222 سايلاۋ ۋچاسكەسىنىڭ 20-سى جابىق دەگەن. سەبەبى, مىناداي: جابىق سايلاۋ ۋچاسكەلەرىنە اۋرۋحانالار, ەكى اسكەري ءبولىم, قارتتار ءۇيى جانە تەرگەۋ يزولياتورىندا ءىسى سوتقا جەتپەگەن ازاماتتار كىرەدى. ال مۇگەدەك جاندارعا ساعات ون ەكىگە دەيىن ارنايى بولىنگەن ازاماتتار سايلاۋ جاشىگىن اپارادى.
وبلىستىق كلينيكالىق اۋرۋحانادا ناۋقاستار وسىندا ۇيىمداستىرىلعان №125 سايلاۋ ۋچاسكەسىندە داۋىس بەردى. بۇگىنگى تاڭدا مۇندا 675 ادام ەم الىپ جاتىر ەكەن.
– اۋرۋحانا بولعاننان كەيىن وسى ۋچاسكەگە قينالماي جەتەتىن جاعداي جاسادىق, – دەدى №125 سايلاۋ ۋچاسكەسىنىڭ كوميسسيا توراعاسى مامۋرجان سايپوۆ. – ءار ناۋقاستى ءوز ءبولىمىنىڭ مەدبيكەسى الىپ كەلەدى. ءۇش ساعاتتىڭ ىشىندە داۋىس بەرىپ بولدىق دەسەك تە بولادى.
وبلىستىق كلينيكالىق اۋرۋحانا ۇجىمى توسەك تارتىپ جاتىپ قالعان 11 ناۋقاسقا دا سايلاۋ كوميسسياسىنىڭ مۇشەلەرى مەن بايقاۋشىلاردىڭ قاتىسۋىمەن سايلاۋ جاشىگىن الىپ باردى.
شىمكەنتتەگى №49 سايلاۋ ۋچاسكەسىنىڭ كوميسسياسى مەن بايقاۋشىلار دا دەنساۋلىقتارىنا بايلانىستى ۇيىنەن شىعا الماعان ازاماتتارعا سايلاۋ جاشىگىن الىپ باردى. سولاردىڭ ءبىرى قارت مايدانگەر قورعانباي ەلەۋوۆ اقساقال ەدى. ەل باسىنا كۇن تۋعاندا ەتىگىمەن سۋ كەشكەن, قاندى قاساپتان امان كەلگەن مايدانگەر ءوزى بارىپ داۋىس بەرە الماعانىنا ىشتەي قاپا بولعانىمەن, كوميسسيا كەلگەندە قۋانىپ قالدى.
– ءبىز ەلدىڭ تىنىشتىعىنىڭ قادىرىن بىلەتىن جانبىز. كۇندەي كۇركىرەپ وتكەن سوعىستىڭ ميلليونداعان جۇرەكتەرگە سالعان جاراسى ءال-ءازىر جازىلمايدى. اسپانىمىز اشىق بولىپ, ەلىمىز تىنىش بولعانعا نە جەتسىن. مەن تاڭداعان ادام وتانىمىزدىڭ باعىنا تۋعان جان دەپ ءتۇسىنەمىن جانە قاتەلەسپەك ەمەسپىن. مۇنداي سايلاۋعا نەمقۇرايدىلىقپەن قاراۋعا بولمايدى, سوندىقتان ۇيدەگىلەردى ەرتەرەك وياتىپ, سايلاۋعا جىبەردىم, – دەدى ول.
تىنىشتىق كۇزەتشىسى, بەيبىت ءومىردىڭ قادىرىن جاقسى بىلەتىن, پرەزيدەنتتىك سايلاۋدا قاتەلەسپەيتىندىگىن ايتقان قاريانىڭ بايلامى وسى.
ايقارما بەتتى دايىنداعاندار «ەگەمەن قازاقستاننىڭ» مەنشىكتى تىلشىلەرى.
