ءبىر اۋلەتتەن 51 ادام داۋىس بەردى
تۇركىستان, اقىن ماعجان ايتقانداي «ەر تۇرىكتىڭ بەسىگى», بارلىق مۇسىلمان قاۋىم ءۇشىن ەڭ قاسيەتتى مەكەندەردىڭ ءبىرى. كەشە عانا تۇركيانىڭ پرەزيدەنتى رەدجەپ تايىپ ەردوعان: «قايدا جۇرسەك تە قوجا احمەت ياساۋي جاتقان جەر ءبىز ءۇشىن ەشكىمگە قيماسىمىز, اسىل وتانىمىز», دەپ كەتتى.
سول تۇركىستان پرەزيدەنت سايلاۋىن ۇيىمشىلدىقپەن وتكىزدى. ءتۇركىستانداعى 118216 سايلاۋشى قالاعا قاراستى 12 اۋىلداعى 36 ءجانە شاھاردىڭ وزىندەگى 37 سايلاۋ ۋچاسكەلەرىنە بارىپ تاڭداۋلارىن جاسادى.
جيىرما جاسىندا جاسىنداي جارقىراعان سپورت پاديشاسى, وليمپيا ويىندارىنىڭ جەڭىمپازى اتانعان بەكزات ساتتارحانوۆ تۋعان وڭىردەگى رەسپۋبليكاعا ءايگىلى وتباسىلاردىڭ ءبىرى – وتكەن جىلى «مەرەيلى وتباسى» ۇلتتىق كونكۋرسىنىڭ جەڭىمپازى اتانعان بيماحانبەتوۆتەر اۋلەتى. وتاعاسى ەلتاي اتامىز 83 جاستا. قوساعى ەلەنا اجەمىز ەكەۋى 8 بالا, 33 نەمەرە, 15 شوبەرە ءوسىرىپ, وركەن جايعان الىپ بايتەرەككە اينالعان.
ءوز ومىرىندە 68 رەت سايلاۋعا كەلىپ وتىرعان اقساقالدىڭ كوڭىل-كۇيى جاقسى, رۋحى اسقاق. ول: «مەنىڭ ەكى نەمەرەم, ەكى شوبەرەم كامەلەتتىك جاسقا تولىپ, العاش رەت داۋىس بەردى. وتباسىمىزبەن اقىلداسىپ, كىمگە داۋىس بەرەتىنىمىزدى شەشكەنبىز. ايتسە دە, ەشكىمنىڭ تاڭداۋىنا قارسى بولمايمىن. ويتكەنى, ول ونىڭ كونستيتۋتسيالىق قۇقىعى. قاي ۇمىتكەرگە داۋىس بەرسە دە قازاقستاننىڭ بولاشاعى ءۇشىن جاۋاپتى بولاتىن, حالىقتىڭ ىرىسىن تاسىتاتىن, ەلگە بەيبىتشىلىك پەن تاتۋلىق, بىرلىك اكەلۋگە مۇمكىندىگى مول ازاماتقا داۋىس بەرەرىنە سەنەمىن. قۋانىپ تۇرىپ ايتارىم, وسى سايلاۋدا ءبىزدىڭ اۋلەتتەن 51 ادام داۋىس بەرىپ جاتىر», دەدى.
ۇلكەن اۋلەتتىڭ سايالى بايتەرەگىنە اينالعان اقساقالدىڭ قۋانىشى بۇل عانا ەمەس ەكەن. «سايلاۋ كۇنى اۋلەتكە تاعى ءبىر شاقالاق كەلدى, قىز بالا الەمنىڭ جارىق ەسىگىن اشتى!» دەپ قاريا قۋانىشىمەن ءبولىستى.
ەندى ەلتاي اعامىزدىڭ 34 نەمەرەسى بار.
«مەرەيلى وتباسى» ۇلتتىق بايقاۋىندا جۇزدەن جۇيرىك, مىڭنان تۇلپار شىققان بيماحانبەتوۆتەر اۋلەتى ءبىر كۇندە ەكى بىردەي قۋانىشقا يە بولدى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.
