بۇل كۇندەرى ءال-فارابي اتىنداعى قازۇۋ-دىڭ ءباسپاسوز قىزمەتى قىتايدىڭ سولتۇستىك-باتىس پوليتەحنيكالىق ۋنيۆەرسيتەتىنىڭ (سبپۋ) قازۇۋ بازاسىنداعى فيليالى تالاپكەرلەردەن قۇجاتتار قابىلدانىپ جاتقانىن حابارلايدى.
فيليال باكالاۆريات تۇلەكتەرىنە بۇگىندە سۇرانىسقا يە «ەلەكترونيكا جانە كوممۋنيكاتسيالىق تەحنولوگيالار», «ماتەريالتانۋ جانە ينجەنەريا» مەن «كومپيۋتەرلىك عىلىمدار مەن تەحنولوگيالار» ماماندىقتارىن مەڭگەرۋدى ۇسىنىپ وتىر.
جوعارىدا اتاپ وتكەندەي, قر پرەزيدەنتى قاسىم-جومارت توقاەۆتىڭ 2023 جىلى مامىردا قىتايعا جاساعان مەملەكەتتىك ساپارى اياسىندا قحر سولتۇستىك-باتىس پوليتەحنيكالىق ۋنيۆەرسيتەتىنىڭ (سبپۋ) قازاقستانداعى فيليالىن اشۋ تۋرالى كەلىسىمگە قول قويىلىپ, وسى قۇجات نەگىزىندە ءال-فارابي اتىنداعى قازاق ۇلتتىق ۋنيۆەرسيتەتىندە 12 قازاندا قحر سولتۇستىك-باتىس پوليتەحنيكالىق ۋنيۆەرسيتەتىنىڭ فيليالى اشىلدى.
ءوز كەزەگىندە سبپۋ Academic Ranking of World Universities 2023 حالىقارالىق رەيتينگىنىڭ توپ-200 ەنسە, THE 2023 رەيتينگىندە توپ-600 (317-ءشى ورىن) جانە U.S.NEWS 2023 حالىقارالىق رەيتينگىندە 253-ءشى ورىندى يەلەنەدى.
ماگيستراتۋرانىڭ ءبىرىنشى جىلىن ستۋدەنتتەر قازاقستاندا, ەكىنشى جىلىن قىتايدا وقيدى. وقۋىن اياقتاعان سوڭ جاستار ەكى جوعارى وقۋ ورنىنىڭ قازۇۋ مەن سبپۋ قوس ديپلومىن الادى. فيليال تۇلەكتەرى حالىقارالىق تەحنولوگيالىق كومپانيالاردا قىزمەت اتقارا الادى.
بۇگىندە كوپتەگەن قىتايلىق وندىرۋشىلەر قازاقستاندا وكىلدىكتەرىن اشىپ جاتقانى ايان. وسى تۇرعىدان كەلگەندە قازۇۋ جانە سبپۋ ديپلومدارى جاس ماماندارعا Huawei جانە ZTE سىندى قحر ءىرى كومپانيالارىنا جۇمىسقا ورنالاسۋ كەزىندە ارتىقشىلىقتار مەن مول مۇمكىندىك بەرمەك.
وقۋعا تىلەك بىلدىرۋشىلەر كەشەندى تەستىلەۋدەن (كت) ءوتۋى قاجەت. گرانت يەگەرلەرى اۆتوماتتى تۇردە قابىلدانادى. گرانت يەلەنبەگەن, بىراق 75 باللدان جوعارى بالل جيناۋشىلار اڭگىمەلەسۋدەن وتۋگە مۇمكىندىك الادى. فيليال ستۋدەنتتەرىنە قوسىمشا ستيپەنديالار بەرىلەدى. قۇجاتتاردى قابىلداۋ ۋاقىتى 20 تامىزعا دەيىن جالعاسادى.
