فوتو: Freepik
مينيسترلىكتىڭ حابارلاۋىنشا, عىلىمي-پەداگوگيكالىق باعىت بويىنشا ماگيستراتۋراعا ءتۇسۋ ءۇشىن كەمىندە 75 بالل, بەيىندىك باعىت بويىنشا كەمىندە 30 بالل جيناۋ قاجەت.
«گرانت كونكۋرسىنا قۇجاتتاردى قابىلداۋ 12-15 تامىز ارالىعىندا جۇزەگە اسىرىلادى, ال گرانت يەگەرلەرىنىڭ ءتىزىمى 25 تامىزعا دەيىن جاريالانادى», دەلىنگەن حابارلامادا.
ايتا كەتەيىك, ماگيستراتۋراعا تۇسۋگە ارنالعان كەشەندى تەستىلەۋدى 39 مىڭنان استام ادام تاپسىرعان. ولاردىڭ 43%-ى شەكتى بالل جيناعان. ورتاشا كورسەتكىش – 75 , ال ەڭ جوعارى بالل – 132 بالل بولدى.
بيىل ەلىمىزدە ماگيستراتۋرادا وقۋعا 13 مىڭ گرانت ءبولىندى.
«تەستىلەۋ قورىتىندىسى بويىنشا 149 قاتىسۋشىنىڭ ناتيجەسى جويىلدى. ونىڭ ىشىندە 101 وقۋعا ءتۇسۋشى سمارتفون, شپارگالكا جانە باسقا دا تىيىم سالىنعان زاتتاردى الىپ وتۋگە تىرىسقانى ءۇشىن تەست تاپسىرۋ مۇمكىندىگىنەن ايىرىلدى. كەشەندى تەستىلەۋ كەزىندە ەرەجەلەردى بۇزعانى ءۇشىن اۋديتوريادان 41 ادام شىعارىلىپ, ولاردىڭ ناتيجەلەرى جويىلدى. كەشەندى تەستىلەۋگە كىرگىزۋدىڭ ءۇش دەڭگەيلى جۇيەسىنىڭ ارقاسىندا 3 بوگدە تۇلعا انىقتالدى. سونداي-اق تەستىلەۋ بەينەجازبالارىن قايتا تەكسەرۋ ناتيجەسىندە 4 ادامنىڭ بالى جويىلدى. اتاپ وتسەك, ەرەجە بۇزۋشىلىق وتكەن جىلمەن سالىستىرعاندا (2023 جىلى – 281) شامامەن ەكى ەسەگە ازايدى», دەپ حابارلادى عىلىم جانە جوعارى ءبىلىم مينيسترلىگىنىڭ ءباسپاسوز قىزمەتى.
گرانت كونكۋرسىنا قاتىسۋ ءۇشىن ۇمىتكەرلەر كەلەسى قۇجاتتاردى تاپسىرۋ قاجەت:
- جەكە كۋالىكتىڭ كوشىرمەسى;
- جوعارى ءبىلىمى تۋرالى قۇجات (ديپلوم جانە قوسىمشاسى);
- كت سەرتيفيكاتى; حالىقارالىق سەرتيفيكاتتار (بار بولعان جاعدايدا).
قۇجاتتاردى وقۋ ورنىنا قابىلداۋ كوميسسيالارىنا وفلاين, سونداي-اق ۆيرتۋالدى قابىلداۋ كوميسسيالارى ارقىلى ونلاين تاپسىرۋعا بولادى.
