«OpenAI» – 2015 جىلى سەم التمان, يليا سۋتسكەۆەر, يلون ماسك جانە تاعى باسقا مامانداردىڭ جەتەكشىلىگىمەن قۇرىلعان كومپانيا. ماقساتى – قوعام يگىلىگى ءۇشىن اشىق جۇمىس ىستەۋ. سۋتسكەۆەر بۇل جەردە اۋەلگىدە باس عىلىمي قىزمەتكەر, كەيىن جاساندى ينتەللەكتىنىڭ قاۋىپسىزدىگى ءبولىمىن باسقاردى. ال قىزمەتتەن كەتكەننەن كەيىن «Apple» كومپانياسىنىڭ AI ازىرلەۋ ءبولىمىنىڭ بۇرىنعى باسشىسى دەنيەل گروسس جانە «OpenAI»-ءدىڭ بۇرىنعى قىزمەتكەرى دەنيەل لەۆيمەن بىرگە «Safe Superintelligence-ءتىڭ» نەگىزىن قالادى.
كۇنى بۇگىنگە دەيىن ادامزات ءۇشىن اقپارات ايدىنىنداعى اينىماس دوس – «Chat GPT» جاساندى ينتەللەكتىسى بولدى. جاقىندا ونىڭ «Chat GPT–4و» دەگەن جاڭا ءتۇرى قولدانىسقا ەندى. ونىڭ بۇرىنعىسىنان ارتىقشىلىعى – ەكى ەسە جىلدام اقپارات تاۋىپ, كەز كەلگەن ءتىلدى انىق تۇسىنەدى. ءتىپتى قازاق تىلىندە دە لەزدە جاۋاپ بەرەدى. مۇندا ءسىز تەك ءماتىن عانا ەمەس, اۋديو فورماتتا دا حابارلاما جازا الاسىز. ال وزىندىك برەندى قالىپتاسقان «OpenAI»-ءدىڭ تانىمال تەحنولوگياسىنان جاڭا ءونىمنىڭ قانداي ەرەكشەلىگى بار؟
«Safe Superintelligence» – كادىمگى ادامنىڭ ميىمەن بىردەي مۇمكىندىككە يە نەيروجەلى. ول اقپاراتتاردى زەرتتەيدى, تالدايدى جانە قابىلەتىن ءارتۇرلى جاعدايدا قولدانا الادى.
سۋتسكەۆەر ءوزىنىڭ اتالعان كومپانياسىنىڭ قۇرىلعانى تۋرالى الەۋمەتتىك جەلىدەگى جازباسىندا: «SSI – بۇل ءبىزدىڭ ميسسيامىز, ءبىزدىڭ اتاۋىمىز جانە بۇكىل ءونىمنىڭ جول كارتاسى. ول – باستى نازارىمىزداعى جوبا. ءبىزدىڭ كوماندا, ينۆەستورلار جانە بيزنەس-مودەل بارلىعى SSI-عا قول جەتكىزۋگە بەيىمدەلگەن. ءبىز قاۋىپسىزدىك پەن مۇمكىندىكتى قاتار قاراستىرامىز. ويتكەنى تەحنيكالىق ماسەلەلەر رەۆوليۋتسيالىق ينجەنەريا مەن عىلىمي جەتىستىكتەر ارقىلى شەشىلەدى», دەپ ايتقان. شىنىمەن, ۇزدىك ۇشتىك جاڭا ونىمدە قاۋىپسىزدىك ەرەكشە نازارعا الىنعان. يليا سۋتسكەۆەردىڭ «OpenAI» كومپانياسىنان كەتۋىنىڭ باستى سەبەبى دە – وسى. ءتىپتى بۇل تۋرالى شەتەلدىك باق وكىلدەرى جارىسا جازىپ جاتىر. ياعني نەيروجەلى ەشكىمگە زيان تيگىزبەۋگە ءتيىس. ول ادامزات اقىل-ويىنا يدەيا قوسقانىمەن, ونى باسىپ وزبايدى. سول ارقىلى تەحنولوگيانىڭ تابيعي ينتەللەكتىنى باسقارۋىنىڭ الدىن الادى. ال بۇل جولدا جاڭا ۇجىم وزدەرىنە كىل جۇيرىكتەردى جيناۋدى كوزدەگەن. سوندىقتان قاتارعا سۋپەربارلاۋدى جۇزەگە اسىراتىن ينجەنەرلەر مەن زەرتتەۋشىلەردىڭ شاعىن, ەليتالىق توبىن جاساقتايدى. وسىلايشا, تاڭدامالى شىعارماشىلىق ۇجىمنىڭ ارقاسىندا كوممەرتسياعا باعىتتالماعان, قاۋىپسىز سۋپەرينتەللەكت ءوز جۇمىسىن باستايدى.
بي-فاتيما ەرالحانقىزى,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
